Jɛrimaya 21 - Krio Fɔs Oli Baybul

¹ Na di wɔd dis we kam to Jɛrimaya, we kɔmɔt to PAPA GƆD di tɛm we kiŋ Zɛdikaya bin sɛn Pashɔ, we na Malkaya in bɔypikin, ɛn Zɛfinaya we na di man we de mek sakrifays fɔ pipul sin, we semweso na bin Maasɛaya in bɔypikin, to am se,

² “Fɛnɔt to PAPA GƆD fɔ wi, bikɔs Nɛbyukadnɛza we na kiŋ na Babilɔn de mek wa pan wi; sɔntɛnde, PAPA GƆD go yuz ɔl in wɔndaful tin dɛn we i kin du, fɔ ɛp wi, ɛn i go mek i fred fɔ fɛt wi.”

³ Nain Jɛrimaya tɛl dɛn se:

⁴ “Go tɛl Zɛdikaya se, ‘Na dis PAPA GƆD we na Izrɛl dɛn Gɔd se: A go gɛda ɔl di wɛpɔn dɛm fɔ fɛt wa, we de na una an, we una de yuz fɔ fɛt di kiŋ na Babilɔn, ɛn di Babilonian dɛm we sɔrawnd una na do na una wɔl dɛm; ɛn a go briŋ dɛm ɔl kam put na di siti sɛnta.

⁵ Na misɛf sɛf go fɛt una wit mi traŋa an we opin, wit vɛksteshɔn ɛn ɔt tɛmpa, ɛn wit bad bad wamat.

⁶ Ɛn a go kil ɔl dɛn wan dɛm we tap na dis siti, dat na mɔtalman ɛn animal; na ebi ebi siknɛs go kil dɛm.

⁷ PAPA GƆD se, afta dat, A go mek Nɛbyukadnɛza we na kiŋ na Babilɔn, we na Zɛdikaya dɛn ɛnimi dɛn we de tray fɔ kil dɛm, ebul kapchɔ Zɛdikaya we na kiŋ na Juda, ɛn in wokman dɛm, ɛn ɔl di pipul dɛn na dis siti we nɔ day di tɛm we siknɛs, wa ɛn bad bad aŋri bin mit dɛm; Nɛbyukadnɛza go kil dɛm wit sɔd; i nɔ go luk nɔbɔdi ɛn sɔri fɔ am, ɔ lɛf ɛnibɔdi ɔ fil nain at fɔ nɔbɔdi.

⁸ “Yu go tɛl dɛn pipul ya se: ‘Na dis PAPA GƆD se: A de sho una wetin pɔsin go du fɔ gɛt lɔŋ layf ɛn wetin pɔsin go du we i go day.

⁹ Udat nɔ gri kɔmɔt na di siti go day na wa, ɔ wit bad bad aŋri ɔ siknɛs; bɔt udat go na do go sɔrɛnda to di Babilonian dɛm we sɔrawnd una, nɔ go day, ɛn i go gɛt in layf fɔ in prayz na wa.

¹⁰ PAPA GƆD se, bikɔs a dɔn tɔn mi fes to dis siti fɔ bad, ɛn nɔto fɔ gud; a go mek di kiŋ na Babilɔn kapchɔ am, ɛn i go bɔn am wit faya?

¹¹ “Ɛn tɛl di kiŋ na Juda in os se, ‘Yɛri PAPA GƆD in wɔd,

¹² Yu Devid in os! Na dis PAPA GƆD se: “kɛri awt jɔstis na mɔnin, ɛn sev pipul dɛn kɔmɔt na di wan dɛn we de sɔprɛs dɛm, dɛn an, in we dɛn dɔn tif, if nɔ so, mi vɛksteshɔn go mit dɛm lɛk faya, ɛn bɔn, we nɔbɔdi nɔ go ebul ɔt am, fɔseka di ivul tin dɛm we una de du.’”

¹³ PAPA GƆD se, “Biliv mi, a de agens una we tap na di vali, Yu rɔk na flat grɔn, yu we de se, ‘udat go kam dɔŋ kam fɛt wi, ɔ udat go kam usay wi tap?’

¹⁴ PAPA GƆD se, A go pɔnish una bay wetin una du; A go layt faya insay in fɔrɛst, ɛn i go bɔn ɔl wetin de rawnd am.”