Jɛrimaya 23 - Krio Fɔs Oli Baybul

Abop Fɔ Bambay

¹ “PAPA GƆD se, swɛ go mit dɛn shɛpad dɛn we de pwɛl ɛn skata mi ship dɛm.

² Fɔseka dat, na dis PAPA GƆD we na Izrɛl dɛn Gɔd se bɔt dɛn shɛpad dɛm we de kia fɔ mi pipul dɛm: “Una dɔn skata mi ship dɛm, ɛn una dɔn drɛb dɛm go, ɛn una nɔ atɛnd to dɛm. A de tɛl una, a go atɛnd to una fɔ di ivul tin dɛn we una du, na so PAPA GƆD se.

³ Dɔn a go gɛda di wan dɛn we lɛf pan mi ship dɛm kɔmɔt na ɔl di difrɛn kɔntri dɛm we a dɔn drɛb dɛm go, ɛn a go briŋ dɛm kam bak na dɛn os, ɛn dɛn go ebul bɔn ɛn dɛn go plɛnti.

⁴ A go put shɛpad dɛn oba dɛm, we go luk afta dɛm, ɛn dɛn nɔ go fred igen ɛn dɛn nɔ go pwɛlat, ɛn dɛn nɔn nɔ go lɔs, na so PAPA GƆD se.

⁵ PAPA GƆD se, “A de tɛl una se, di tɛm de kam we a go es wan branch na Devid in layn, we de waka tret na mi yay, ɛn i go ren as kiŋ ɛn go wok wit sɛns, ɛn i go trit ɔlman ikwali ɛn waka tret wit ɔlman na di land.

⁶ Nain tɛm Juda go sav, ɛn Izrɛl go liv de wit kolat. Ɛn na dis nem dɛn go kɔl am: ‘PAPA GƆD na wi tret waka.’

⁷ “PAPA GƆD se, fɔseka dat, a de tɛl una, di tɛm de kam we mɔtalman go lɛf fɔ de se, ‘Wans PAPA GƆD we pul Izrɛl kɔmɔt Ijipt, de,’

⁸ bɔt go de se, ‘Wans PAPA GƆD de we pul Izrɛl in jɛnareshɔn dɛm ɛn de bifo dɛn fɔ kɔmɔt na di nɔt kɔntri, ɛn ɔl di kɔntri dɛm we i bin dɔn drɛb dɛm go.’ Da tɛm de, dɛn go tap na dɛn yon land.”

Jɛrimaya In Mɛsej Bɔt di Prɔfɛt Dɛm

⁹ As fɔ di prɔfɛt dɛn yon: Mi at pwɛl, mi bɔdi de trimbul; mi na lɛkɛ drɔnkɔman, lɛkɛ man we rɔm dɔn chak, fɔseka PAPA GƆD ɛn fɔseka in oli wɔd.

¹⁰ Bikɔs di land ful wit pipul dɛn we de kip pipul man ɛn wɛf; di land de munin fɔseka di swɛ, ɛn di say dɛn we plɛnti gras de gro fɔ fid animal na di dray ɛn ɛmti ples, dɔn dray. Ɔl wetin dɛn de du, ivul, ɛn dɛn de misyuz dɛn pawa.

¹¹ PAPA GƆD se, “Di prɔfɛt dɛm ɛn di man dɛm we de mek sakrifays fɔ pipul sin, dɛn ɔngɔdli, se Gɔd Ɔlmayti, ivin na mi os, a dɔn si dɛn wikɛdnɛs de.

¹² Fɔseka dat, dɛn wanol layf go tan lɛkɛ slipul rod na dak ples, we na de dɛn go push dɛn go fɔdɔm; bikɔs a go mek bad bad tin mit dɛm we di tɛm kam fɔ dɛn fɔ gɛt dɛn pɔnishmɛnt, na so PAPA GƆD se.

¹³ A si wan bad abit pan di prɔfɛt dɛn na Sameria: dɛn de tek Beal in nem prɔfisay ɛn mek mi pipul dɛn we na Izrɛl, go astre.

¹⁴ As fɔ di prɔfɛt dɛn na Jerusɛlɛm, a si bad bad tin pan dɛn we nɔ fayn fɔ du: dɛn de kɔmit lidɔm wit dɛn kɔmpin wɛf ɛn dɛn lay dɛn kayn nɔ de; dɛn de ɛp dɛn wan we de du bad, we mek nɔbɔdi nɔ de chenj kɔmɔt pan in wikɛd we; dɛn ɔl dɔn tan lɛkɛ Sɔdɔm to mi, ɛn di pipul dɛm we tap de, tan lɛkɛ Gɔmɔra.

¹⁵ Fɔseka dat, na dis PAPA GƆD Ɔlmayti se bɔt di prɔfɛt dɛm: “Biliv mi, a go fid dɛm wit wɔm wud ɛn gi dɛm wata we gɛt pɔyzin fɔ drink; bikɔs na frɔm dɛn di prɔfɛt dɛm na Jerusɛlɛm ɔngɔdlinɛs kɔmɔt prɛd na di land.”

¹⁶ Na dis PAPA GƆD Ɔlmayti se: “Una nɔ lisin wetin di prɔfɛt prɔfisay to una, fɔ mek una jɛs de abop fɔ natin; na wetin de na dɛn maynd dɛn de tɔk, nɔto wetin PAPA GƆD se.

¹⁷ Dɛn de tɛl dɛn wan dɛm we nɔ biliv PAPA GƆD in wɔd ɔltɛm se, “Ɔltin go fayn fɔ yu’; ɛn kin tɛl dɛn wan dɛn we nɔ de gri du wetin PAPA GƆD se, bɔt de fala dɛn yon at, se, ‘Nɔn bad tin nɔ go mit una.’”

