Jɛrimaya 29 - Krio Fɔs Oli Baybul

Di Lɛta we Jɛrimaya Rayt to di Ju Dɛm na Babilɔn

¹ Na dis Jɛrimaya we na prɔfɛt bin rayt insay di lɛta we i sɛn kɔmɔt Jerusɛlɛm go to di bigman dɛm pan di wan dɛm we bin de ɛgzayl, ɛn to di man dɛm we de mek sakrifays fɔ pipul sin, di prɔfɛt dɛm, ɛn ɔl di pipul dɛm we Nɛbyukadnɛza bin dɔn kɛr go ɛgzayl na Babilɔn, kɔmɔt Jerusɛlɛm.

² Dis na bin afta kiŋ Jɛkonaya, ɛn di kwin mami, di okobo dɛm, di bigman dɛm na Juda ɛn Jerusɛlɛm, di man dɛn we de mek tiŋs wit dɛn an, di goldsmit ɛn blaksmit dɛm, bin dɔn kɔmɔt Jerusɛlɛm.

³ Na Ilasa we na Shafan in bɔypikin, ɛn Gɛmaria we na Ilkaya in bɔypikin, bin kɛr di lɛta go, dat na Ilkaya we Zɛdikaya we na kiŋ na Juda, bin sɛn to Nɛbyukadnɛza we na kiŋ na Babilɔn. Di lɛta se:

⁴ “Na dis PAPA GƆD Ɔlmayti we na Izrɛl dɛn Gɔd de se to ɔl di wan dɛn we de ɛgzayl we a sɛn kɔmɔt Jerusɛlɛm go ɛgzayl na Babilɔn:

⁵ Una bil os dɛm ɛn tap de; una plant gadin ɛn it wetin gro de.

⁶ Una mared uman dɛm ɛn bɔn bɔy ɛn gyal pikin dɛm; una mared uman dɛm fɔ una bɔypikin dɛm ɛn gi una gyal pikin dɛm mek dɛn mared dɛm, so dat dɛn go bɔn bɔypikin ɛn gyal pikin dɛm; una fɔ bɔn bɔku mek una go bɔku mɔ, bikɔs nɔto ridyus una fɔ ridyus.

⁷ Du ɔltin fɔ ɛp di siti we a dɔn sɛn una go ɛgzayl, ɛn pre to PAPA GƆD fɔ am, bikɔs na we di siti bɛtɛ, unasɛf go gɛt ɔl wetin una want.

⁸ Bikɔs na dis PAPA GƆD Ɔlmayti we na Izrɛl dɛn Gɔd se: Una nɔ gri lɛ una prɔfɛt dɛm ɛn lukgrɔn man dɛm we de wit una, lay gi una, ɛn una nɔ lisin to dɛn drim dɛm we dɛn de drim,

⁹ bikɔs na lay lay prɔfisi dɛn de gi unainsay mi nem; a nɔ sɛn dɛm. Na so PAPA GƆD se.

¹⁰ “Bikɔs na dis PAPA GƆD se: wɛn sɛvinti ia dɔn fɔ Babilɔn, a go kam to una ɛn go du wetin a prɔmis se a go du fɔ una ɛn briŋ una kam bak na dis ples.

¹¹ PAPA GƆD se, bikɔs A no de plan dɛm we A gɛt fɔ una, plan dɛm fɔ una bɛtɛ wan, fɔ mek una abop ɛn bɛtɛ bambay.

¹² Datɛnde, una go kɔl mi ɛn pre to mi, ɛn a go yɛri una.

¹³ Una go luk fɔ mi ɛn una go fɛn mi; we una luk fɔ mi wit ɔl una at,

¹⁴ una go fɛn mi ɛn a go gi una ɔl una jɛntri bak ɛn gɛda una kɔmɔt na ɔl di neshɔn dɛn ɛn ɔl di ples dɛn we a bin dɔn drɛb una go, ɛn a go briŋ una bak na di ples we a drɛb una kɔmɔt go ɛgzayl. Na so PAPA GƆD se.

¹⁵ “Bikɔs una dɔn se, ‘PAPA GƆD dɔn mek pipul dɛn prɔfɛt pan wi na Babilɔn,’–

¹⁶ Na dis PAPA GƆD se bɔt di kiŋ we sidɔm na Devid in tron, ɛn bɔt ɔl di pipul dɛn we tap na dis siti, una fambul dɛn we nɔ bin go ɛgzayl wit una:

¹⁷ Na dis PAPA GƆD Ɔlmayti se, A de sɛn wa, bad bad aŋri ɛn siknɛs pan dɛm, ɛn a go mek dɛm lɛkɛ stinkin fig we dɔn so rɔtin dat dɛn kyant it am.

