Jɛrimaya 2 - Krio Fɔs Oli Baybul

Aw PAPA GƆD Bisin Bɔt Izrɛl

¹ PAPA GƆD in wɔd kam to mi se,

² “Go anawns na Jerusɛlɛm lɛ ɔlman yɛri, se, Na so PAPA GƆD se, A mɛmba aw una nɔ bin tek mi mek jok we una bin yɔŋ, di lɛk we una bin lɛk mi lɛk nyu yawo, aw una bin de biɛn mi na di dray ɛn ɛmti ples, land we dɛn nɔ plant wande.

³ Izrɛl bin oli to PAPA GƆD, dɛn na bin di fɔs frut dɛn na di avɛst. Ɔl di wan dɛn we it pan am bin gilti stret; bad bad tin bin mit dɛm, na so PAPA GƆD se.

⁴ Una yɛri PAPA GƆD in wɔd, yu Jekɔb in os, ɛn ɔl di difrɛn famili dɛn na Izrɛl.

⁵ Na dis PAPA GƆD se: “Us rɔŋ tin una papa dɛm bin fɛnɔt se a du, we mek dɛn bin go fa kɔmɔt nia mi, ɛn go fala wɔtlɛs layf ɛn tɔn wɔtlɛs pipul?

⁶ Dɛn nɔ bin se, “We PAPA GƆD we bin fɛt pul wi kɔmɔt na Ijipt, we bin de bifo wi na di dray ɛn ɛmti ples, land we na so so ɛmti ples we pipul nɔ ebul tap wit dip dip ol dɛm, land we dak bad bad wan ɛn wata nɔ de, land we pipul dɛn nɔ de pas kɔmɔt wan say go ɔda say, ples we nɔbɔdi nɔ tap?’

⁷ Ɛn a briŋ una kam na land we plɛnti de fɔ it, mek una go ɛnjɔy di frut dɛm ɛn di gud tin dɛm. Bɔt wɛn una bin kam de, una dɔti di land na mi yay, ɛn mek di tin we a gi una tɔn bad bad tin we a et.

⁸ Di man dɛm we de mek sakrifays fɔ pipul sin nɔ bin aks se, ‘We PAPA GƆD?’ Dɛn wan dɛn we de andul di lɔ nɔ bin no mi; di rula dɛn sin agens mi; di prɔfɛt dɛn bin de prɔfisay se na Beal tɛl dɛn so, ɛn dɛn bin put at pan tin dɛn we nɔ go mek dɛn bɛtɛ.

PAPA GƆD In Kes Agens In Pipul

⁹ PAPA GƆD se, “Fɔseka dat, a go stil fɛt una, ɛn a go mek kes agens una pikin dɛn pikin dɛm.

¹⁰ Krɔs go na di kos dɛn na Sayprɔs go si, ɔ sɛn go Keda mek dɛn tek tɛm aks gud, ɛn si if ɛnitin lɛk dat dɔn apin bifo.

¹¹ Neshɔn de we dɔn chenj in gɔd dɛm, ɔl we dɛn nɔto tru tru gɔd dɛm? Bɔt mi pipul dɛn dɔn chenj dɛn glori, fɔ tin we nɔ de bɛnifit nɔbɔdi.

¹² PAPA GƆD se Lɛ wetin apin shɔk una di skay dɛm lɛ i shɔk una, mek una wɔnda te una nɔ no wetin fɔ du,

¹³ bikɔs mi pipul dɛn dɔn du tu bad bad tin; dɛn dɔn fɔsek mi, we na di say we wata we de gi layf de kɔmɔt, ɛn dɛn dɔn dig wɛl dɛm fɔ dɛnsɛf, wɛl dɛn we broko broko we nɔ de ol wata.

¹⁴ “Izrɛl na slev? Na aws bɔy usay i bɔn? Wɛl wetindu i dɔn tɔn tin fɔ ɔntin ɛn kil?

¹⁵ Dɛn layɔn dɛm dɔn ala pan am, dɛn dɔn ala lawd lawd wan. Dɛn dɔn mek in land yuslɛs; in siti dɛm dɔn broko broko, ɛn nɔbɔdi nɔ tap de.

¹⁶ Pantap dat, di man dɛm na Mɛmfis ɛn Tapanis dɔn brok di krawn na una ed.

¹⁷ Nɔto unasɛf dɔn mek dis apin to una, we una fɔsek PAPA GƆD, we na una Gɔd, we i de bifo una na rod?

¹⁸ Luk naw, wetin una gen we una go Ijipt, na fɔ drink wata na Riva Nayl? Ɔ wetin una gen we una go Asiria, na fɔ go drink wata na Riva Yufretis?

¹⁹ PAPA GƆD Ɔlmayti se, una wikɛdnɛs go pɔnish una, ɛn di fɔsek we una fɔsek mi go jɔj una. Una no ɛn si se na bad bad ɛn bita tin fɔ una fɔ fɔsek PAPA GƆD we na una Gɔd; una nɔ rɛspɛkt mi wan.

