Jɛrimaya 38 - Krio Fɔs Oli Baybul

Jɛrimaya de Insay Wan Dray Wɛl

¹ Shefataya we na Matan in bɔypikin, Gɛdalaya we na Pashɔ in bɔypikin, Jɛukal we na Shelɛmaya in bɔypikin, ɛn Pashɔ we na Malkaya in bɔypikin, bin yɛri wetin Jɛrimaya bin de tɛl di pipul dɛm, we i se

² “Na dis PAPA GƆD se. Ɛnibɔdi we go kɔntinyu fɔ tap na dis siti, go day na wa, wit bad bad aŋri ɔ bay siknɛs; bɔt di wan dɛn we go to di Babilonian dɛm, dɛn layf go sev; dɛn layf go bi di prayz fɔ wa, ɛn dɛn nɔ go day.

³ Na dis PAPA GƆD se, Dis kiŋ na Babilɔn in ami go mɔs kapchɔ dis siti.”

⁴ Nain di bigman dɛn tɛl di kiŋ se, “Lɛ wi kil dis man, bikɔs i de pwɛl di soja man dɛn we lɛf na di siti, ɛn ɔl di pipul dɛn at wit da kayn wɔd de we i de tɛl dɛm. Bikɔs dis man nɔ de mɛmba fɔ di pipul dɛn sefti o, na dɛn day wan i want.”

⁵ Nain Kiŋ Zɛdikaya se, wɛl, di man de na una an, bikɔs di kiŋ kyant do ɛnitin agens una.”

⁶ So dɛn tek Jɛrimaya ɛn ib am insay Prins Malkaya we na di kiŋ in bɔypikin in wɛl, we bin de na di pales yad, Na rop dɛn tek put am dɔŋ de. Nɔn wata nɔ bin de de pas pɔtɔpɔtɔ so Jɛrimaya sink insay di pɔtɔ pɔtɔ.

⁷ Wɛn Ebɛdmɛlɛk, wan Itiopian okobo we bin tap na di kiŋ in os, yɛri se dɛn dɔn put Jɛrimaya insay di wɛl–di kiŋ bin sidɔm na Bɛnjamin Get–

⁸ Ɛbɛdmɛlɛk kɔmɔt insaya di kiŋ in os go tɛl di kiŋ se,

⁹ “Mi masta we na di kiŋ, dɛn man ya dɔn du bad bay wetin dɛn du to Jɛrimaya we na prɔfɛt, we dɛn put am insay da wɛl; ɛn i go day de wit angri, bikɔs nɔn it nɔ lɛf na di siti.”

¹⁰ Nain di kiŋ ɔda Ɛbɛdmɛlɛk we na Itiopian se, “Tek tri man dɛm na ya go pul Jɛrimaya we na prɔfɛt kɔmɔt insay di wɛl bifo i day.”

¹¹ So Ɛbɛdmɛlɛk tek di man dɛn go na di kiŋ in os, na wan wɔdrob na di sto, ɛn pal sɔm chɛr chɛr klos dɛm ɛn klos dɛn we dɔn pwɛl we i sɛn dɔŋ to Jɛrimaya na di wɛl wit rop.

¹² Nain Ɛbɛdmɛlɛk we na Itiopian tɛl Jɛrimaya se, “Put di ol chɛr chɛr klos dɛn ɛn di ol wan dɛm ɛn di rop ɔnda yu ɔnda an.” Jɛrimaya du wetin i se.

¹³ Nain dɛn drɔ Jɛrimaya kam ɔp wit di rop dɛm ɛn es am kɔmɔt insay di wɛl. So Jɛrimaya kɔntinyu fɔ tap na di pales yad.

Zɛdikaya Aks Jɛrimaya Fɔ Advays

¹⁴ Kiŋ Zɛdikaya sɛn fɔ Jɛrimaya we na prɔfɛt ɛn tɛl am kabɔ na di tɔd domɔt na PAPA GƆD in os. Di kiŋ tɛl Jɛrimaya se, “A go aks yu wan kwɛshɔn; nɔ ayd natin pan mi.”

