Jɛrimaya 1 - Krio Fɔs Oli Baybul

Jɛrimaya

¹ Di wɔd dɛn we Jɛrimaya, we na Ilkaya, wan pan di man dɛn we de mek sakrifays fɔ pipul sin na Anatɔt, na di land ɔf Bɛnjamin in yon bɔypikin,

² we na to am PAPA GƆD in wɔd bin kam di ia we mek Josaya, we na Amɔn in bɔypikin, tɔtin ia as kiŋ na Juda.

³ PAPA GƆD in wɔd bin kam bak di tɛm we Josaya in bɔypikin, Jɛhoiyakin na bin kiŋ na Juda, ɛn te di tɛm we Zɛdikaya we na Josaya in bɔypikin bin ilɛvin ia na pawa, sote di tɛm we dɛn kapchɔ Jerusɛlɛm insay di mɔnt we mek fayv.

Di Kɔl We PAPA GƆD Kɔl Jɛrimaya

⁴ PAPA GƆD in wɔd kam to mi se,

⁵ “Bifo a mek yu na yu mami in bɛlɛ, a bin dɔn no yu, ɛn bifo yu bɔn, a bin dɔn kɔnsikret yu fɔ mi wok; a pik yu fɔ bi prɔfɛt to ɔl di neshɔn dɛm.”

⁶ Naim a se, “E PAPA GƆD we na mi Gɔd! I apin se a nɔ no aw fɔ tɔk bikɔs mi na jɛs wan yɔŋ bɔbɔ.”

⁷ Bɔt PAPA GƆD tɛl mi se, “Nɔ tɔk se, ‘mi na jɛs wan yɔŋ bɔbɔ, bikɔs yu go go to ɔl dɛn wan dɛn we a go sɛn yu to, ɛn ɛnitin a se paopa yu fɔ tɔk, yu go tɔk am.

⁸ Nɔ fred dɛm, bikɔs a de wit yu fɔ sev yu,” na so PAPA GƆD se.

⁹ Nain PAPA GƆD es in an ɛn tɔch mi mɔt; dɔn PAPA GƆD tɛl mi se, “a de tɛl yu, a dɔn put mi wɔd na yu mɔt.

¹⁰ Tide, a dɔn put yu oba neshɔn ɛn kindɔm dɛm, fɔ pik kɔmɔt ɛn fɔ brokdɔŋ, fɔ pwɛl ɛn fɔ kapsay fɔ bil ɛn fɔ plant.”

¹¹ PAPA GƆD in wɔd bin kam to mi se, “Jɛrimaya, wetin yu de si?” Nain a se, “A si Almɔnd tik branch.”

¹² Nain PAPA GƆD tɛl mi se, “Yu si di kɔrɛkt tin, bikɔs a de wach mi wɔd fɔ du wetin a se.”

¹³ PAPA GƆD in wɔd kam to mi sɛkɛn tɛm se, “Wetin yu de si?” Nain a se, “A si wan pɔt we de bwɛl ɛn in fes tɔn kɔmɔt na di nɔt.”

¹⁴ Nain PAPA GƆD tɛl mi se, “Na di nɔt ivul go kɔmɔt go pan di pipul dɛn we tap na di land.

¹⁵ PAPA GƆD se, na dat mek A de kɔl ɔl di trayb dɛn we de na di kindɔm dɛm na di nɔt; ɛn dɛn go kam, ɛn dɛn ɔl go put dɛn tron na di ɛntrans na di get fɔ go insay Jerusɛlɛm, ɛn liŋ dɛn pan ɔl di wɔl dɛn we de rawnd, ɛn pan ɔl di siti dɛn na Juda.

¹⁶ Ɛn a go pas mi jɔjmɛnt agens dɛm, fɔ ɔl dɛn wikɛdnɛs we dɛn fɔseka mi; dɛn dɔn bɔn insɛns to dɛn ɔda gɔd dɛm, ɛn wɔship di tin dɛn we dɛn mek wit dɛn yon an.

¹⁷ Bɔt yu, tay yu trɔsis tayt, grap go tɛl dɛn ɔltin we a dɔn tɛl yu traŋa wan se yu fɔ du. Nɔ mek dɛn pwɛl yu at o. If nɔto so, a go pwɛl yu at bifo dɛm.

¹⁸ Ɛn a de tɛl yu, a de mek wan siti we gɛt protɛkshɔn fɔ yu, ayɛn pila, ɛn bras wɔl dɛm, agens di wanol land, agens di kiŋ dɛn na Juda, in bigman dɛm, in man dɛm we de mek sakrifays fɔ pipul sin, ɛn di pipul dɛn na di land.

¹⁹ PAPA GƆD se, dɛn go fɛt yu; bɔt dɛn nɔ go ebul yu, bikɔs a de wit yu fɔ fɛt fɔ yu.