Jɛrimaya 28 - Krio Fɔs Oli Baybul

Jɛrimaya Ɛn Prɔfɛt Ananaya

¹ Insay da sem ia de, we Zɛdikaya we na kiŋ na Juda bin bigin rul, na di mɔnt we mek fayv, insay di ia we mek fo, Ananaya we na Azɔ, we na di prɔfɛt we kɔmɔt Gibɛɔn, in bɔypikin, tɔk to mi insay PAPA GƆD in os, bifo di man dɛm we de mek sakrifays fɔ pipul sin ɛn ɔl di pipul dɛn, se,

² “Na dis PAPA GƆD Ɔlmayti we na Izrɛl dɛn Gɔd se: A dɔn brok di kiŋ na Babilɔn in pawa.

³ Insay tu ia, a go briŋ ɔl di tin dɛn fɔ yuz na PAPA GƆD in os kam bak, we Nɛbyukadnɛza we na kiŋ na Babilɔn, bin tek kɔmɔt na dis ples kɛr go Babilɔn.

⁴ PAPA GƆD Ɔlmayti se, “A go briŋ Jɛkonaya we na Jɛoiakim we na kiŋ na Juda in bɔypikin, ɛn ɔl di wan dɛn we bin kɔmɔt Juda go ɛgzayl, bikɔs a go brok di kiŋ na Babilɔn in pawa.”

⁵ Nain Jɛrimaya we na prɔfɛt tɔk to Ananaya we na prɔfɛt bifo ɔl di man dɛm we de mek sakrifays fɔ pipul sin, ɛn ɔl di pipul dɛm we bin tinap insay PAPA GƆD in os;

⁶ Jɛrimaya we na prɔfɛt mɔk am ɛn se, “Emɛn! Lɛ PAPA GƆD du am; lɛ PAPA GƆD mek wetin yu dɔn prɔfisay, bi, ɛn mek i briŋ ɔl di tin dɛn fɔ yuz na PAPA GƆD in os ɛn ɔl dɛn wan dɛn we dɛn kɛr go ɛgzayl na Babilɔn, kam bak na ya.

⁷ Pan ɔl dat, lisin wetin a gɛt fɔ tɔk we yu ɛn ɔl di pipul dɛn go yɛri.

⁸ Dɛn prɔfɛt dɛm we bin dɔn de lɔlɔntɛm bifo yu ɛn mi, bin prɔfisay bɔt wa, bad bad aŋri, ɛn siknɛs pan bɔku bɔku kɔntri dɛm ɛn big big kindɔm dɛm

⁹ As fɔ di prɔfɛt we prɔfisay bɔt pis, we wetin da prɔfɛt de prɔfisay apin, datɛnde ɔlman go no se na PAPA GƆD sɛn da prɔfɛt de fɔ tru.”

¹⁰ Nain Prɔfɛt Ananaya pul di bod yok kɔmɔt na Jɛrimaya we na prɔfɛt in nɛk, ɛn brok brok dɛm.

¹¹ Nain Ananaya tɔk bifo ɔl di pipul dɛn se, “Na dis PAPA GƆD se: Na semweso a go brok Nɛbyukadnɛza we na kiŋ na Babilɔn in yok kɔmɔt na ɔl di neshɔn dɛn nɛk, insay tu ia.” Bɔt Jɛrimaya we na prɔfɛt bin go in we.

¹² Sɔm tɛm afta we Prɔfɛt Ananaya bin dɔn brok di bod yok kɔmɔt na Jɛrimaya we na prɔfɛt in nɛk, PAPA GƆD in wɔd bin kam to Jɛrimaya:

¹³ I se, “Go, tɛl Ananaya se:, ‘Na dis PAPA GƆD se: Yu dɔn brok di bod yok, bɔt instɛ ɔf bod yok, a go mek ayɛn yok.

¹⁴ Bikɔs na dis PAPA GƆD Ɔlmayti we na Izrɛl dɛn Gɔd se: A dɔn put ayɛn yok fɔ ad lebɔ na ɔl dɛn neshɔn ya dɛn nɛk fɔ wok fɔ Nɛbyukadnɛza we na kiŋ na Babilɔn, ɛn dɛn go sav am, bikɔs a dɔn ivin gi am dɛn animal na bush.’”

¹⁵ Nain Jɛrimaya we na prɔfɛt tɛl Prɔfɛt Ananaya se “Lisin, Ananaya, PAPA GƆD nɔ sɛn yu, ɛn yu dɔn mek dɛn pipul ya dɔn biliv pan lay lay.

¹⁶ Fɔseka dat, na dis PAPA GƆD se: ‘a go pul yu kɔmɔt na dis wɔl. Dis vɛri ia, yu go day, bikɔs yu dɔn tɔn agens PAPA GƆD bay wetin yu se.’”

¹⁷ Ananaya day insay di mɔnt we mek sɛvin da sem ia de.