¹⁸ A go mek wa, bad bad aŋri ɛn siknɛs de biɛn dɛm, ɛn a go mek dɛn pipul fɔ fred na ɔl di kɔntri dɛm na di wɔl. Pipul go shem fɔ de wit dɛm, dɛn nem nɔ go gɛt rɛspɛkt, dɛn go provok dɛm ɛn go bi pipul dɛn we gɛt swɛ, ɔlsay usay a go drɛb dɛn go,

¹⁹ PAPA GƆD se, bikɔs dɛn nɔ yɛri mi wɔd we a de sɛn mi wokman dɛn we na di prɔfɛt dɛn, fɔ tɛl dɛn ɔltɛm. Na so PAPA GƆD se.

²⁰ Una yɛri PAPA GƆD in wɔd, una ɔl we a drɛb kɔmɔt Jerusɛlɛm go ɛgzayl na Babilɔn:

²¹ ‘Na dis PAPA GƆD Ɔlmayti we na Izrɛl dɛn Gɔd, se bɔt Eab we na kolaya in bɔypikin, ɛn Zɛdikaya we na Maasɛya in bɔypikin we de yuz mi nem gi una lay lay prɔfisi: A de tɛl una, A go mek Nɛbyukadnɛza we na kiŋ na Babilɔn, kech dɛm ɛn kil dɛm bifo una.

²² Fɔseka dɛn, ɔl di wan dɛn we kɔmɔt ɛgzayl na Juda we de Babilɔn go de swɛ dis swɛ: “Lɛ PAPA GƆD mek yu tan lɛk Zɛdikaya ɛn Eab, we di kiŋ na Babilɔn bin ros na faya,”

²³ bikɔs dɛn dɔn mek dɛnsɛf fulish na Izrɛl, dɛn dɔn kɔmit adɔltri wit dɛn neba dɛm wɛf dɛm, ɛn dɛn dɔn tek mi nem tɔk laylay wɔd dɛm, we nɔto mi kɔmand dɛm fɔ du am. Na mi na di wan we no, ɛn na mi na di witnɛs. Na so PAPA GƆD se.’”

Lɛta fɔ Shemaya

²⁴ Yu fɔ tɛl Shemaya we kɔmɔt Nɛɛlam se;

²⁵ Na dis PAPA GƆD Ɔlmayti we na Izrɛl dɛn Gɔd, se: Yu dɔn sɛn lɛta wit yu yon nem to ɔl di pipul dɛn na Jerusɛlɛm, ɛn to Zɛfinaya we na Maasɛya we na man we de mek sakrifays fɔ pipul sin, in bɔypikin, ɛn to ɔl di man dɛn we de mek sakrifays fɔ pipul sin, se,

²⁶ ‘PAPA GƆD dɔn mek yu di man we de mek sakrifays fɔ pipul sin instɛd ɔf Jɛoayada we na man we de mek sakrifays fɔ pipul sin, fɔ de inchaj ɔf PAPA GƆD in os, oba ɔl dɛn krɛsman we de prɔfisay, fɔ put am na chen.

²⁷ So wetindu yu nɔ dɔn tɛlɔf Jɛrimaya we de Anatɔt we de prɔfisay to yu?

²⁸ Bikɔs i dɔn sɛn to wi na Babilɔn, se, “Una go de ɛgzayl lɔŋ; una bil os dɛm ɛn tap pan dɛm, una mek fam ɛn it wetin dɛn bia.” ’”

²⁹ Zɛfinaya we na man we de mek sakrifays fɔ pipul sin, rid dis lɛta bifo Jɛrimaya we na prɔfɛt.

³⁰ Nain PAPA GƆD in wɔd kam to Jɛrimaya se:

³¹ “sɛn to ɔl di wan dɛn we de ɛgzayl se, ‘Na dis PAPA GƆD se bɔt Shemaya we kɔmɔt Nɛɛlam: Bikɔs Shemaya dɔn prɔfisay to una we a nɔ bin sɛn am, ɛn i dɔn mek una biliv in lay lay,

³² fɔseka dat, na dis PAPA GƆD se: A de tɛl una, a go pɔnish Shemaya we kɔmɔt Nɛɛlam ɛn in bɔnshɔ; wan pan in bɔnshɔ nɔ go liv fɔ si di gud tin dɛn we a go du fɔ mi pipul dɛm, bikɔs i dɔn tɔk lɛk rebɛl agens PAPA GƆD. Na so PAPA GƆD se.’”