Jɛrimaya 13 - Krio Fɔs Oli Baybul

Di Linin Shɔt Trɔsis dɛn

¹ Na dis PAPA GƆD tɛl mi, “Go bay wan linin skintayt, wɛr am, ɛn nɔ dɔk am na wata”

² So a bay wan linin skintayt bay wetin PAPA GƆD se, ɛn wɛr am.

³ Naim PAPA GƆD in wɔd kam to mi sɛkɛn tɛm se,

⁴ “Pul di skintayt we yu bay, we de na yu wes, ɛn go na Riva Yufretis, ɛn ayd am insay insay usay di rɔk plit.”

⁵ So a go ayd am nia Riva Yufretis, lɛk aw PAPA GƆD bin kɔmand mi fɔ du.

⁶ Afta lɔŋ tɛm, PAPA GƆD tɛl mi se, “Go na Riva Yufretis go tek di skintayt we a bin kɔmand yu fɔ go ayd de, kɔmɔt de.”

⁷ Nain a go na Riva Yufretis, ɛn dig di skintayt kɔmɔt na di ple we a bin ayd am. We a go luk am, di skintayt dɔn pwɛl; it nɔ bin gud fɔ natin.

⁸ Nain PAPA GƆD in wɔd kam to mi se:

⁹ Na dis PAPA GƆD se: na semweso a go pwɛl Juda in prawd we i de mek ɛn di tin we mek Jerusɛlɛm de kak.

¹⁰ Dɛn ivul pipul dɛn ya, we nɔ gri yɛri mi wɔd, we de fala dɛn yon stɔbɔn at de go wɔship ɛn sav ɔda gɔd dɛm, go tan lɛk dis skintayt we nɔ gud igen fɔ natin.

¹¹ Bikɔs, lɛk aw skintayt kin grip pɔsin wes, na semweso a bin mek di wanol Izrɛl ɛn di wanol Juda ol mi tayt, so dat dɛn go bi mi yon pipul dɛm, pipul dɛn we go mek nem fɔ mi, we go mek dɛn prez mi, we go mek a femɔs; bɔt usay, dɛn nɔ gri lisin to mi. Na so PAPA GƆD se.

Di Wayn Jɔg

¹² PAPA GƆD tɛl Jɛrimaya fɔ tɛl di pipul dɛn se ‘Na dis PAPA GƆD we na Izrɛl dɛn Gɔd se, “Ɔl dɛn jɔg dɛn go ful wit wayn.” PAPA GƆD se, ‘Dɔn dɛn go aks yu se, ‘Na tru se wi nɔ bin no se ɔl dɛn jɔg dɛn go ful wit wayn?’

¹³ Dɔn yu go tɛl dɛn se, ‘Na dis PAPA GƆD se: Biliv mi, a go mek ɔlman we tap na land drɔŋɔ: Di kiŋ dɛm we sidɔm na Devid in tron, di man dɛm we de mek sakrifays fɔ pipul sin, di prɔfɛt dɛm, ɛn ɔlman we tap na di Jerusɛlɛm go drɔŋɔ.

¹⁴ PAPA GƆD se, “A go kech tu pɔsin baŋ dɛn pan dɛnsɛf; a go baŋ papa ɛn pikin. A nɔ go fil am fɔ nɔbɔdi, ɔ nɔ go lɛf nɔbɔdi ɔ a sɔri fɔ ɛnibɔdi, we go mek a nɔ dɔnawe wit am.”

Jɛrimaya Wɔn Pipul fɔ Lɛf fɔ Mek Prawd

¹⁵ Una yɛri o ɛn una lisin; una lɛf fɔ mek prawd, bikɔs PAPA GƆD dɔn tɔk.

¹⁶ Una glɔrifay PAPA GƆD we na una Gɔd bifo di ples dak, bifo una bɔk una fut, na dɛn mawnten dɛn na nɛt, ɛn wɛn yu de luk se layt de kam i mek di ples dak lilibit, ɛn mek i dak bad bad wan.

¹⁷ Bɔt if una nɔ gri lisin, mi sol go kray sikrit wan fɔ di prawd we una de mek; mi yay dɛn go kray bita bita wan, ɛn de rɔn wata bikɔs dɛn dɔn kɛr PAPA GƆD in ship dɛn go mek slev.

¹⁸ Tɛl di kiŋ ɛn di kwin mami se; “Una de wit di ɔdinari pipul dɛm, bikɔs una fayn fayn krawn dɔn kɔmɔt na una ed.”

¹⁹ Di siti dɛn na di Nɛgɛb dɔn lɔk, ɛn nɔbɔdi nɔ de fɔ opin dɛm; dɛn dɔn kɛr di wanol Juda ɛgzayl, dɛn kɛr dɛn ɔl go ɛgzayl.

²⁰ “Una es una yay ɔp ɛn luk di wan dɛn we de kɔmɔt na di nɔt. We di ship dɛn we dɛn bin gi una, una fayn fayn ship dɛm?

²¹ Wetin una go se, wɛn dɛn put dɛn wan dɛn we na una sɛf tich fɔ bi una padi dɛn, oba una? Pen nɔ go ol una lɛk uman we de lebɔ?

²² Ɛn if una tɔk na una at se, ‘Wetindu dɛn tin dɛn ya dɔn apin to wi?’ Na bikɔs una sin dɛm dɔn bɔku nain mek dɛn dɔn es una skat dɛn ɔp, ɛn rep una.

²³ Pɔsin we kɔmɔt Itiopia go ebul chenj in bɔdi in kɔla ɔ lɛpɛt wep in spɔt dɛm kɔmɔt? So una we na fɔ du bad nɔmɔ de na una blɔd, kin ebul du gud.

²⁴ A go skata una lɛk chaf chaf we briz we kɔmɔt na ɛmti ples we pɔsin nɔ go ebul tap, de blo.

²⁵ PAPA GƆD se na so i fɔ bi to una, dis na una pɔshɔn we a dɔn mɛnshɔ fɔ una, bikɔs yu dɔn fɔgɛt bɔt mi, ɛn de biliv pan lay lay.

²⁶ Na misɛf sɛf go es una skat kɔba una fes, ɛn una go disgres.

²⁷ A dɔn si di kayn ambishɔn we una gɛt, una adɔltri dɛm ɛn di mek we una de mek lɛk ɔs, ɛn una lo lo rare layf, na dɛn il dɛm ɛn dɛn fam. Swɛ go mit yu, Yu Jerusɛlɛm! Aw lɔŋ yu go de bifo yu go klin na Gɔd yay?