Jɛrimaya 15 - Krio Fɔs Oli Baybul

Di Pipul dɛn na Juda yon Dɔn Dɔn

¹ Nain PAPA GƆD tɛl mi se, ‘Ɔlwe Mozis ɛn Samiɛl bin tinap bifo mi, mi at stil nɔ bin tek dɛn pipul ya. Drɛb dɛn kɔmɔt bifo mi lɛ dɛn go!

² Ɛn wɛn dɛn aks yu se, ‘usay wi fɔ go?’ Yu fɔ tɛl dɛm se, ‘Na dis PAPA GƆD se: Dɛn wan dɛn we fɔ day bay siknɛs, go day bay siknɛs, ɛn dɛn wan dɛn we fɔ day na wa, go day na wa; dɛn wan dɛn fɔ day we bay bad bad aŋri, go day bay bad bad aŋri, ɛn di wan dɛn we na fɔ kech kɛr go mek slev, go go as slev.”

³ “PAPA GƆD se, a go pik fo kayn tin dɛn we go nyakanyaka dɛm; sɔd fɔ kil dɛm, dɔg dɛn fɔ chɛr chɛr dɛm, ɛn di bɔd dɛm na di skay, ɛn di wayl animal dɛn na wɔl fɔ it dɛm ɛn nyakanyaka dɛm.

⁴ Ɛn a go mek di difrɛn kɔntri dɛn na di wanol wɔl fred dɛn bad bad wan fɔseka wetin Ɛzikaya we na kiŋ na Juda, in bɔypikin Manasɛ bin du na Jerusɛlɛm.

⁵ Udat go sɔri fɔ yu, Yu Jerusɛlɛm, ɔ udat go kray nain at fɔ yu? Udat go lɛf wetin i de du fɔ aks bɔt yu?

⁶ PAPA GƆD se, yu bin dɔn tɔn yu bak pan mi, ɛn yu bin jɛs de go biɛn; so a tek akshɔn agens yu ɛn nyakanyaka yu; – A nɔ go ebul sɔri fɔ una igen

⁷ A dɔn shifta dɛm wit shifta fɔk na di get na di land dɛm; A dɔn mek dɛn gɛt bɛrin, ɛn a dɔn nyakanyaka mi pipul dɛn; nɔ dɛn nɔ chenj.

⁸ A dɔn mek di uman dɛn we dɛn man dɔn day dɔn plɛnti pas di sansan na si; a dɔn briŋ kilman kam sansantɛm kam kil kombra dɛn bɔypikin dɛn; A dɔn mek pen ɛn fred kam pan dɛm wantɛm wantɛm.

⁹ Di uman we bɔn sɛvin pikin, dɔn lɛf to insɛf; I dɔn fent;; In san go dɔŋ sansantɛm; dɛn dɔn disgres am ɛn i dɔn shem. A go kil di balans wan dɛm na wa bifo dɛn ɛnimi dɛm. Na so PAPA GƆD se.

Jɛrimaya Le Kɔmplen to PAPA GƆD

¹⁰ Trɔbul dɔn mit mi o, mi mami, we yu bɔn mi fɔ de gɛt kɔntɔfili ɛn waala wit ɔlman na di land! A nɔ trɔs to nɔbɔdi wande ɛn a nɔ lɛnt nɔbɔdi, pan ɔl dat, dɛn ɔl de kɔs mi.

¹¹ Lɛ i bi so, E PAPA GƆD if a nɔ dɔn tɔk to yu fɔ dɛn yon gud, ɛn if a nɔ dɔn beg yu fɔ mi ɛnimi dɛm we dɛn gɛt trɔbul we waala mit dɛm!

¹² Pɔsin go ebul brok ayɛn, ayɛn ɛn brɔnz we kɔmɔt na di nɔt?

¹³ “A go giwe ɔl una jɛntri ɛn ɔl una dia dia tin dɛn we una kip, to pipul dɛn we go bit una na wa, fɔseka ɔl di sin dɛn we una kɔmit na una wanol eria,

¹⁴ A go mek una sav una ɛnimi dɛm, na land we una nɔ no, bikɔs we a vɛks, wan faya kin kech we go bɔn sote go.”

¹⁵ E PAPA GƆD, yu no; mɛmba mi ɛn ɛn ɛp mi, ɛn rivɛnj fɔ mi pan di wan dɛm we de du mi bad. Nɔ peshɛnt wit dɛn te dɛn kil mi; no se fɔseka yu a de bia shem.

¹⁶ A yɛri ɔl wetin yu se, ɛn a ɔndastand, ɛn wetin yu se mek a gladi ɛn dat mek mi at swit; bikɔs na yu gɛt mi, O PAPA GƆD Ɔlmayti.

¹⁷ A nɔ bin sidɔm wit pipul dɛn we lɛk ɛnjɔymɛnt; ɛn a nɔ bin gladi; A bin sidɔm mi wangren bikɔs na so yu se a fɔ du, bikɔs yu bin dɔn mek a vɛks.

¹⁸ Wetin mek mi pen nɔ de tap, mi wund nɔ de wɛl, i nɔ de gri wɛl? Yuwan tan lɛk watasay we de disiv pipul, lɛkɛ watasay we kin tap fɔ rɔn ɛnitɛm?

¹⁹ Fɔseka dat, na dis PAPA GƆD se; “If yu kam bak, a go tek yu bak, ɛn una go sav mi stil. If yu de tɔk soba tɔk ɛn nɔ de tɔk rɔbish, na yu go de tɛl pipul wetin a se. Dɛn go tɔn to yu, bɔt yu nɔ gɔ tɔn to dɛm.

²⁰ Ɛn a go mek yu tan lɛk traŋa traŋa brɔnz wɔl to dɛn pipul dɛn ya; dɛn go fɛt yu, bɔt dɛn nɔ go ebul yu, bikɔs a de wit yu fɔ sev yu ɛn pul yu kɔmɔt na dɛn an. Na so PAPA GƆD se.

²¹ “A go pul yu kɔmɔt na wikɛd pipul dɛn an, ɛn pe pul yu kɔmɔt na rutlɛs pipul dɛn an.”