Jɛnɛsis 9 - Krio Fɔs Oli Baybul

PAPA GƆD Mek Kɔvinant Wit Noa

¹ PAPA GƆD blɛs Noa ɛn in bɔypikin dɛn. I se, “Una bɔn bɔku bɔku pikin dɛn so dat una go de ɔlsay na di wɔl.

² Ɔl dɛn animal, dɛn bɔd, ɛn fish dɛn go de fred una. Na una go de kɔntrol dɛn.

³ A dɔn gi dɛn to una fɔ it jɛs lɛkɛ aw a bin dɔn gi di grin plant dɛn fɔ it.

⁴ Wan tin nɔmɔ, una nɔ fɔ it ɛnitin we rɔ we gɛt blɔd pan am, bikɔs na di blɔd gɛt layf.

⁵ If ɛnibɔdi kil in kɔmpin, insɛf fɔ day. We animal kil mɔtalman, dɛn fɔ kil am bak.

⁶ So dɛn fɔ kil ɛnibɔdi we kil in kɔmpin mɔtalman bikɔs a mek mɔtalman lɛkɛ misɛf.”

⁷ “Una fɔ bɔn bɔku bɔku pikin so dat una go de ɔlsay na di wɔl.”

⁸ PAPA GƆD tɛl Noa ɛn in bɔypikin dɛn se,

⁹ “Naw, a de mek Kɔvinant wit una ɛn una jɛnareshɔn dɛn,

¹⁰ ɛn wit ɔl dɛn tin we gɛt layf; dɛn bɔd, dɛn animal we tap wit pipul, dɛn wayl bist ɛn ɔl wetin kɔmɔt insay di ak wit una

¹¹ Dis na di Kɔvinant: A nɔ go ɛva sɛn ren fɔ pwɛl ɔltin na di wɔl igen.

¹² Na di sayn dis we go sho se a dɔn mek Kɔvinant wit una, una jɛnareshɔn dɛn ɛn ɔl wetin gɛt layf sote go.

¹³ A de put mi rembo ɔp na di klawd we go bi di sayn fɔ dis Kɔvinant wit di wɔl.

¹⁴ Ɛnitɛm we a mek di skay dak ɛn di rembo sho,

¹⁵ a go mɛmba dis Kɔvinant we a mek wit una, se, igen igen a nɔ go mek big big ren kam fɔ pwɛl ɔltin we gɛt layf.

¹⁶ We di rembo sho na di klawd, a go si am ɛn a go mɛmba di Kɔvinant wit una; ɛn ɔl wetin gɛt layf na di wɔl.

¹⁷ Na di rembo go bi di sayn fɔ sho se a bin dɔn mek Kɔvinant wit una.”

Wetin Mek Noa Swɛ Am

¹⁸ Noa in bɔypikin dɛn we bin kɔmɔt na di bot na bin Shɛm, Am, ɛn Jefɛt. Am na Kenan in papa.

¹⁹ Na frɔm Noa in tri bɔypikin dɛn ɔl di pipul dɛn na dis wɔl kɔmɔt.

²⁰ Noa na bin fama, ɛn nain na di fɔs man we plant greps.

²¹ Wande we i drink sɔm pan di wayn we i mek, i drɔnk pasmak te i pul in klos, ɛn lidɔm nekɛd insay in tɛnt.

²² We Am we na Kenan in papa kam, i si Noa lidɔm nekɛd, ɛn rɔn go tɛl in tu brɔda dɛn.

²³ Shɛm ɛn Jefɛt naw tek klos, ol am biɛn dɛn sholda, tɔn dɛn fes ɛn go insay di tɛnt wit dɛn bak so dat dɛn nɔ go si dɛn papa in nekɛd wan. Dɔn dɛn kɔba am.

²⁴ We Noa soba, i gɛt fɔ no wetin in las pikin Am du,

²⁵ so i swɛ Am in pikin Kenan. I se, “Kenan, nɔ go bɛtɛ. I go bi ɔdinari slev to in brɔda dɛn.”

²⁶ Dɔn i tɔk se, “Mek PAPA GƆD blɛs Shɛm di PAPA GƆD we na mi PAPA GƆD ɛn mek Kenan bi slev to am.

²⁷ Lɛ PAPA GƆD gi Jefɛt mɔ land. Mek Jefɛt gɛt pan wetin Shɛm gɛt ɛn mek Kenan bi slev to Jefɛt insɛf.”

²⁸ Afta di flɔd Noa bin de fɔ tri ɔndrɛd ɛn fifti ia mɔ,

²⁹ ɛn i day we i ol nayn ɔndrɛd ɛn fifti ia.