Jɛrimaya 37 - Krio Fɔs Oli Baybul

Zɛdikaya Aks Jɛrimaya Fɔ Pre

¹ Na Zɛdikaya we na Josaya in bɔypikin we Nɛbyukadnɛza we na kiŋ na Babilɔn bin mek kiŋ na Juda, bin rul instɛd ɔf Jɛoiachin we na Jɛoiakim in bɔypikin.

² Bɔt in o, in wokman dɛm o, di pipul dɛm na di land o, nɔ tek PAPA GƆD in wɔd we Jɛrimaya we na prɔfɛt de tɛl dɛm, mek natin.

³ Kiŋ Zɛdikaya sɛn Jɛukal we na Shelɛmaya in bɔypikin, ɛn Zɛfinaya we na di man we de mek sakrifays fɔ pipul sin ɛn na Maasɛia in bɔypikin, to Jɛrimaya we na prɔfɛt se, “Pre fɔ wi to PAPA GƆD we na wi Gɔd.”

⁴ Datɛnde, Jɛrimaya bin stil fri fɔ waka ɔlɔbɔt, bikɔs dɛn nɔ bin dɔn put am na Jel yet.

⁵ Fero in ami bin dɔn kɔmɔt insay Ijipt; so wɛn di Babilonian dɛm we bin dɔn sɔrawnd Jerusɛlɛm yɛri dat, dɛn kɔmɔt na Jɛrusɛlɛm tret.

⁶ Nain PAPA GƆD in wɔd kam to Jɛrimaya we na prɔfɛt:

⁷ “Na dis PAPA GƆD we na Izrɛl dɛn Gɔd se: Na dis yu go tɛl di kiŋ na Juda we sɛn yu fɔ kam fɛnɔt to mi, ‘A de tɛl yu. Fero in ami we kam ɛp una, de rɛdi fɔ go na Ijipt we na dɛn yon land.

⁸ Dɔn di Babilonian dɛn go kam bak kam fɛt una; dɛn go kapchɔ una siti ɛn go bɔn am wit faya.’”

⁹ Na dis PAPA GƆD se. Una nɔ ful unasɛf de se, “Paopa, di Babilonian dɛn nɔ go atak wi,” bikɔs dɛn nɔ go lɛf una.

¹⁰ Ivin if una kil di wanol Babilonian ami we de fɛt una, ɛn na so so man dɛm we wund nɔmɔ lɛf, ɛn dɛn ɔl lidɔm insay dɛn tɛnt dɛm, dɛn go mɔs grap ɛn bɔn dis siti wit faya.’”

Dɛn Arɛst Jɛrimaya Put Na Jel

¹¹ Di Babilonian ami bin dɔn kɔmɔt nia Jerusɛlɛm we dɛn yɛri se Fero in Ami de kam.

¹² Jɛrimaya bin lɛf fɔ go na di land ɔf Bɛnjamin fɔ go tek in yon shia pan in pipul dɛn prɔpati.

¹³ Wɛn i rich na Bɛnjamin Get, di bigman pan di sikyɔriti we nam Irija we na Shɛlɛmaya in bɔypikin ɛn Ananaya in grampikin, arɛst Jɛrimaya we na prɔfɛt, se, “Yu de rɔnawe fɔ go oba to di Babilonian dɛm,”

¹⁴ Nain Jɛrimaya se, “Nɔto tru; Nɔto rɔnawe a de rɔnawe go to di Babilonian dɛm.” Bɔt Irijah nɔ lisin to am. I gɛda am ɛn briŋ am to di bigman dɛm.

¹⁵ Di bigman dɛn bin vɛks bad bad wan pan Jɛrimaya. So dɛn bin bit am ɛn lɔk am ɔp na Jonɛthan we na di sɛktri in os, bikɔs dɛn bin dɔn tɔn am to Jel.

¹⁶ We dɛn bin dɔn put Jɛrimaya na di ɔndagrɔn sɛl dɛm, ɛn i dɔn de de fɔ lɔŋ,

¹⁷ nain kiŋ Zɛdikaya sɛn se mek dɛn kɛr am go to am, ɛn i tɛl am kabɔ. Nain di kiŋ aks am sikrit wan nain os se, “Yu nɔ gɛt nɔn wɔd frɔm PAPA GƆD?” Jɛrimaya se, “A gɛt.” Nain i se, “Di kiŋ na Babilɔn go kapchɔ yu.”

¹⁸ Jɛrimaya aks kiŋ Zɛdikaya igen se, “Wetin a du yu, ɔ yu wokman dɛm, ɔ dɛn pipul ya, we mek una put mi na jel?

¹⁹ We una prɔfɛt dɛm we bin prɔfisay to una se, ‘Di kiŋ na Babilɔn nɔ go atak yu ɛn agens dis land?

²⁰ Naw, a beg yu mi lɔd ɛn mi kiŋ, lisin to mi: lɛ di beg we a de beg tɔch yu at, ɛn duya, nɔ sɛn mi go bak na Jonɛthan we na di sɛktri in os, if nɔso, a go day de.”

²¹ So kiŋ Zɛdikaya gi ɔda ɛn dɛn sɛn Jɛrimaya go na di pales yad; ɛn dɛn bin de gi am wan lof bred ɛvirde we de kɔmɔt na di bekri dɛm, sote di bred na di siti bin dɔn. So Jɛrimaya bin de na di pales yad.