Izrɛl Nɔ Gri Wɔship PAPA GƆD.

²⁰ “Bikɔs una dɔn lɛf fɔ wok fɔ mi lɔlɔntɛm ɛn nɔ de du wetin a se una fɔ de du igen, ɛn una se, “A nɔ go sav yu igen” Yɛs, na pantap ɔl dɛn ay il ɛn ɔnda ɔl dɛn grin tik una de butu to dɛn lay lay gɔd dɛn lɛk rare gyal.

²¹ Pan ɔl dat, a plant wan fayn fayn greps tik fɔ una we in sid na piɔ sid. Aw una manej tɔn lo layf pipul ɛn dɔn bi wayl greps?

²² PAPA GƆD Ɔlmayti se, ɔl we una was unasɛf wit sop, ɛn una yuz bɔku bɔku sop, di gilt stil de sho na una fes.

²³ Aw una go se, “A nɔ dɔti na PAPA GƆD in yay, a nɔ de wɔship dɛn lay lay gɔd’? Luk di kayn sin we una de kɔmit na di vali; luk wetin una dɔn du – una tan lɛkɛ yɔŋ kamɛl we nɔ ebul stɛdi, bɔt de waka ɔp ɛn dɔŋ na di sem ples,

²⁴ lɛkɛ wayl yɔŋ dɔŋki we dɔn yus to di dray ɛn ɛmti ples, we de smɛl briz we i fil fɔ man! Udat go ebul kɔntrol am we i dɔn gɛt filin? Di man dɔŋki dɛn we want am nɔ gɛt fɔ stren dɛnsɛf fɔ gɛt am; wɛn in mɔnt rich, dɛn go si am.

²⁵ Una nɔ de mas grɔn wit una ɛmti fut ɛn una nɔ de gri mek tɔsti mek yu trot dray. Bɔt una se; ‘Na fɔ natin, bikɔs a dɔn lɛk trenja dɛn, ɛn na dɛn a de wit.

Izrɛl Dizav Pɔnishmɛnt

²⁶ “Lɛkɛ we dɛn kin jankonico tifman wɛn dɛn kech, na so dɛn go jankonoco Izrɛl: dɛm, dɛn kiŋ dɛm, dɛn bigman dɛm, dɛn man dɛm we de mek sakrifays fɔ pipul sin ɛn dɛn prɔfɛt dɛm,

²⁷ we de tɔk to tik se, ‘Yu na mi papa,’ ɛn to ston se, ‘Na yu mek a de bɔn.’ Bikɔs dɛn dɔn tɔn dɛm bak pan mi, nɔto dɛn fes. Bɔt we dɛn kin gɛt trɔbul, dɛn kin de se, ‘Duya sev wi!’

²⁸ Bɔt we una gɔd dɛm we una mek fɔ unasɛf? Le dɛn tray if dɛn go ebul sev una, we trɔbul kam; bikɔs aw una siti dɛn bɔku, na so una gɔd dɛn bɔku, Yu Juda.

²⁹ “Wetin du una de kɔmplen bɔt mi? Una ɔl dɔn kɔmɔt biɛn mi. Na so PAPA GƆD se.

³⁰ PAPA GƆD se, A dɔn pɔnish una pikin dɛm te, dɛn nɔ gri chenj; na unasɛf tek una an kil una prɔfɛt dɛn lɛk layɔn we aŋri bad bad wan.

³¹ So una, dis jɛnareshɔn, du wetin PAPA GƆD se, A dɔn tan lɛk dray ɛn ɛmti ples to Izrɛl, ɔ land we dak bad bad wan? Wɛl wetindu mi pipul dɛn de se, ‘wi dɔn fri, wi nɔ go kam to yu igen?

³² Uman we nɔ mared yet go fɔgɛt in riŋ chen ɛn baŋuls dɛn, ɔ yawo go fɔgɛt in mared klos? Bɔt mi pipul dɛn dɔn fɔgɛt bɔt mi lɔlɔntɛm.

³³ Una sabi waka fɔ go fɛn una lɔva dɛm! Somɔch dat una dɔn tich dɛn wikɛd uman dɛm, fɔ du wetin una de du.

³⁴ Igen, una klos dɛn sten wit po inosɛnt pipul dɛn blɔd; una nɔ kech dɛn de brok os go insay. Bɔt stil, wit ɔl dɛn tin ya so,

³⁵ una se, ‘A inosɛnt; fɔ tru, in nɔ vɛks pan mi igen.’ A de tɛl una, a go jɔj una fɔ we una de tɔk se, ‘A nɔ kɔmit sin.’

³⁶ Luk we una de pas pas pan pipul, we nɔto so una bin tan! Ijipt go mek una shem, lɛkɛ aw Asiria bin mek una shem.

³⁷ Una go kɔmɔt pan da shem de wit una an na una ed, bikɔs PAPA GƆD nɔ gri fɔ di wan dɛn we una biliv, ɛn dɔn nɔ go bɛtɛ una.