Jɛnɛsis 50 - Krio Fɔs Oli Baybul

¹ Josɛf lidɔm pan in papa. I kis am ɛn kray pan am.

² Dɔn, i gi ɔda to di dɔkta dɛn we de wok fɔ am fɔ ɛmbam di bɔdi.

³ Di dɔkta dɛn tek fɔti de fɔ ɛmbam di bɔdi. Dɔn di Ijipshian dɛn tek sɛvinti de, de munin fɔ Jekɔb.

⁴ We di tɛm fɔ munin dɔn, Josɛf tɛl di kiŋ in bigman dɛn fɔ tɔk to di kiŋ fɔ am. I tɛl dɛn fɔ tɛl di kiŋ se

⁵ in papa bin mek i swɛ se, we i day ɛnitɛm, fɔ go bɛr am na di bɛrin grɔn usay dɛn bɛr in pipul dɛn na Kenan. I tɛl dɛn fɔ aks di kiŋ fɔ pamishɔn fɔ mek i go go bɛr in papa ɛn kam bak.

⁶ Di kiŋ gri fɔ mek i go bɛr in papa lɛkɛ aw i bin dɔn swɛ.

⁷ So ɔl di kiŋ in bigman dɛn ɛn ɔl dɛn ɔda wan dɛn we de bifo na di kot na Ijipt fala Josɛf go bɛr in papa.

⁸ In fambul dɛn, ɛn in brɔda dɛn ɔl bin go wit am. Na dɛn smɔl smɔl pikin dɛn nɔmɔ wit dɛn ship, got ɛn dɛn ɔda animal dɛn bin lɛf na Goshɛn.

⁹ Dɛn mek layn wit di ɔs ɛn ɔs ɛn karej dɛn. Bɔku pipul bin go di bɛrin.

¹⁰ We dɛn rich na wan ples we nem Atad nia Riva Jɔdan usay dɛn kin dray sid, dɛn kray bita bita wan ɛn mek bɛrin de fɔ sɛvin de.

¹¹ We di Kenanayt dɛn si aw di pipul dɛn de kray na Atad, dɛn chenj di ples in nem ɛn kɔl am “Ebɛl Mizraim” bikɔs dɛn se “na di ples dis fɔ di Ijipshian dɛn fɔ kam kray ɛn mek bɛrin.”

¹² Jekɔb in bɔypikin dɛn du wetin i bin tɛl dɛn fɔ du;

¹³ dɛn kɛr in dedebɔdi go na Kenan ɛn bɛr am na di kev we de na di fil na Makpila we de nia Mamrɛ, we Ebraam bin dɔn bay fɔ bɛrin grɔn na Ɛfrɔn da Itayt man in an.

¹⁴ We Josɛf dɔn bɛr in papa dɔn, in ɛn in brɔda dɛn ɛn ɔl di pipul we bin go di bɛrin tɔn bak go Ijipt.

Josɛf Ɛn In Brɔda Dɛn

¹⁵ Afta Josɛf in papa dɔn day, Josɛf in brɔda dɛn se dɛn nɔ no if Josɛf stil et dɛn ɛn wan pe dɛn bak fɔ di bad we dɛn bin dɔn du am.

¹⁶ So dɛn sɛn mɛsej to Josɛf se bifo in papa day, i bin lɛf wɔd se

¹⁷ lɛ dɛn aks am fɔ fɔgiv dɛn fɔ di bad we dɛn bin dɔn du to am. Dɛn se, dɛn nain papa in PAPA GƆD in pikin dɛn. Duya, fɔgiv dɛn fɔ di bad tin dɛn we dɛn dɔn du. Josɛf kray we i yɛri di mɛsej.

¹⁸ Josɛf in brɔda dɛn kam fɔdɔm bifo am. Dɛn se, dɛn nain slev.

¹⁹ Bɔt Josɛf tɛl dɛn se, lɛ dɛn nɔ fred. In nɔto PAPA GƆD we de pɔnish ɔ jɔj pɔsin.

²⁰ I se dɛn tay bagin fɔ du am bad, bɔt PAPA GƆD tɔn di bad to gud so dat plɛnti pipul nɔ dɔn day de lɛkɛ da de de fɔseka wetin apin.

²¹ I se lɛ dɛn nɔ fred. In go mɛn dɛn ɛn dɛn pikin dɛn. I tɔk to dɛn fayn fayn wan ɛn dɛn wɔd de bin lɛf na dɛn at.

Josɛf Day

²² Josɛf bin de Ijipt wit in papa in fambul dɛn; i day we i ol wan ɔndrɛd ɛn tɛn ia.

²³ I bin de fɔ si Ifrem in pikin dɛn. Dɔn Manasɛ in bɔypikin, Maka, insɛf yon pikin bin bɔn na Josɛf in an.

²⁴ I tɛl in brɔda dɛn se, in kin day ɛnitɛm da tɛm de, bɔt PAPA GƆD go luk dɛn ɛn pul dɛn kɔmɔt na Ijipt ɛn kɛr dɛn go saful wan usay i bin dɔn prɔmis Ebraam, Ayzak ɛn Jekɔb.

²⁵ Josɛf mek in pipul dɛn swɛ to am se, we dɛn de go na di kɔntri we PAPA GƆD dɔn prɔmis dɛn; dɛn go kɛr in bɔdi go.

²⁶ Josɛf day na Ijipt ɛn i bin ol wan ɔndrɛd ɛn tɛn ia. Dɛn ɛmbam in bɔdi ɛn put am insay kɔfin na Ijipt.