Jɛrimaya 17 - Krio Fɔs Oli Baybul

Juda in Sin ɛn Pɔnishmɛnt

¹ “Dɛn rayt Juda in sin wit ayɛn pɛn; na wit pɛn we gɛt dayamɔn mɔt dɛn tek dig rayt am pan di tablɛt na dɛn at, ɛn pan di ɔn dɛm na dɛn ɔlta dɛm,

² wɛn dɛn pikin dɛn de mɛmba dɛn ɔlta dɛm ɛn dɛn Asherim, we liŋ pan ɔl dɛn grin tik, ɛn de pantap di ay il dɛm,

³ ɛn na di mawtin dɛn na di opin kɔntri. A go giwe ɔl una Jɛntri ɛn ɔl una dia dia tin dɛn we una kip, fɔseka una sin dɛn we una kɔmit ɔloba di land.

⁴ Una go pul an pan di land we a bin gi una, ɛn a go mek una sav una ɛnimi dɛm na land we una nɔ no, bikɔs we a vɛks, faya kin layt we go kech sote go.

Difrɛn Tin Dɛn We PAPA GƆD Se

⁵ Na dis PAPA GƆD se: “Swɛ go mit, di pɔsin we abop pan mɔtalman, we pul in at kɔmɔt to PAPA GƆD ɛn put in at to mɔtalman.

⁶ In na lɛk bush we natin nɔ de gro na di ɛmti ples we pɔsin nɔ go ebul tap, ɛn bɛtɛ nɔ go fala am. I go tap na dɛn ston ston say na di dray ɛn ɛmti ples, na di ples we sɔl de plɛnti ɛn nɔbɔdi nɔ tap.

⁷ “Di man we abop pan PAPA GƆD go gɛt blɛsin, we na PAPA GƆD nɔmɔ i abop pan.

⁸ In na lɛk tik we dɛn plant nia watasay, we de sɛn in rut go nia di wata, ɛn nɔ de fred we di ples ɔt, bikɔs in lif dɛn grin ɔltɛm, ɛn nɔ de kɔtat we drawt kam, bikɔs i nɔ de tap fɔ bia frut”

⁹ Mɔtalman at disitful pas ɔltin, ɛn i kɔrɔpt in kayn nɔ de; udat go ebul ɔndastand am?

¹⁰ “Mi PAPA GƆD, sach mɔtalman maynd ɛn tɛst mɔtalman at, fɔ pe ɔlman bay wetin i du, di pe we i fɔ gɛt fɔ di kayn wok we i wok.”

¹¹ Di pɔsin we de gɛt mɔni di rɔŋ we tan lɛk bush fɔl we de ach eg we i nɔ le, tɛm go kam we dɛn go lɛf am go, ɛn i go kan tɔn fulman in di ɛnd.

¹² Wan gloriɔs tron we de pantap mawnten frɔm di biginin, na di ples we wi fɔ pre to PAPA GƆD.

¹³ E PAPA GƆD we Izrɛl abop pan, ɔl udat fɔsek yu go shem; dɛn wan dɛm we tɔn bak pan yu, dɛn go rayt bɔt dɛm na wɔl, bikɔs dɛn fɔsek PAPA GƆD we na di fawnten we de gi wata we de gi layf.

Jɛrimaya Aks PAPA GƆD Fɔ Ɛp Am

¹⁴ Mɛn mi, duya PAPA GƆD ɛn a go wɛl; sev mi ɛn a go sev; bikɔs na yu a de prez

¹⁵ Dɛn de aks mi se, “We PAPA GƆD in wɔd? Le i kam!”

¹⁶ A fos yu fɔ sɛn ivil ɛn a nɔ want di de fɔ dizasta fɔ kam, yu no; wetin kɔmɔt na mi mɔt na bifo yu a tɔk am.

¹⁷ Nɔ mek a fred yu; Na yu a fɔ go ayd to we a gɛt trɔbul.

¹⁸ Le dɛn wan dɛm we du mi bad, shem, bɔt nɔ mek a shem; le dɛn kɔnfyus; bɔt nɔ mek a kɔnfyus; lɛ di de fɔ ivul kam pan dɛm; ɛn nyakanyaka dɛn dɔbul!

Aw Fɔ Kip Sabat De

¹⁹ PAPA GƆD tɛl mi se, “Go tinap na Bɛnjamin Get we na de ɔl dɛn kiŋ dɛm na Juda de pas go insay ɛn kan na do, ɛn na ɔl di get dɛn na Jerusɛlɛm,

²⁰ ɛn tɔk se: Una lisin wetin PAPA GƆD se, una dɛn kiŋ dɛn na Juda ɛn ɔlman na Juda, ɛn ɔl udat tap na Jerusɛlɛm, we de pas na dis get go insay.

²¹ Na dis PAPA GƆD se: Una tek tɛm fɔseka una layf, ɛn nɔtot lod de fɔ blo ɛn rɛst de pas na di get dɛn na Jerusɛlɛm briŋ dɛn kam insay.

²² Una nɔtot lod kɔmɔt insay una os dɛm de fɔ blo ɛn rɛst de ɔ du ɛni wok, bɔt kip de di fɔ blo ɛn rɛst oli, lɛkɛ aw a bin kɔmand una fɔstɛmpapa dɛm.

²³ Pan ɔl dat, dɛn nɔ lisin ɔ pe atɛnshɔn to mi, bɔt dɛn mekɔp dɛn maynd so dat dɛn no go yɛri fɔ tek wetin a se dɛn fɔ du.

²⁴ PAPA GƆD se, “Bɔt if una lisin to mi, ɛn nɔ pas insay dis siti in get dɛn wit lod de fɔ blo ɛn rɛst, bɔt una kip di de fɔ blo ɛn rɛst oli ɛn nɔ du nɔn wok,

²⁵ datɛnde, na kiŋ dɛm we sidɔm na Devid in tron, go pas de kam insay de rayd ɔs ɛn kariej, dɛm ɛn dɛn bigman dɛm, di man dɛn na Juda ɛn di wan dɛn we tap na Jerusɛlɛm; ɛn pipul dɛm go tap na dis siti sote go.

²⁶ En pipul dɛm go kɔmɔt na di siti dɛm na Juda ɛn dɛn ples dɛm ɔlɔbɔt na Jerusɛlɛm kam. Dɛn go kɔmɔt na Bɛnjamin, Shɛfɛla, di il kɔntri ɛn di nɛgɛb. Dɛn go de briŋ sakrifays we dɛn de bɔn na faya ɛn ɔda sakrifays, sid ɔfrin dɛm ɛn insɛns, ɛn ɔfrin fɔ tɛl tɛnki fɔ kam na PAPA GƆD in os.

²⁷ Bɔt if una nɔ lisin to mi, fɔ kip di de fɔ blo ɛn rɛst oli, ɛn nɔ fɔ tot lod pas insay di get dɛm na Jerusɛlɛm de fɔ blo ɛn rɛst, a go layt faya nain get dɛm, ɛn i go bɔn di kiŋ os dɛm na Jerusɛlɛm, ɛn nɔbɔdi nɔ go ebul ɔt am.”