¹⁸ Bikɔs us wan pan dɛm dɔn de na PAPA GƆD in kansul wande fɔ ɔndastand ɛn yɛri in wɔd, ɔ us wan pan dɛm dɔn put at ɛn lisin in wɔd?

¹⁹ A de tɛl una, PAPA GƆD in tinada de blo! Bad bad veksteshɔn dɔn sho, ebi briz we de tɔn rawnd;; i go bɔs na dɛn wikɛd pipul dɛn ed.

²⁰ PAPA GƆD in veksteshɔn nɔ go tap sote i dɔn du ɛn kɔmplit wetin I plan nain maynd fɔ du. Leta, una go ɔndastand am klia wan.

²¹ “A nɔ sɛn di prɔfɛt dɛm, bɔt dɛn rɔn go; a nɔ tɔk to dɛm bɔt dɛn prɔfisay.

²² Bɔt if dɛn bin dɔn de na mi kansul datɛnde na wetin a se dɛm bin fɔ tɛl mi pipul dɛm, ɛn dɛn bin fɔ dɔn chenj kɔmɔt pan dɛn ivul we, ɛn kɔmɔt pan di ivul tin dɛn we dɛn de du.

²³ “PAPA GƆD se, mi na Gɔd we de nia ɛn nɔto Gɔd we a de fa?

²⁴ PAPA GƆD se, Ɛnibɔdi go ebul ayd insɛf na ɛni sikrit ples we a nɔ go ebul si am? A nɔ de ɔlsay na wɔl?

²⁵ A dɔn yɛri wetin di prɔfɛt dɛm we de tek mi nem prɔfisay lay lay prɔfisay, se, we dɛn de se, ‘A drim, A drim!

²⁶ Aw lɔŋ lay lay go de insay dɛn prɔfɛt dɛn at, we de prɔfisay lay lay ɛn we de tɔk wetin dɛn at se fɔ de disiv pipul,

²⁷ we de tink fɔ mek mi pipul dɛm fɔgɛt mi nem bay di drim we dɛn de tɛl dɛn kɔmpin, jɛs lɛk aw dɛn fɔstɛmpapa dɛm fɔgɛt mi nem fɔseka Beal?

²⁸ PAPA GƆD se, Lɛ di prɔfɛt we drim, tɔk bɔt di drim, bɔt lɛ di wan we gɛt mi wɔd, prich mi wɔd wit ɔl in at. Ɛnitin de pan strɔ we mek in ɛn wit fiba?

²⁹ PAPA GƆD se, mi wɔd nɔto lɛkɛ faya, ɛn lɛkɛ ama we de brok rɔk pis pis?

³⁰ PAPA GƆD se, Fɔseka dat, a de agens di prɔfɛt dɛm we de tif mi wɔd na dɛn kɔmpin mɔt.’

³¹ PAPA GƆD se, a de agens di prɔfɛt dɛm we de opin dɛn mɔt tɔk se, ‘Na PAPA GƆD se.’

³² PAPA GƆD se, a de agens dɛn wan dɛm we de prɔfisay wit lay lay drim, we de lay gi dɛm ɛn mek mi pipul dɛn go astre bay dɛn lay lay ɛn dɛn rɛklɛsnɛs, we a nɔ sɛn dɛm ɔ nɔ pik dɛm; we yu luk am, dɛn nɔ de ɛp dɛn pipul dɛn ya at ɔl.

PAPA GƆD in Lod

³³ Wɛn wan pan dɛn pipul ya, ɔ prɔfɛt, ɔ man we de mek sakrifays fɔ pipul sin, aks yu se, ‘Wetin na PAPA GƆD in lod? Yu fɔ tɛl dɛn se, ‘Na yu na di Lod’ ɛn a go trowe yu. Na so PAPA GƆD se.’

³⁴ Ɛn as fɔ ɛni prɔfɛt, ɔ man we de mek sakrifays fɔ pipul sin, ɔ wan pan di pipul dɛn we go opin in mɔt tɔk se, ‘PAPA GƆD in lod,’ a go pɔnish da man de ɛn ɔl udat de nain os.

³⁵ Bifo dat, na so ɔlman go de aks in neba, ɛn in brɔda, ‘Wetin PAPA GƆD ansa se?’ Ɔ ‘Wetin PAPA GƆD se?’

³⁶ Bɔt una nɔ fɔ tɔk di wɔd, PAPA GƆD in lod’ igen igen, bikɔs di lod na ɔlman wɔd, ɛn una de kɔrɔpt PAPA GƆD we de alayv, we na PAPA GƆD Ɔlmayti, we na wi Gɔd, in wɔd.

³⁷ Na so yu go aks di prɔfɛt dɛm, ‘Wetin PAPA GƆD ansa yu se? Ɔ ‘Wetin PAPA GƆD se?’

³⁸ Bɔt if una tɔk se, ‘PAPA GƆD in lod,’ na dis PAPA GƆD se, ‘Bikɔs yu dɔn tɔk dɛn wɔd ya, “PAPA GƆD in Lɔd,” wɛn a sɛn to yu se una se, “Una nɔ fɔ tɔk se, PAPA GƆD in Lɔd,”

³⁹ fɔseka dat, fɔ tru tru, a go es una ɛn trowe una kɔmɔt bifo mi, una ɛn di siti we a gi una ɛn una fɔstɛmpapa dɛm.

⁴⁰ Ɛn a go briŋ ɛvalastin disgres ɛn shem ɔltɛm pan una, we nɔbɔdi nɔ go ɛva fɔgɛt.”