Jɛrimaya 35 - Krio Fɔs Oli Baybul

Jɛrimaya ɛn dɛn Rekabayt Dɛn

¹ Dis na PAPA GƆD in wɔd we rich Jɛrimaya di tɛm we Jɛoiakim, we na Josaya in bɔypikin, na bin kiŋ na Juda:

² PAPA GƆD se, “Go na dɛn Rekabayt dɛn os go tɔk to dɛm, ɛn briŋ dɛm kam na PAPA GƆD in os insay wan pan di rum dɛm; dɔn gi dɛm wayn fɔ drink.”

³ So a tek Jaazanaya, we na Abazinaya in bɔypikin Jɛrimaya, yon bɔypikin, ɛn in brɔda dɛm, ɛn ɔl in bɔypikin dɛm ɛn di wanol Rekabayt os.

⁴ A briŋ dɛm kam na PAPA GƆD in os insay Anan we na Igdalia we na man ɔf Gɔd we bin tap nia di bigman dɛn rum, in bɔypikin in rum. Di rum bin de oba Maasɛya we na Shalum, wan pan di bigman na di tɛmpul in bɔypikin inyon rum.

⁵ A put jɔg dɛn we fulɔp wit wayn ɛn kɔp bifo dɛm. Nain a tɛl dɛm se, “Una drink wayn.”

⁶ Bɔt dɛn ansa mi se, “Wi nɔ go drink nɔn wayn, bikɔs Jonadab we na Rekab in bɔypikin we na mi fɔstɛmpapa, kɔmand wi se ‘Una nɔ fɔ drink wayn, una bɔypikin dɛnsɛf, sote go;

⁷ una nɔ fɔ bil os; una nɔ fɔ ib sid na gadin, una nɔ fɔ plant ɔ ivin gɛt greps fam; bɔt una fɔ tap na tɛnt te una day, so dat una go liv lɔŋ na di land we una de as fɔrina.’

⁸ Wi dɔn obe ɔl wetin Jonadab we na Rekab in bɔypikin, wi fɔstɛmpapa se, we i se wi nɔ fɔ drink wayn te wi day, wi, wi wɛf dɛm, wi bɔy ɛn gyalpikin dɛm,

⁹ ɛn nɔ fɔ bil os fɔ tap. Wi nɔ gɛt nɔn greps fam ɔ fam ɔ sid;

¹⁰ bɔt na tɛnt wi dɔn tap ɔl di tɛm, ɛn wi dɔn obe ɛn du ɔl wetin Jonadab we na wi fɔstɛmpapa kɔmand wi fɔ du.

¹¹ Bɔt we Nɛbyukadnɛza we na kiŋ na Babilɔn bin kam fɛt di land, wi bin se, ‘Una kam le wi go na Jerusɛlɛm bikɔs wi de fred di Babilonian dɛn ami ɛn di Sirian dɛn ami.’ Na dat mek na Jerusɛlɛm wi tap.”

¹² Nain PAPA GƆD in wɔd rich Jɛrimaya:

¹³ Na dis PAPA GƆD Ɔlmayti we na Izrɛl dɛn Gɔd se: Go tɛl di man dɛm na Juda ɛn di wan dɛn we tap insay Jerusɛlɛm se, PAPA GƆD se; Una nɔ go lisin to wetin a de tɔk ɛn du wetin a se?

¹⁴ Di kɔmand we Jonadeb we na Rekab in bɔypikin bin gi in yon bɔypikin dɛn, we i se dɛn nɔ fɔ drink wayn, dɛn kip to am; ɛn dɛn nɔ drink nɔn wayn te tide, bikɔs dɛn dɔn obe dɛn papa in kɔmand. Ɔltɛm a de tɔk to una, bɔt una nɔ de lisin mi.

¹⁵ A dɔn sɛn ɔl mi wokman dɛm we na di prɔfɛt dɛn to una ɛn a de sɛn dɛm ɔltɛm se, ‘Ɔlman fɔ lɛf in ivul we ɛn lɛf wetin una de du, ɛn nɔ de biɛn ɔda gɔd dɛm de sav dɛm, datɛnde una go tap na di land we a gi una ɛn una fɔstɛmpapa dɛm.’ Bɔt una nɔ ivin put una yes lisin to mi.

¹⁶ Jonadab in bɔypikin dɛn ɛn Rekab in bɔypikin kip dɛn papa dɛn kɔmand we dɛn gi dɛm, bɔt dɛn pipul ya nɔ obe mi.

¹⁷ Fɔseka dat na dis PAPA GƆD Ɔlmayti we na Izrɛl dɛn Gɔd se: Biliv mi, a de briŋ ɔl di bad bad tin dɛm pan Juda ɛn Jerusɛlɛm, we a bin dɔn tɔk se go bi to dɛm; bikɔs a tɔk to dɛm bɔt dɛn nɔ lisin, a dɔn kɔl dɛm bɔt dɛn nɔ ansa.

¹⁸ Bɔt Jɛrimaya tɛl di Rekabayt dɛn se, “Na dis PAPA GƆD Ɔlmayti we na Izrɛl dɛn Gɔd se: Bikɔs una dɔn obe Jonadab we na una papa kɔmand ɛn du ɔl wetin in lɔ dɛn se ɛn ɔl wetin i kɔmand una fɔ du,

¹⁹ na dis PAPA GƆD Ɔlmayti we na Izrɛl dɛn Gɔd se: Jonadab we na Rekab in bɔypikin nɔ go ɛva de i nɔ gɛt pɔsin fɔ tinap bifo mi.”