Jɛrimaya 22 - Krio Fɔs Oli Baybul

Jɛrimaya in Mɛsej we I gi di Kiŋ Os na Juda

¹ Na dis PAPA GƆD se: “Go na di kiŋ na Juda in os, ɛn tɔk dɛn wɔd ya de,

² se, ‘Yɛri PAPA GƆD in wɔd, yu kiŋ na Juda, we sidɔm na Devid in tron, yu ɛn yu wokman dɛm, ɛn yu pipul dɛn we de pas na dɛn get ya.

³ Na dis PAPA GƆD se: Trit ɔlman ikwali ɛn waka tret na PAPA GƆD in yay, ɛn pul di pɔsin we dɛn dɔn tif kɔmɔt na di wan we de sɔprɛs am in an. Nɔ trit fɔrina, pikin we in papa dɔn day ɛn uman we in man dɔn day, bad ɔ wit Vayolɛns, ɛn nɔ kil pɔsin we inosɛnt.

⁴ Bikɔs, if una obe dis wɔd fɔ tru tru, datɛnde una go pas na di get dɛm go insay di os, una di kiŋ dɛm we de sidɔm na Devid in tron, de rayd ɔs ɛn karej, dɛm ɛn dɛn wokman dɛm ɛn dɛn pipul dɛm.

⁵ PAPA GƆD se, Bɔt if una nɔ lisin dɛn wɔd ya, A swɛ bay misɛf, dis os go tɔn ples we nɔbɔdi nɔ de.

⁶ Bikɔs na dis PAPA GƆD se bɔt di kiŋ na Juda in os. “Yu tan lɛk Giliad to mi, lɛk di il na Libanɔn in pantap, fɔ tru tru, a go mek yu tɔn ɛmti ples we pɔsin nɔ go ebul tap, dat na siti we nɔbɔdi no tap.

⁷ A go mek pipul dɛn we de nyakanyaka fɔdɔm pam una, ɔlman wit in wɛpɔn dɛm; ɛn dɛn go kɔt una bɛst sida tik dɛm, ɛn trowe dɛm na faya.

⁸ “Ɛn bɔku neshɔn dɛm go pas bay dis siti ɛn ɔlman go aks in kɔmpin se, “wetin mek PAPA GƆD dil wit dis big siti so?”

⁹ Ɛn dɛn go ansa se, “Na bikɔs dɛn fɔsek PAPA GƆD we na dɛn Gɔd in Kɔvinant ɛn go wɔship ɛn sav ɔda gɔd dɛm.” ’”

Jɛrimaya in Mɛsej bɔt Joaaz

¹⁰ Nɔ kray fɔ pɔsin we dɔn day, nɔ sɔri fɔ am; bɔt kray bita bita wan fɔ udat go, bikɔs i nɔ go kam bak igen fɔ kam si in kɔntri we i bɔn.

¹¹ Bikɔs, na dis PAPA GƆD se bɔt Joaaz, we na Josaya we na kiŋ na Juda in bɔypikin, we bin ren instɛd ɔf in papa Josaya, ɛn we bin kɔmɔt na dis ples: I se, “I go kam na ya igen,

¹² bɔt na di ples we dɛn kapchɔ am go, i go day, ɛn i nɔ go si dis land igen.

Jɛrimaya in Mɛsej Bɔt Jɛoiakim

¹³ “Swɛ go mit di wan we bil in wan flat os bay we i nɔ waka tret na PAPA GƆD in yay, ɛn bil garɛt os bay we i nɔ de trit pipul dɛn ikwali; in we mek in neba wok fɔ am fɔ natin, ɛn nɔ gi am in pe;

¹⁴ in we se, ‘A go bil big os fɔ misɛf wit big big rum dɛm ɔpstiaz,’ ɛn mek dɛn winda dɛm fɔ am, wit sida bod, ɛn pent am wit rɛd pent.

