Jɛrimaya 19 - Krio Fɔs Oli Baybul

Di Broko Jɔg

¹ Na dis PAPA GƆD bin se, “Go bay kle flask to dɛn pɔta, ɛn go wit sɔm pan di ɛlda dɛm ɛn sɔm pan di bigman dɛm pan di man dɛn we de mek sakrifays fɔ pipul sin,

² ɛn go na di vali ɔf di sɔn ɔf Inɔm fɔ go insay Pɔtshɛd Get, ɛn tɔk dɛn wɔd dɛn ya, we a de tɛl yu, lɛ ɔlman yɛri.

³ Yu fɔ se, ‘Yɛri wetin PAPA GƆD se, una di kiŋ dɛn na Juda ɛn dɛn wan dɛm we tap na Jerusɛlɛm. Na dis PAPA GƆD Ɔlmayti, we na di Gɔd na Izrɛl se, Biliv mi, a go so mek bad bad tin mit una dat ɛnibɔdi we yɛri bɔt dat, in yes go trimbul.

⁴ Bikɔs di pipul dɛn dɔn fɔsek mi ɛn bamfa dis ples we dɛn de bɔn insɛns de to ɔda gɔd dɛm we dɛm ɛn dɛn fɔstɛmpapa dɛm, ɛn dɛn kiŋ dɛn na Juda nɔ no wande; ɛn bikɔs dɛn dɔn ful dis ples wit inosɛnt pipul dɛn blɔd,

⁵ ɛn dɛn dɔn bil Beal ɔlta dɛm fɔ bɔn dɛn bɔypikin dɛm insay di faya as sakrifays we dɛn de bɔn na faya, to Beal, we a nɔ kɔmand dɛm ɔ ɔda dɛm fɔ du, ɛn i nɔ bin ivin krɔs mi maynd;

⁶ PAPA GƆD se, fɔseka dat, tɛm de kam we dɛn nɔ go kɔl dis ples Tɔfɛt, ɔ Inɔn in bɔypikin in vali Igen, bɔt dɛn go kɔl am di vali ɔf slɔta.

⁷ Ɛn na dis ples a go pwɛl Juda ɛn Jerusɛlɛm dɛn plan, ɛn a go mek dɛn pipul dɛn day na wa bifo dɛn ɛnimi dɛm, ɛn na di wan dɛm we de afta dɛn layf, dɛn an. A go gi dɛn dedebɔdi to dɛn bɔd we de flay na di skay ɛn dɛn wayl animal dɛn na wɔl.

⁸ Ɛn a go mek dis siti tɔn ples fɔ fred, ples we dɛn go de sɔktit pan; ɔlman we de pas nia de go fred ɛn sɔktit bikɔs ɔf ɔl di bad bad tin dɛn we dɔn mit dɛm.

⁹ A go mek dɛn it dɛn bɔypikin ɛn gyalpikin dɛm, ɛn ɔlman go de it in neba, di tɛm we dɛn go sɔrawnd dɛm ɛn distrɛs dɛm, we na dat dɛn ɛnimi dɛm ɛn dɛn wan we de afta dɛn layf, de tek mɔna dɛm.

¹⁰ “Dɔn yu go brok di flask bifo di man dɛm we go wit yu,

¹¹ ɛn yu go tɛl dɛm se, ‘Na dis PAPA GƆD Ɔlmayti se: Na so a go brok dɛn pipul ya ɛn dis siti, lɛkɛ we pɔsin de brok di tin we pɔta mek wit kle, so dat dɛn nɔ go ebul pach am igen. Pipul dɛn go de bɛr na Tɔfɛt, bikɔs nɔn ɔda say nɔ go de fɔ bɛr.’

¹² PAPA GƆD se, na so a go du na dis ples, ɛn to di pipul dɛm we tap de fɔ mek dis siti tan lɛkɛ Tɔfɛt.

¹³ Di os dɛm na Jerusɛlɛm ɛn di kiŋ dɛm na Juda dɛn os dɛm –ɔl di os dɛn we dɛn bin dɔn bɔn insɛns na dɛn ruf, to di san, mun ɛn sta dɛm, ɛn dɔn tɔn drink ɔfrin dɛm to ɔda gɔd dɛm – da os de go dɔti na mi yay lɛk Tɔfɛt, lɛkɛ dis ples Tɔfɛt.’”

¹⁴ Nain Jɛrimaya kɔmɔt na Tɔfɛt, usay PAPA GƆD bin sɛn am fɔ go prɔfisay, ɛn tinap na di yad na PAPA GƆD in os, ɛn tɛl ɔl di pipul dɛn se:

¹⁵ “Na dis PAPA GƆD Ɔlmayti we na Izrɛl dɛn Gɔd se, A de briŋ ɔl di bad bad tin dɛn we a bin dɔn se go apin, pan dis siti ɛn ɔl in tɔŋ dɛm, bikɔs dɛn dɔn traŋayes bad bad wan ɛn nɔ gri yɛri mi wɔd.”