Jɛrimaya 33 - Krio Fɔs Oli Baybul

Ɔda Prɔmis Fɔ Abop Pan

¹ PAPA GƆD in wɔd rich Jɛrimaya di sɛkɛn tɛm, we dɛn bin stil lɔk am ɔp insay di pales yad.

² Na dis PAPA GƆD we mek di wɔl se, di GƆD we mol am mek i de aw i de so – na PAPA GƆD na In nem:

³ Kɔl mi ɛn a go ansa yu, ɛn a go tɛl yu di wɔndaful tin dɛn we ayd we yu nɔ no yet.

⁴ Bikɔs na dis PAPA GƆD we na Izrɛl dɛn Gɔd se, bɔt di os dɛm na dis siti ɛn di kiŋ dɛn na Juda dɛn os dɛm, we dɛm bin brok kam dɔŋ fɔ difɛnd dɛnsɛf agens di blɔked dɛm bifo di wa:

⁵ Di Babilonian dɛm de kam fɛt dɛm, ɛn dɛn go fulɔp dɛn os dɛn wit dedebɔdi we a go kil we a vɛks ɛn mi at wam, bikɔs a nɔ de luk na dis siti fɔseka ɔl dɛm wikɛdnɛs.

⁶ A de tɛl yu, a go briŋ wɛlbɔdi ɛn mɛrɛsin, ɛn a go mɛn dɛm ɛn gi dɛm plɛnti plɛnti jɛntri ɛn sikiɔriti.

⁷ A go gi Juda dɛn jɛntri bak, ɛn gi Izrɛl dɛn jɛntri bak, ɛn bil dɛm bak lɛkɛ aw dɛm bin de fɔstɛm.

⁸ A go pul ɔl di sin dɛn we dɛn sin agens mi, ɛn a go fɔgiv dɛn fɔ ɔl dɛn sin ɛn fɔ we dɛn kin tɔn dɛn bak pan mi. A go mek dɛn klin na mi yay.

⁹ Ɛn a go de gladi fɔ yɛri dis siti in nem. I go bi prez ɛn glori to ɔl di neshɔn dɛm na wɔl, neshɔn dɛn we go yɛri bɔt ɔl di gud tin we a de du fɔ dɛm: dɛn go fred ɛn trimbul fɔseka ɔl di gud ɛn ɔl di jɛntri we a de provayd fɔ dɛm.

¹⁰ Na dis PAPA GƆD se: Na dis ples we yu tɔk bɔt se, ‘Na ɛmti ɛn yuslɛs ples we mɔtalman ɔ animal nɔ de de,’ dat na di siti dɛn na Juda ɛn di trit dɛn na Jerusɛlɛm we ɛmti ɛn yuslɛs we mɔtalman ɔ animal nɔ de de, dɛn go yɛri

¹¹ pipul dɛn de ɛnjɔy ɛn gladi gladi; ɔkɔ ɛn yawo go gladi gladi, yu go yɛri dɛn wan dɛm we de siŋ dɛn vɔys, we dɛn de briŋ tɛl Gɔd tɛnki ɔfrin dɛm kam na PAPA GƆD in os: ‘Tɛl PAPA GƆD Ɔlmayti tɛnki, bikɔs PAPA GƆD gud, bikɔs in lɔv we nɔ de chenj go de sote go!’ Bikɔs a go gi di land in jɛntri bak lɛk aw i bin de fɔstɛm. Na so PAPA GƆD se.

¹² “Na dis PAPA GƆD Ɔlmayti se: Na dis ples we dɛn se ɛmti ɛn yuslɛs we mɔtalman ɛn animal nɔ de, shɛpad dɛn go tap de bak de fid dɛn ship dɛn.

¹³ PAPA GƆD se, Na di il kɔntri, na di siti dɛm na di Shɛfɛla, di siti dɛm na Nɛgɛb, di Land ɔf Bɛnjamin, di ples dɛn we de rawnd Jerusɛlɛm, ɛn di siti dɛm na Juda, ship dɛn go pas ɔnda di wan we de kɔnt dɛn in an.

¹⁴ PAPA GƆD se, ‘Di tɛm de kam we a go du ɔl wetin a prɔmis Izrɛl ɛn Juda.

¹⁵ Dɛn dez dɛn de ɛn da patikla tɛm de, A go mek wan grup we de waka tret wit mi bɔsawt fɔseka Devid; ɛn i go trit ɔlman di sem ɛn go waka tret na di land.

¹⁶ Dɛn tɛm dɛn de, dɛn go sev; Juda ɛn Jerusɛlɛm go sikiɔ. Ɛn na di nem dis we dɛn go de kɔl am: Na PAPA GƆD na wi Raychɔsnɛs.’

¹⁷ “Bikɔs na dis PAPA GƆD se: Devid nɔ go ɛva de i nɔ gɛt pɔsin we fɔ sidɔm na di tɔŋn na Izrɛl,

¹⁸ ɛn di Lɛvitikal man we de mek sakrifays fɔ pipul sin dɛn nɔ go ɛva de dɛn nɔ gɛt pɔsin bifo mi fɔ mek bɔn sakrifays, sid ɔfrin ɛn fɔ de mek sakrifays sote go.”

¹⁹ PAPA GƆD in wɔd kam to Jɛrimaya:

²⁰ “Na dis PAPA GƆD se: if una kin brok mi Kɔvinant wit santɛm ɛn mi Kɔvinant wit nɛt, so dat de ɛn nɛt nɔ go kam di tɛm we dɛn fɔ kam,

²¹ we min se una kin brok mi Kɔvinant wit Devid we na mi wokman, so dat i nɔ go gɛt bɔypikin fɔ sidɔm nain tron, ɛn di Lɛvitikal man we de mek sakrifays fɔ pipul sin we de minista to mi.

²² Lɛkɛ aw pɔsin nɔ go ebul kɔnt di tin dɛn we de ɔp di klawd, ɛn lɛk aw pɔsin nɔ go ebul kɔnt di sansan na di si, na so a go mɔltiplay Devid we na mi wokman, in disɛndant dɛm, ɛn di Lɛvitikal man we de mek sakrifays fɔ pipul sin dɛn we de minista to mi, dɛn disɛndant dɛn.”

²³ PAPA GƆD in wɔd kam to Jɛrimaya:

²⁴ “Yu nɔ yɛri we dɛn pipul dɛn ya de tɔk se, ‘PAPA GƆD dɔn drɛb di tu fambul dɛm we i bin dɔn pik’? Dɛn dɔn so luk mi pipul dɛm wit fɔni yay dat dɛn nɔ tan lɛk neshɔn to dɛm igin.

²⁵ Na dis PAPA GƆD se: If a nɔ bin dɔn mek mi Kɔvinant wit de ɛn nɛt, ɛn di lɔ dɛn we de kɔntrol ɛvin ɛn ath,

²⁶ datɛnde, a bin fɔ pul an pan Jekob ɛn Devid we na mi wokman dɛn disɛndant dɛm, ɛn a nɔ go pik wan pan in disɛndant dɛn fɔ rul Ebram, Ayzak ɛn Jekob dɛn sid. Bikɔs a go gi dɛm dɛn jɛntri bak, ɛn a go sho dɛn masi.”