¹⁵ Yu tink se yu na kiŋ bikɔs yu de bil wit sida bod lɛk yu kɔmpin? Yu fɔstɛmpapa dɛn nɔ bin de it ɛn drink, ɛn trit ɔlman ikwali ɛn waka tret na PAPA GƆD in yay? Da tɛm de, ɔltin bin fayn fɔ am.

¹⁶ PAPA GƆD se, I gi fia jɔjmɛnt to po pipul; da tɛm de ɔltin bin fayn. Dat nɔ sho yu se i no mi?

¹⁷ Bɔt yu gɛt yay ɛn at fɔ rog pipul dɛn nɔmɔ, fɔ shɛd inosɛnt blɔd, ɛn fɔ sɔprɛs ɛn fɛt pipul.”

¹⁸ Fɔseka dat na dis PAPA GƆD se bɔt Jɛoiakim we na Josaya, we na kiŋ na Juda, in bɔypikin: “Dɛn nɔ go kray fɔ am, lɛk we dɛn kin se, ‘E mi brɔda!’ Ɔ ‘E mi sista!’ Dɛn nɔ go kray fɔ am, lɛk we dɛn kin se ‘E mi masta! Ɔ ‘A iz majɛsti!’

¹⁹ “Dɛn go bɛr am lɛkɛ aw dɛn kin bɛr dɔŋki, we dɛn kin drɛg go trowe na do fa frɔm di get dɛn na Jerusɛlɛm.’

Jɛrimaya in Mɛsej bɔt Wetin Go Apin To Jerusɛlɛm

²⁰ “Go na Libanɔn, ɛn ala tɛl dɛn, ɛn es yu vɔys na Beshan; tinap na Abarim ala, bikɔs dɛn dɔn kil ɔl yu lɔva dɛm.

²¹ A bin tɔk to yu wɛn yu bin jɛntri, bɔt yu bin se, ‘A nɔ go lisin.’ Na so yu tan frɔm we yu yɔŋ, yu nɔ du wetin a se.

²² Na briz go bi yu shɛpad, dɛn yon shɛpad dɛm, ɛn dɛn go kapchɔ yu lɔva dɛn go tɔn dɛm slev; dɛn yu go shem ɛn kɔnfyus bikɔs ɔf ɔl yu wikɛdnɛs.

²³ Yu, una we tap na Libanɔn midul dɛn sida tik dɛm, wɛn di pen kam pan una, una go ala nɔto kɔmɔn, i go tan lɛk da pen we uman kin fil we i de bɔn!”

PAPA GƆD in Jɔjmɛnt pan Jɛoiachin

²⁴ PAPA GƆD se, as lɔŋ as a de alayv, ɔldo na Jɛoiachin, we na Jɛoiakim, kiŋ na Juda in bɔypikin na bin di riŋ na mi an we a de tek sayn, a go stil rut una kɔmɔt na mi an,

²⁵ ɛn gi una to dɛn wan we wan kil una, dɛn wan we una de fred, dat na Nɛbyukadnɛza we na kiŋ na Babilɔn ɛn dɛn Babilonian dɛm.

²⁶ A go fos una ɛn una mami we bɔn una, fɔ go na ɔda kɔntri we nɔto de una bɔn, ɛn na de una go day.

²⁷ Bɔt di land we dɛn aŋri fɔ go bak, dɛn nɔ go go igen.”

²⁸ Nain a se, dis man, Jɛoiachin, dɔn tɔn broko pɔt, tin we nɔbɔdi nɔ bisin bɔt? Wetindu yu de tot in ɛn in pikin dɛm, trowe dɛm na land we dɛn nɔ no?

²⁹ E land, land, land, yɛri PAPA GƆD in wɔd!

³⁰ Na dis PAPA GƆD se: “Rayt an dɔŋ se dis man nɔ gɛt pikin, se na man we nɔ go ɛva bɛtɛ na layf; bikɔs nɔn pan in pikin dɛn nɔ go ɛva sidɔm na Devid in tron, ɛn rul Juda.”