Jɛrimaya 14 - Krio Fɔs Oli Baybul

Di Bad Bad Drawt

¹ PAPA GƆD in wɔd we rich Jɛrimaya kɔnsanin di drawt:

² “Juda de kray ɛn in get dɛm lɛf ɛmti; in pipul lidɔm na grɔn de kray, ɛn di kary we Jerusɛlɛm de kray, de go ɔp.

³ Di bigman dɛm we de de, sɛn dɛn wokman dɛm fɔ go gɛt wata; dɛn kam na di wɛl dɛm, dɛn nɔ si wata, dɛn go bak wit ɛmti kitul dɛm; dɛn shem ɛn kɔnfyus, ɛn dɛn kɔba dɛn ed.

⁴ Bikɔs di grɔn nɔ bia natin, bikɔs ren nɔ kam, di fama dɛn de shem, dɛn kɔba dɛn ed.

⁵ Ivin di uman dia na bush de fɔsek in yɔŋ pikin we i jɛs bɔn bikɔs gras nɔ de.

⁶ Dɛn wayl dɔŋki dɛm tinap na di ɛmti il dɛm, dɛn de blo lɛk we dɛn dɔg kin pul dɛn tɔŋ na do; dɛn nɔ de si bɛtɛ igen bikɔs tin nɔ de fɔ it.

⁷ “Ɔldo wi sin dɛm de sho se wi dɔti na Gɔd yay, bɔt duya PAPA GƆD, du sɔntin fɔseka yu nem; bikɔs wi bakslayd bɔku bɔku tɛm, wi dɔn kɔmit sin to yu.

⁸ E ya, yu we na yu Izrɛl abop pan, yu we kin sev am we i gɛt trɔbul, wetin mek yu fɔ tan lɛkɛ trenja na di land, lɛkɛ pɔsin we de travul we kan beg fɔ slip fɔ di nɛt?

⁹ Wetin mek yu fɔ tan lɛkɛ pɔsin we kɔnfyus, lɛkɛ pawaful man we nɔ ebul sev pɔsin? Bɔt stil, yu PAPA GƆD, de wit wi, ɛn na yu gɛt wi; duya, nɔ lɛf wi.”

¹⁰ Na dis PAPA GƆD se kɔnsanin dɛn pipul ya: “Na so dɛn dɔn lɛk fɔ de rɔnawe pan mi, dɛn nɔ de kɔntrol dɛn fut; fɔseka dat, PAPA GƆD nɔ go aksɛpt dɛm, naw, i go mɛmba dɛn sin dɛm ɛn pɔnish dɛm fɔseka dɛn sin dɛm.”

¹¹ PAPA GƆD tɛl mi se: “Nɔ pre fɔ dɛn pipul dɛn ya.

¹² Ilɛk dɛn fast, a nɔ go yɛri dɛn kray, ɛn ilɛk dɛn mek sakrifays we dɛn de bɔn na faya ɛn sid ɔfrin, a nɔ go tek dɛm; bɔt a go kil dɛm wit wa, aŋri ɛn wit bad bad sik dɛm.

¹³ Nain a se; “E, Papa Gɔd we na Gɔd, di prɔfɛt dɛm de tɛl dɛm se, ‘Una nɔ go fɛt wa, ɛn una nɔ go day wit aŋri, bɔt a go mɔs gi una kol at na dis ples,’”

¹⁴ Nain PAPA GƆD tɛl mi se; “Di prɔfɛt dɛm de yuz mi nem fɔ gi lay lay prɔfisi; A nɔ sɛn dɛm ɛn a nɔ tɛl dɛm fɔ tɔk to dɛm. Na lay lay prɔfisi dɛn de gi una; na lay lay vishɔn dɛn de pul na dɛn ed de lay gi una.

¹⁵ Fɔseka dat, PAPA GƆD se, kɔnsanin di prɔfɛt dɛm we de tek mi nem gi lay lay prɔfisi, ɔl we a nɔ sɛn dɛm, ɛn de se, ‘Wa ɛn bad bad aŋri nɔ go kam na dis land’: Na wa ɛn bad bad aŋri go kil dɛn prɔfɛt dɛn de.

¹⁶ Ɛn dɛn go trowe di pipul dɛm we dɛn de prɔfisay to, midul trit na Jerusɛlɛm. Na aŋri ɛn wa go kil dɛm ɛn nɔbɔdi nɔ go bɛr dɛm– nɔbɔdi nɔ go de fɔ bɛr dɛm – dɛm, dɛn wɛf dɛm, dɛn bɔypikin dɛm ɛn dɛn gyal pikin dɛm. Bikɔs a go gi dɛn di pe fɔ dɛn wikɛdnɛs.

¹⁷ “Yu go tɛl dɛm se: ‘Lɛ wata rɔn mi yay de ɛn nɛt, ɛn lɛ dɛn nɔ tap, bikɔs dɛn dɔn wund mi pipul dɛn gyal pikin we na vajin bad bad wan we dɛn wap am at at wan.

¹⁸ If a go na fam, a go si dɛn wan dɛn we day na wa! If a go insay di siti a go mit bad bad aŋri de! Bikɔs di prɔfɛt ɛn di man dɛn we de mek sakrifays fɔ pipul sin, de wirɔn ɔp ɛn dɔŋ de mek pipul dɛn pe dɛn fɔ dɛn wok, we dɛn nɔ no natin.’”

Di Pipul Dɛn Beg PAPA GƆD

¹⁹ Yu nɔ want Juda igen igen? Yu dɔn et Zayɔn? Wetin mek yu put siknɛs pan wi so dat mɛrɛsin nɔ de fɔ mɛn am? Wi luk fɔ pis, bɔt nɔn gud nɔ kam; we wet se tɛm go kam we wi go wɛl, bɔt na bad bad tritmɛnt wi gɛt.

²⁰ E PAPA GƆD, wi gri se wi dɔn du bad ɛn wi gri se wi fɔstɛmpapa dɛn bin kɔmit sin, bikɔs wi dɔn sin to yu.

²¹ Nɔ luk usay yu nem de bad yay, nɔ disɔna yu tron we ɔlman de prez; duya, mɛmba o ɛn nɔ brok di Kɔvinant we yu mek wit wi.

²² Ɛni pan dɛn neshɔn dɛn lay lay gɔd dɛn we de mek ren kam, de wit una? Ɔ di klawd insɛf ebul mek ren kam? Nɔto yu na di wan we de mek ɔl dat bi, PAPA GƆD we na wi Gɔd? Na yu wi abop pan, bikɔs na yu de du ɔl dɛn tin ya.