Jɛrimaya 10 - Krio Fɔs Oli Baybul

Lay Lay gɔd Wɔship ɛn Tru Tru Wɔship

¹ Izrɛl, una yɛri di wɔd we PAPA GƆD de tɛl una.

² Na dis PAPA GƆD se: “Una nɔ lan dɛn ɔda neshɔn dɛn we, ɔ mek dɛn sayn dɛn we de sho ɔp di skay pwɛl una at bikɔs dɛn neshɔn dɛm kin fred dɛm,

³ bikɔs na fɔls kɔstɔm di neshɔn dɛn gɛt. Dɛn kɔt wan tik na di fɔrɛst, ɛn man we de wok wit in an tek aks kav am.

⁴ Pipul dɛn drɛs am wit silva ɛn gold; dɛn fasin am wit ama ɛn nel so dat i nɔ go kɔmɔt.

⁵ Dɛn lay lay gɔd dɛm na lɛkɛ Ta bebi na wata mɛlɔn fam, ɛn dɛn nɔ de tɔk; pas dɛn tot dɛm, bikɔs dɛn nɔ ebul waka. Nɔ fred dɛm, bikɔs dɛn nɔ ebul du yu bad, semweso, i nɔ de pan dɛn fɔ du gud.”

⁶ Nɔn gɔd nɔ de we tan lɛkɛ yu, PAPA GƆD; yu wɔndaful, ɛn yu nem gret ɛn pawaful.

⁷ Udat de we nɔ go fred yu, Yu we kiŋ fɔ di neshɔn dɛm? Bikɔs ɔlman sɔpoz fɔ rɛspɛkt yu; bikɔs pan ɔl dɛn wan dɛn we gɛt sɛns bad bad wan na di neshɔn dɛm ɛn insay ɔl dɛn kindɔm dɛm, nɔn nɔ de we tan lɛkɛ yu.

⁸ Dɛn styupid ɛn fulish; wetin dɛn lay lay gɔd dɛn we na ɛmti bod go ebul tich dɛm ɔ tɛl dɛm!

⁹ Dɛn bay lay lay gɔd we dɛn pent wit silva na Spen, ɛn gold wan na Ufaz. Na man we de kav tiŋs dɛn ɛn goldsmit, mek dɛm; dɛn klos dɛn na rɛd ɛn mov; na pipul dɛn we de wok wit dɛn an mek dɛm.

¹⁰ Bɔt na PAPA GƆD na di tru tru Gɔd; in na di Gɔd we de alayv ɛn di kiŋ we de sote go. We i vɛks, di wanol wɔl de shek, ɛn di neshɔn dɛm nɔ ebul bia in vɛksteshɔn.

¹¹ Na dis yu go tɛl dɛm: “Dɛn gɔd dɛm we nɔto dɛn mek ɔp di klawd ɛn dɔŋ di grɔn, go alaki na grɔn ɛn ɔnda di klawd.”

Im fɔ Prez PAPA GƆD

¹² Naim mek di wɔl wit in pawa, in we yuz in sɛns mek di wɔl, ɛn tek in sabi prɛd di klawd.

¹³ Wɛn i pas kɔmand, di wata dɛn we de ɔp di klawd kin slap slap dɛnsɛf; ɛn i kin mek smok grap kɔmɔt na di las las pat dɛn na di wɔl. I mek laytin fɔseka ren, ɛn i briŋ briz kɔmɔt nain sto.

¹⁴ Ɔl mɔtalman styupid ɛn nɔ gɛt sɛns; ɔl dɛn goldsmit dɛn go shem fɔ dɛn lay lay gɔd dɛm; bikɔs dɛn lay lay gɔd dɛn na lay lay, ɛn dɛn nɔ gɛt layf.

¹⁵ Dɛn yuslɛs, ɛn na imajin dɛn imajin da kayn tin de; di tɛm we dɛn go gɛt dɛn pɔnishmɛnt, dɛn go day.

¹⁶ Di wan we Jekob gɛt nɔ tan lɛkɛ dɛn wan ya, bikɔs nain mek ɔltin, ɛn Izrɛl na di pipul dɛn we i pik fɔ insɛf; na PAPA GƆD Ɔlmayti nain nem.

Di Go We Dɛn Gɛt Fɔ Go Ɛgzayl

¹⁷ Una gɛda una bɔndul na grɔn, una we dɛn dɔn sɔrawnd!

¹⁸ Bikɔs PAPA GƆD se “A de trowe di wan dɛm we tap na di land, na do dis tɛm, ɛn a go briŋ trɔbul pan dɛm, so dat dɛn go fil am.”

¹⁹ E mi, swɛ dɔn kech mi, fɔseka di kayn pen we a de fil! A wund bad bad wan. Bɔt a se “Fɔ tru tru dis na siknɛs, ɛn a mɔs bia wit am.”

²⁰ Mi tɛnt dɔn pwɛl, ɛn ɔl di rop dɛn dɔn kɔt kɔt; mi pikin dɛn dɔn lɛf mi go; ɛn wan nɔ lɛf; nɔbɔdi nɔ de fɔ bil mi tɛnt bak, ɛn ɛŋ mi kɔtin dɛm.

²¹ Bikɔs di shɛpad dɛn styupid, ɛn dɛn nɔ de aks PAPA GƆD bɔt natin; dat mek dɛn nɔ du wɛl na layf, ɛn ɔl dɛn ship dɛm dɔn skata ɔlɔbɔt.

²² Una lisin, na rumɔ! Luk, i de kam! –- Big kɔnfyushɔn de na di nɔt kɔntri fɔ kam mek di siti dɛn na Juda ɛmti, ɛn ples we na so so Jakal tap.

²³ PAPA GƆD, a no se wetin mɔtalman de du nɔ de nainyon an, ɛn mɔtalman nɔ ebul kɔntrol inyon layf ɔ dayrɛkt in stɛp dɛm.

²⁴ Kɔrɛkt mi PAPA GƆD, bɔt mek am smɔl smɔl mek a nɔ fil am nɔto we yu vɛks, if nɔ so yu go jɛs kil mi.

²⁵ Tɔn mi vɛksteshɔn pan di neshɔn we nɔ no yu, ɛn pan di pipul dɛn we nɔ de pre to yu; bikɔs dɛn dɔn kil Jekɔb; dɛn dɔn kil am ɛn it am, ɛn dɛn dɔn mek di ples we i bin tap, yuslɛs.