Jɛnɛsis 6 - Krio Fɔs Oli Baybul

Di Bad We Mɔtalman Bad

¹ We mɔtalman bigin bɔku na di wɔl ɛn na soso gyal pikin dɛn bin de bɔn,

² sɔm pan PAPA GƆD in pikin dɛn dɛn bin si se dɛn gyal pikin ya so fayn, so dɛn fɔl fɔ dɛn ɛn bigin maredd dɛn.

³ Na dat mek PAPA GƆD se, “Mi Spirit nɔ go de wit mɔtalman sote go as dɛn na ɔdinari mɔtalman; as frɔm tide dɛn nɔ go de pas wan ɔndrɛd ɛn twɛnti ia.”

⁴ Da tɛm de, ɛn ivin afta dat, di pikin dɛn we di enjɛl dɛn bin de bɔn wit dɛn uman we dɛn bin mared, na bin jayant dɛn. Na dɛn sem wan bi big bigman dɛn ɛn dɛn bin femɔs.

⁵ We PAPA GƆD si se mɔtalman in wikɛdnɛs dɔn pasmak, ɛn na bad nɔmɔ i de mɛmba ɔltɛm,

⁶ i fil am bad we i mek mɔtalman ɛn put am na di wɔl. In at pwɛl,

⁷ ɛn i se, “A go kil ɔl wetin a dɔn put na di wɔl; mɔtalman, big ɛn smɔl animal, dɛn tin dɛn we de krip na grɔn ɛn dɛn bɔd dɛn we de flay. A rigrɛt sɛf we a mek dɛn ɔl put na wɔl.”

⁸ Bɔt pan ɔl dis, Noa bin mek PAPA GƆD in at gladi wit am.

Noa

⁹ Noa bin de du wetin rayt bifo PAPA GƆD. Nain wangren nɔ bin gɛt fɔlt pan ɔl in kɔmpin dɛn. Ɛn in ɛn PAPA GƆD na bin padi.

¹⁰ I bin gɛt tri bɔypikin dɛn. Dɛn nem na Shɛm, Am ɛn Jefɛt.

¹¹ Da tɛm de ɔlman na di wɔl bin bad na PAPA GƆD in yay dɔn na soso fɛt fɛt ɛn bad bad tin dɛn bin de apin.

¹² PAPA GƆD si se dis bad dɔn pasmak na di wɔl.

¹³ PAPA GƆD tɛl Noa se, “A dɔn mekɔp fɔ dɔnawe wit ɔlman na dis wɔl as na soso fɛt fɛt ɛn bad bad tin de apin ɛn na dat mek di wɔl bad so. A go kil ɔlman ɛn pwɛl di wanol wɔl.

¹⁴ Tek gud bod ɛn bil Ak fɔ yusɛf; mek rum dɛn insay ɛn kɔba am wit ta insay ɛn na do.

¹⁵ Mek i bi fɔ ɔndrɛd ɛn fifti fut lɔŋ, sɛvinti fayv fut wayd, ɛn fɔti-fayv fut ay.

¹⁶ Mek i gɛt ruf ɛn lɛf wan etin inchis spes bitwin di ruf ɛn di sayd dɛn. Mek am tri dɛk ɛn put do na di sayd.

¹⁷ A de sɛn flɔd na di wɔl fɔ pwɛl ɔltin we gɛt layf. Ɔltin na di wɔl go day.

¹⁸ Bɔt a go mek Kɔvinant wit yu. Yu go go insay di ak wit yu wɛf, yu bɔypikin dɛn, ɛn dɛn wɛf.

¹⁹ Tek tu tu pan ɔltin we gɛt layf na di wɔl, wan man, wan uman.

²⁰ Tek tu-tu pan ɔl di difrɛn difrɛn bɔd dɛn, tu-tu pan di difrɛn difrɛn animal dɛn, tu-tu pan ɔltin we de krip na grɔn. Yu fɔ tek tu-tu pan ɔl wetin a dɔn mek fɔ de wit yu insay di ak mek dɛn nɔ day.

²¹ Yu fɔ kɛr ɔlkayn it go insay di ak ɛn kip am de fɔ yu ɛn fɔ dɛn.”

²² Noa du ɔl wetin PAPA GƆD tɛl am fɔ du.