Jɛrimaya 18 - Krio Fɔs Oli Baybul

Jɛrimaya Go Na Di Pɔta In Os

¹ PAPA GƆD in wɔd we bin mit Jɛrimaya se:

² “Grap, ɛn go na di pɔta in os, ɛn na de a go mek yu yɛri wetin a gɛt fɔ tɛl yu.”

³ So a go dɔŋ na di pɔta in os, ɛn a mit i de wok nain wil.

⁴ Ɛn di tin we in bin de mek wit kle pwɛl nain an, so i mek am to ɔda tin ɛn i bin gud we di pɔta du dat.

⁵ Nain PAPA GƆD in wɔd kam to mi.

⁶ PAPA GƆD se, E Izrɛl, a nɔ fɔ ebul du wit una lɛk aw di pɔta dɔn du? Izrɛl, aw una si di kle tan na di pɔta in an, na semweso una sɛf tan na mi an.

⁷ Ɛni tɛm we a tɔk bɔt ɛni neshɔn ɔ kindɔm se a go rut an, brok am dɔŋ ɛn nyakanyaka am,

⁸ ɛn if da neshɔn de we a de tɔk bɔt chenj ɛn lɛf fɔ du bad, a go ripɛnt fɔseka di bad we a bin de plan fɔ du to dɛm.

⁹ Ɛn, ɛni tɛm we a tɔk sɔntin bɔt ɛni neshɔn ɔ kindɔm se, a go bil am ɛn plant am,

¹⁰ if i du bad tin bifo mi, ɛn nɔ lisin to wetin a se, datɛnde a go ripɛnt fɔ di gud we a bin se a de du dɛm.

¹¹ Fɔseka dat, tɛl di man dɛm na Juda ɛn dɛn wan dɛm we tap na Jerusɛlɛm se: “Na dis PAPA GƆD se, a de rɛdi fɔ du ivul tin agens una ɛn a de mek plan fɔ una. Lɛ ɔlman chenj kɔmɔt pan in ivul we, ɛn chenj aw una liv ɛn wetin una de du.

¹² “Bɔt dɛn se, ‘Dat na fɔ natin! Wi go du wetin wi dɔn plan ɛn ɔlman go du wetin in traŋayes ɛn ivul at se.

¹³ “Fɔseka dat, na dis PAPA GƆD se: Aks na di difrɛn neshɔn dɛm se, udat dɔn yɛri dis kayn tin? Da vajin we na Izrɛl, dɔn du bad bad tin.

¹⁴ Di sno na Libanɔn, de lɛf di stip rɔf rɔk dɛm we de na Siriɔn? Di watasay dɛn na dɛn mawnten dɛn de dray dɛn kol watasay dɛm we de rɔn?

¹⁵ Bɔt mi pipul dɛm dɔn fɔgɛt bɔt mi, dɛn de bɔn insɛns fɔ dɛn lay lay gɔd; dɛn dɔn bɔk fut na di rod dɛn we dɛn de fala we na di ol rod dɛm, ɛn dɛn dɔn lɛf di men rod, go waka na dɛn yad rod,

¹⁶ ɛn dɔn mek dɛn land ples fɔ fred, tin fɔ sɔktik pan sote go. Ɛnibɔdi we pas nia de kin fred ɛn kin shek dɛn ed.

¹⁷ A go skata dɛm lɛkɛ di briz we de blo kɔmɔt na di ist bifo dɛn ɛnimi dɛn. A go sho dɛm mi bak, nɔto mi fes, da de we dɛn kalamiti go mit dɛm.”

¹⁸ Nain dɛn se, “Una kam le wi mek plan agens Jɛrimaya, bikɔs wi nɔ go shɔt ɔf man we de mek sakrifays fɔ pipul sin fɔ tich wi di lɔ, ɛn sɛnsman dɛn fɔ gi wi sɛns, ɛn prɔfɛt dɛn fɔ tɛl wi PAPA GƆD in wɔd. Dɛn se, una kam lɛ wi tek wi mɔt bit am, ɛn lɛ wi nɔ tek natin we i de se siriɔs.

¹⁹ Lisin to mi, duya PAPA GƆD, ɛn yɛri di beg we a de beg yu.

²⁰ Iuvl na pemɛnt fɔ gud? Pan ɔl dat, dɛn dɔn dig dip ol fɔ mi layf. Mɛmba aw a bin tinap bifo yu, fɔ tɔk gud bɔt dɛm, fɔ mek yu at kol fɔ dɛm.

²¹ Fɔseka dat, gi yu pikin dɛm to bad bad aŋri; mek dɛn kil dɛm na wa, le dɛn wɛf dɛm tɔn uman dɛn we nɔ gɛt pikin, ɛn uman dɛn we dɛn man dɛn dɔn day, mek dɛn man dɛn mit day bay siknɛs, ɛn mek dɛn kil ɔl dɛn yɔŋ bɔbɔ dɛn na wa.

²² Mek dɛn yɛri kray na dɛn os dɛm, we yu go mek dɛn atak dɛm we dɛn nɔ mekɔp! Bikɔs dɛn dɔn dig dip dip ol fɔ kech mi, ɛn dɔn mek trap dɛn fɔ mi.

²³ PAPA GƆD, yu no ɔl dɛn plan dɛm fɔ kil mi. Nɔ fɔgiv dɛn sin dɛm, ɛn nɔ wep dɛn sin kɔmɔt bifo yu. Lɛ dɛn bit dɛm bifo yu; dil wit dɛm di tɛm we yu vɛks.