¹⁵ Nain Jɛrimaya tɛl Zɛdikaya se, “If a tɛl yu, yu shɔ se yu nɔ go kil mi? Ɛn if a advays yu, yu shɔ se yu go lisin to mi.”

¹⁶ Nain kiŋ Zɛdikaya swɛ sikrit wan to Jɛrimaya se, “Wans PAPA GƆD we mek wi sol dɛn, de, a nɔ go kil yu ɔ an yu oba to dɛn man ya we wan kil yu.”

¹⁷ Nain Jɛrimaya tɛl Zɛdikaya se, Na dis PAPA GƆD Ɔlmayti we na Izrɛl dɛn Gɔd se, If yu sɔrɛnda to di kiŋ na Babilɔn in bigman dɛm, dɛn go spia yu layf ɛn dɛn nɔ go bɔn dis siti wit faya, ɛn yu ɛn ɔlman na yu os nɔ go day.

¹⁸ Bɔt if yu nɔ sɔrɛnda to di kiŋ na Babilɔn in bigman dɛm, I go gi di siti to di Babilonian dɛn, ɛn dɛn go bɔn am wit faya, ɛn yu nɔ go ɛskep.

¹⁹ Nain Kiŋ Zedikaya tɛl Jɛrimaya se, “A de fred di Ju dɛm we dɔn rɔnawe go jɔyn di Babilonian dɛm, lɛ dɛn nɔ an mi oba to dɛm ɛn lɛ dɛn nɔ molɛs mi.”

²⁰ Nain Jɛrimaya se, “Dɛn nɔ go an yu oba to dɛm. Du wetin a tɛl yu se PAPA GƆD se, wantɛm wantɛm, ɛn i go bi wɛl wit yu ɛn dɛn go spia yu layf.

²¹ Bɔt if yu nɔ gri sɔrɛnda, na di vishɔn dis we PAPA GƆD dɔn sho mi:

²² A si dɛn de kɛr ɔl di uman dɛn we lɛf na di kiŋ na Juda in os go to di bigman dɛn na Babilɔn de se, Yu padi dɛn we yu bin biliv dɔn ple yu tampale, ɛn dɔn gɛt yu aw dɛn want yu; naw we una fut dɔn sink insay pɔtɔpɔtɔ dɛn dɔn kɔmɔt biɛn yu.’

²³ Dɛn go kɛr ɔl yu wɛf dɛm ɛn yu bɔypikin dɛm go to di Babilonian dɛm, ɛn yusɛf nɔ go ɛskep; di kiŋ na Babilɔn go kapchɔ yu ɛn dɛn go bɔn dis siti wit faya.”

²⁴ Nain Zɛdikaya tɛl Jɛrimaya se, ‘Nɔ tɛl nɔbɔdi bɔt dɛn tin ya ɛn a nɔ go kil yu.

²⁵ If di bigman dɛn yɛri se a dɔn tɔk to yu, ɛn kam mit yu se, ‘tɛl wi wetin yu bin tɛl di kiŋ ɛn wetin di kiŋ tɛl yu; nɔ ayd natin pan wi ɛn wi nɔ go kil yu,’

²⁶ yu go tɛl dɛn se, ‘A bin beg di kiŋ mek i nɔ sɛn mi go bak na Jonɛthan in os mek a nɔ go day de.’”

²⁷ Nain ɔl di bigman dɛn kam to Jɛrimaya kan aks am, ɛn i ansa dɛm jɛs lɛk aw di kiŋ bin dɔn sho am fɔ du. So dɛn lɛf fɔ tɔk to am bikɔs nɔbɔdi nɔ bin yɛri wetin in ɛn di kiŋ bin tɔk.

²⁸ Ɛn Jɛrimaya kɔntinyu fɔ tap na di pales yad te di tɛm we dɛn kapchɔ Jerusɛlɛm.