Jɛrimaya 11 - Krio Fɔs Oli Baybul

Jɛrimaya Ɛn di Kɔvinant

¹ PAPA GƆD in wɔd we rich Jɛrimaya: I se,

² “Lisin wetin wi gri pan insay di Kɔvinant, ɛn tɛl di man dɛm na Juda ɛn dɛn wan dɛm we tap na Jerusɛlɛm.

³ Yu go tɛl dɛm se, Na dis PAPA GƆD we na Izrɛl dɛn Gɔd se: Na alaki go mit di pɔsin we nɔ du wetin di Kɔvinant se,

⁴ we a bin kɔmand una fɔstɛmpapa dɛn fɔ du, we a bin briŋ dɛm kɔmɔt Ijipt, kɔmɔt na di ayɛn fayasay, de tɛl dɛn se, Una lisin mi ɛn du ɔl wetin a kɔmand una fɔ du. Na dat go mek una bi mi pipul dɛn ɛn mi go bi una Gɔd,

⁵ so dat a go du wetin a bin dɔn swɛ to una fɔstɛmpapa dɛn se a go du fɔ dɛm, dat na fɔ gi dɛn wan land we gud fɔ plant ɛn fɔ mɛn animal we dɛn gɛt so.” Nain a ansa se, “PAPA GƆD, lɛ i bi so.”

⁶ Nain PAPA GƆD tɛl mi se, “Anawns ɔl dɛn tin ya na di siti dɛn na Juda ɛn na di trit dɛn na Jerusɛlɛm: Yɛri wetin di Kɔvinant se, dɛn du dɛm.

⁷ Bikɔs a bin wɔn una fɔstɛmpapa dɛn siriɔs siriɔs wan we a bin pul dɛn kɔmɔt Ijipt, ɛn a bin de wɔn dɛm ɔltɛm, ivin to tide, Una de du wetin a se una fɔ de du.

⁸ Stil dɛn nɔ du am ɔ ivin lisin, bɔt dɛn ɔl du di traŋayes tin we dɛn ivul at tɛl dɛn fɔ du. Na dat mek a dɔn tɛl dɛn di kayn pɔnishmɛnt we di Kɔvinant we a bin kɔmand dɛn fɔ obe, bɔt dɛn nɔ bin obe, se dɛn fɔ gɛt

⁹ PAPA GƆD tɛl mi bak se, “Ribɛliɔn de bitwin di man dɛm na Juda ɛn dɛn wan dɛm we tap na Jerusɛlɛm.

¹⁰ Dɛn dɔn tɔn bak to dɛn fɔstɛmpapa dɛn we nɔ bin gri yɛri mi wɔd, dɛn sin; dɛn dɔn go fɔ go sav ɔda gɔd dɛm; Izrɛl ɛn Juda dɔn brok mi Kɔvinant we a bin mek wit dɛn fɔstɛmpapa dɛm.

¹¹ Fɔseka dat, na dis PAPA GƆD se, A de briŋ ivul tin pan dɛm we dɛn nɔ go ebul pul dɛn ed kɔmɔt; ɔl we dɛn go kray to mi, A nɔ go lisin dɛm.

¹² Da tɛm de, di siti dɛm na Juda ɛn di wan dɛm we tap na Jerusɛlɛm, go go ɛn kray to di gɔd dɛm we dɛn bin de bɔn insɛns to, bɔt dɛn nɔ go ebul sev dɛm we trɔbul mit dɛm.

¹³ Bikɔs una gɔd dɛm dɔn bɔku lɛkɛ aw una siti dɛm dɛn bɔku, Yu Juda; ɛn lɛkɛ aw di trit dɛm bɔku na Jerusɛlɛm, na semweso di ɔlta dɛm we una dɔn bil we shemful, dɛnsɛf bɔku; ɔlta dɛn fɔ bɔn insɛns to Beal.

¹⁴ Fɔseka dat, nɔ pre fɔ dɛn pipul dɛn ya, ɔ kray to mi, ɔ pre fɔ beg fɔ dɛm, bikɔs a nɔ go lisin we dɛn kɔl mi we trɔbul mit dɛm.

¹⁵ Us rayt di wan we a lɔv gɛt insay mi os we dɛn dɔn ple dɔti gem? Na vaw dɛn we i go mek ɔ we i sakrifays flɛsh go ebul mek i nɔ alaki? Yu go gladi afta dat?

¹⁶ PAPA GƆD bin de kɔl yu, ‘Grin greps tik, we fayn fɔ si wit frɛsh frɛsh frut dɛm’; bɔt na wantɛm ala i gɔ ala wit ebi tɛnda ɛn laytin, i go sɛt faya pan am, ɛn ɔl in branch dɛm go bɔn.

¹⁷ PAPA GƆD Ɔlmayti, we bin plant una, dɔn swɛ una, fɔseka di ivul tin we Izrɛl ɛn Juda dɔn du, we dɛn provok mi te a vɛks, we dɛn de bɔn insɛns to Beal.”

Plɔt Fɔ Kil Jɛrimaya

¹⁸ PAPA GƆD bin mek a no, ɛn a bin no; dɔn i bin did sho mi di ivul tin dɛn we dɛn de du.

¹⁹ Bɔt mi na bin lɛk nays ship pikin we dɛn kɛr go fɔ go kil. A nɔ bin no se na bin agens mi dɛn bin dɔn mek plɔt, we dɛn de se, “Lɛ wit pwɛl pwɛl di tik wit in frut dɛm, lɛ wi kil am, so dat dɛn nɔ go mɛmba in nem igen.”

²⁰ Bɔt, duya PAPA GƆD Ɔlmayti, yu we de jɔj rayt, yu we de tɛst di at ɛn di maynd, rivɛnj fɔ mi, bikɔs na to yu a lɛf mi kes.

²¹ Na dis PAPA GƆD se bɔt di man dɛn na Anatɔt we wan kil yu ɛn de tɔk se, “We yu de prɔfisay, yu nɔ fɔ tɔk se na PAPA GƆD se, ɔ nɔso, wi go kil yu”–

²² so, na dis PAPA GƆD Ɔlmayti se fɔseka dat: “Biliv mi, a go pɔnish dɛm; di yɔŋbɔy dɛm go day na wa; dɛn bɔypikin dɛm ɛn dɛn gyal pikin go day wit aŋri;

²³ ɛn nɔn pan dɛn nɔ go lɛf. Bikɔs a go mek bad bad tin mit di man dɛm na Anatɔt, we di ia fɔ dɛn pɔnishmɛnt kam.”