Jɛnɛsis 7 - Krio Fɔs Oli Baybul

Aw PAPA GƆD Mek Di Ples Flɔd

¹ PAPA GƆD tɛl Noa se, “Go insay di ak wit ɔl udat tap na yu os. A dɔn si se na yu wangren pan yu kɔmpin dɛn de du wetin rayt na mi yay.

² Pan ɔl dɛn animal we dɛn de it, tek sɛvin pia, bɔt pan di wan dɛn we dɛn nɔ de it, jɛs tek wan man ɛn wan uman nɔmɔ.

³ Tek sɛvin pia pan dɛn bɔd dɛnsɛf, man ɛn uman. Yu fɔ du so fɔ mek ɔl di animal ɛn bɔd dɛn go bɔn dɛn yon pikin so dɛn kayn go de bak na di wɔl.

⁴ Frɔm tide, di de we mek sɛvin a go sɛn flɔd we go kam fɔ fɔti de ɛn fɔti nɛt. I go pwɛl ɔltin we a bin dɔn mek.”

⁵ Noa du ɔl wetin PAPA GƆD tɛl am fɔ du.

⁶ Noa bin ol siks ɔndrɛd ia we PAPA GƆD sɛn dis flɔd kam na di wɔl.

⁷ In, in wɛf, in bɔypikin dɛn ɛn dɛn wɛf, bin de insay di ak so di flɔd nɔ mit dɛn.

⁸ Dɛn animal dɛn we ‘klin’, dɛn wan we ‘nɔ klin’, dɛn bɔd dɛnsɛf ɛn ɔl dɛn tin we de krip na grɔn, ɔl go insay di ak wit dɛn.

⁹ Dɛn bin de tu-tu, wan man ɛn wan uman, jɛs lɛkɛ aw PAPA GƆD bin dɔn tɛl Noa.

¹⁰ Di flɔd kam di de we mek sɛvin.

¹¹ Di flɔd kam di ia we mek Noa siks ɔndrɛd ia, ɛn i kam di sɛvintin de na di sɛkɛn mɔnt. Da de de, ɔl dɛn wata we de pas ɔnda di grɔn bɔs opin ɛn di klawd sɛf opin.

¹² Di flɔd bin de na di wɔl fɔ fɔti de ɛn fɔti nɛt.

¹³ Da sem tɛm de, Noa, in wɛf ɛn in tri bɔypikin dɛn we na Shɛm, Am, ɛn Jefɛt ɛn dɛn yon wɛf, bin go insay di ak.

¹⁴ Ɔlkayn animal bin de insay di ak; di wan dɛn fɔ tap wit pipul ɛn dɛn wayl bist, big ɛn smɔl, ɛn ɔlkayn bɔd.

¹⁵ Tu-tu pan ɔlkayn tin we gɛt layf bin de insay di ak wit Noa,

¹⁶ man ɛn uman, jɛs lɛkɛ aw PAPA GƆD bin tɛl am fɔ du. We dɛn ɔl dɔn go insay, PAPA GƆD lɔk di ak in do.

¹⁷ Di flɔd kam fɔ fɔti de ebi, ebi wan, ɛn di wata bin ay we mek di ak flot.

¹⁸ Di wata bin so bɔku ɛn ay, so di ak bigin fɔ drif.

¹⁹ I ay sote i kɔba ɔl di ay ay mawnten dɛn;

²⁰ i kam ɔp sote i rich bɔt sɔm twɛnti-fayv fut pas ɔl di mawnten dɛn.

²¹ Ɔltin we bin de na di wɔl day, ɔl dɛn bɔd, animal, di wan dɛn we tap wit pipul, di wayl bist, ɛn ɔl dɛn mɔtalman sɛf.

²² Ɔltin we bin de na di wɔl we gɛt layf day.

²³ PAPA GƆD pwɛl ɔltin we gɛt layf na wɔl, mɔtalman, animal ɛn bɔd. Di wan dɛn nɔmɔ we bin lɛf, na Noa ɛn dɛn wan dɛn we bin de insay di ak wit am.

²⁴ Di wata nɔ bin bigin go dɔŋ te te wan ɔndrɛd ɛn fifti de dɔn pas.