Jɛrimaya 30 - Krio Fɔs Oli Baybul

Di Prɔmis we PAPA GƆD Prɔmis In Pipul Dɛm

¹ Di wɔd we PAPA GƆD sɛn to Jɛrimaya.

² “Na dis PAPA GƆD we na Izrɛl dɛn Gɔd se: Rayt ɔltin we a dɔn tɛl yu na buk.

³ PAPA GƆD se, Bikɔs di tɛm de kam we a go gi mi pipul dɛm we na Izrɛl ɛn Juda, dɛn jɛntri bak, ɛn a go briŋ dɛm kam bak na di land we a bin gi dɛn fɔstɛmpapa dɛm, ɛn dɛn go tek am fɔ dɛnsɛf.”

⁴ Na so PAPA GƆD se bɔt Izrɛl ɛn Juda:

⁵ “Na dis PAPA GƆD se: Wi dɔn yɛri di fred fred ala, bad bad fred fred, ɛn nɔn kolat nɔ de.

⁶ Aks naw, ɛn no, if man go ebul bɔn pikin? Wɛl wetindu a de si ɔl dɛn man dɛn de put dɛn an na dɛn wes lɛkɛ uman we de in lebɔ? Wetindu ɔlman fes pel so?

⁷ Ey! Da de de go so big nɔn ɔda de nɔ go tan lɛk am; na tɛm fɔ Jekob fɔ sɔfa; bɔt stil, a go sev am.

⁸ PAPA GƆD Ɔlmayti se, “I go apin da de de se, a go brok di chen kɔmɔt na dɛn nɛk, ɛn a go fri dɛm, ɛn trenja dɛn nɔ go tek dɛn mek bɔy igen

⁹ Bɔt dɛn go sav PAPA GƆD we na dɛn Gɔd, ɛn Devid we na dɛn kiŋ, we a go gi dɛm.

¹⁰ PAPA GƆD se, so nɔ fred natin. Yu Jekob we na mi wokman, ɛn unasɛf Izrɛl nɔ pwɛlat; bikɔs a ebul sev una ivin we a de fa, ɛn a ebul sev una pikin dɛn kɔmɔt na di land we dɛn mek dɛm slev. Jekob go tɔmbak kam ɛn i go gɛt kolat ɛn alafia, ɛn nɔbɔdi nɔ go gi am kɔtat.

¹¹ PAPA GƆD se, bikɔs a de wit yu fɔ sev yu; A go nyakanyaka ɔl di neshɔn dɛm we a skata una, bɔt as fɔ una, a nɔ go nyakanyaka una. A go disiplin una bay aw una de biev, ɛn natin nɔ go mek a nɔ pɔnish una.

¹² “Bikɔs na dis PAPA GƆD se: Di pen we una gɛt na una at, nɔ de mɛn, ɛn una wund dɛn dip.

¹³ Nɔbɔdi nɔ de fɔ fɛt una kes, mɛrɛsin nɔ de fɔ mɛn una wund, una nɔ go tek mɛn.

¹⁴ Ɔl una lɔva dɛm dɔn fɔgɛt una; dɛn nɔ bisin bɔt una; bikɔs a dɔn trit una di we pɔsin go trit in ɛnimi, di pɔnishmɛnt we pɔsin we nɔ gɛt masi go gi in ɛnimi, bikɔs una gilti bad bad wan, bikɔs una sin pasmak.

¹⁵ Wetin du una de kray bɔt una pen? Una pen nɔ de mɛn. Na bikɔs una gilti bad bad wan, ɛn bikɔs yu sin pasmak, mek A du dɛn tin ya to una.

¹⁶ Fɔseka dat, dɛn go kil ɔl di wan dɛn we kil una ɛn ɔl una ɛnimi dɛm go go tɔn slev; wan nɔ go lɛf; dɛn go tif ɔl di wan dɛn we tif una, ɛn a go sɔprɛs ɔl dɛn wan dɛn we sɔprɛs una.

¹⁷ PAPA GƆD se, Bikɔs a go gi una, una wɛlbɔdi bak ɛn a go mɛn una wund dɛm, bikɔs dɛn dɔn kɔl yu awtkast: ‘Na Zayɔn, we nɔbɔdi nɔ bisin bɔt!’

¹⁸ Na dis PAPA GƆD se: A de tɛl una, a go gi Izrɛl dɛn jɛntri bak, ɛn sɔri fɔ in pipul dɛm; a go bil di siti bak pantap in il, ɛn di kiŋ in os go tinap bak di say we i bin de.

¹⁹ Nainsay dɛm, tɛl PAPA GƆD tɛnki siŋ, dɛn go kɔmɔt, ɛn dɛn wan dɛm vɔys we gladi. A go mek dɛn plɛnti, ɛn dɛn nɔ go bi tu tri nɔmɔ; A go mek dɛm gɛt rɛspɛkt, ɛn dɛn nɔ go smɔl.

²⁰ Dɛn pikin dɛm go de lɛkɛ aw dɛm bin de lɔntɛm, ɛn dɛn go gɛda bifo mi; ɛn a go pɔnish ɔl dɛn wan dɛm we sɔprɛs dɛm.

²¹ Dɛn bigman go bi wan pan dɛm, dɛn rula go kɔmɔt pan dɛm; A go mek i kam nia mi, ɛn i go kam mit mi, bikɔs udat kres fɔ kam mit mi we a nɔ kɔl am? Na so PAPA GƆD se.

²² Ɛn una go bi mi pipul, ɛn mi go bi una Gɔd.”

²³ Luk, PAPA GƆD in tinada! I dɔn vɛks, wayl briz de blo; i go bɔs pan dɛn wikɛd pipul dɛn ed.

²⁴ PAPA GƆD in bad bad vɛksteshɔn nɔ go tɔn bak sote i dɔn du ɛn kɔmplit wetin i plan fɔ du. Leta, una go ɔndastand dis.