Jɛnɛsis 8 - Krio Fɔs Oli Baybul

Aw Di Flɔd Bin Dɔn

¹ PAPA GƆD nɔ bin fɔgɛt se Noa ɛn ɔl dɛn animal bin de insay di bot; i mek big briz blo, ɛn di wata bigin go dɔŋ.

² PAPA GƆD lɔk ɔl dɛn say we wata bin de pas ɔnda grɔn, ɛn lɔk di klawd fɔ mek ren nɔ kam.

³ Di wata bigin go dɔŋ smɔl smɔl. Bay di tɛm we i de wan ɔndrɛd ɛn fifti de, i dɔn go dɔŋ dɔn.

⁴ Di sɛvintin de na di mɔnt we mek sɛvin, di ak bin slam na mawnt Ararat.

⁵ Di wata bin de go dɔŋ te di mɔnt we mek tɛn. Di fɔs de na da mɔnt de dɛn bigin si di mawnten dɛn.

⁶ Afta fɔti de bifo Noa bin opin wan winda,

⁷ ɛn i sɛn wan revɛn Di bɔd go ɛn i bigin de flay rawnd rawnd sote di wata dray.

⁸ Afta dat Noa sɛn wan dɔv fɔ go luk if di wata dɔn dray,

⁹ bɔt we di dɔv si se di wata bin stil de ɔlsay ɛn nɔ gɛt ples fɔ tinap, i flay go bak na di ak. Noa put in an na do ɛn briŋ di bɔd kam insay saful.

¹⁰ Noa wet fɔ ɔda sɛvin de bifo i sɛn di dɔv go bak.

¹¹ Di dɔv tɔn bak ivin tɛm wit ɔliv lif nain mɔt. Dat mek Noa no se di wata dɔn de dray.

¹² Noa bin wet fɔ ɔda sɛvin de bak bifo i sɛn di dɔv wantɛm mɔ; dis tɛm di dɔv nɔ kam bak.

¹³ Di fɔs de na di fɔs mɔnt, we Noa siks ɔndrɛd ɛn wan ia, ɔl di wata dray. Noa pul di kɔba we de pan di ak, i luk rawnd, ɛn i si se di wata dɔn dray na di grɔn.

¹⁴ Na di twɛnti-sɛvin de na di sɛkɛn mɔnt di wata dray na di grɔn ɔltogɛda.

¹⁵ PAPA GƆD tɛl Noa se,

¹⁶ “Kɔmɔt insay di ak wit yu wɛf, yu bɔypikin dɛn, ɛn dɛn wɛf.

¹⁷ Pul ɔl di bɔd ɛn di animal dɛn na do, dɛn go bɔn pikin ɛn de ɔlsay na di wɔl.”

¹⁸ So Noa kɔmɔt insay di ak wit in wɛf, in bɔypikin dɛn, ɛn dɛn wɛf.

¹⁹ Ɔl di animal ɛn bɔd dɛn bin kɔmɔt insay di ak bay pia, wankayn to wankayn.

Noa Ɔfa Sakrifays

²⁰ Noa bil ɔlta fɔ PAPA GƆD. I tek tu-tri pan di ‘klin’ animal ɛn klin bɔd dɛn, ɛn bɔn dɛn wanol wan fɔ sakrifays pantap di ɔlta.

²¹ We di sakrifays bin de bɔn, in sɛnt bin so fayn dat i mek PAPA GƆD in at gladi, nain i tɔk nain at se, “A nɔ go swɛ di wɔl igen fɔseka wetin mɔtalman de du; a no se frɔm we i smɔl na soso bad tin i de tink bɔt. A nɔ go ɛva pwɛl ɔltin we gɛt layf na dis wɔl, lɛkɛ aw a jɛs du.

²² Wans di wɔl nɔ dɔn yet, tɛm go de fɔ plant ɛn tɛm go de fɔ avɛst; di ples go kol ɛn di ples go wam; Sɔma ɛn Winta” go de; do go klin, nɛt go kam. Ɔl dis nɔ go ɛva tap.