Jɛnɛsis 5 - Krio Fɔs Oli Baybul

Adam In Jɛnareshɔn

¹ Dis na di wan dɛn na Adam in Jɛnareshɔn. We PAPA GƆD mek mɔtalman, i mek dɛn lɛkɛ insɛf.

² I mek man ɛn uman, i blɛs dɛn, ɛn i kɔl dɛn “Mɔtalman.”

³ We Adam bin ol wan ɔndrɛd ɛn tati ia, i bɔn wan bɔypikin we tan lɛkɛ am, ɛn i gi am nem Sɛth.

⁴ Afta dat, Adam de fɔ et ɔndrɛd ia mɔ, ɛn bɔn ɔda bɔy ɛn gyal pikin dɛn.

⁵ Adam ol nayn ɔndrɛd ɛn tati ia we i day.

⁶ We Sɛth bin ol wan ɔndrɛd ɛn fayv ia, i bɔn wan bɔypikin we nem Inɔsh.

⁷ Afta dat, i de fɔ et ɔndrɛd ɛn sɛvin ia mɔ. Sɛth bɔn ɔda bɔy ɛn gyal pikin dɛn,

⁸ ɛn day we i ol nayn ɔndrɛd ɛn twɛlv ia.

⁹ We Inɔsh ol naynti ia, i bɔn wan bɔypikin we nem Kenan.

¹⁰ Afta dat, i de fɔ et ɔndrɛd ɛn fiftin ia mɔ. I bɔn ɔda bɔy ɛn gyal pikin dɛn.

¹¹ Inɔsh ol nayn ɔndrɛd ɛn fayv ia we i day.

¹² We Kenan ol sɛvinti ia, i bɔn wan bɔypikin we nem Maalalɛl.

¹³ Afta dat, i de fɔ et ɔndrɛd ɛn fɔti ia mɔ. I bɔn ɔda bɔy ɛn gyal pikin dɛn.

¹⁴ Kenan day we i ol nayn ɔndrɛd ɛn tɛn ia.

¹⁵ We Maalalɛl ol siksti-fayv ia, i bɔn wan bɔypikin we nem Jarɛd.

¹⁶ Afta dat, i de fɔ et ɔndrɛd ɛn tati ia mɔ. Insɛf bɔn ɔda bɔy ɛn gyal pikin dɛn.

¹⁷ Maalalɛl day we i ol et ɔndrɛd ɛn naynti-fayv ia.

¹⁸ We Jarɛd ol wan ɔndrɛd ɛn siksti-tu ia, i bɔn wan bɔypikin we nem Inɔk.

¹⁹ Afta dat, i de fɔ et ɔndrɛd ia mɔ. I bɔn ɔda bɔy ɛn gyal pikin dɛn.

²⁰ Jarɛd day we i ol nayn ɔndrɛd ɛn siksti-tu ia.

²¹ We Inɔk ol siksti-fayv ia, i bɔn wan bɔypikin we nem Mɛtyusila.

²² Inɔk ɛn PAPA GƆD na bin padi fɔ tri ɔndrɛd ia, ɛn na da tɛm de i bɔn ɔda bɔy ɛn gyal pikin dɛn.

²³ Inɔk ol tri ɔndrɛd ɛn siksti-fayv ia.

²⁴ Inɔk ɛn PAPA GƆD na bin padi; wande i jɛs lɔs, bikɔs PAPA GƆD bin tek am go.

²⁵ We Mɛtyusila ol wan ɔndrɛd ɛn eti-sɛvin ia, i bɔn wan bɔypikin we nem Lamɛk.

²⁶ Afta dat, Mɛtyusila de fɔ sɛvin ɔndrɛd ɛn eti-tu ia mɔ. I bɔn ɔda bɔy ɛn gyal pikin dɛn,

²⁷ Mɛtyusila day we i ol nayn ɔndrɛd ɛn siksti-nayn ia.

²⁸ We Lamɛk ol wan ɔndrɛd ɛn eti-tu ia, i bɔn wan bɔypikin,

²⁹ ɛn i se, “PAPA GƆD bin dɔn swɛ dis grɔn se i nɔ go bɛtɛ. Dis pikin ya so go ɛp pul wi pan di traŋa wok we wi bin dɔn de du. Fɔseka, dat i gi am nem Noa.

³⁰ Afta dat, Lamɛk de fɔ fayv ɔndrɛd ɛn naynti-fayv ia mɔ. I bɔn ɔda bɔy ɛn gyal pikin dɛn.

³¹ I day we i ol sɛvin ɔndrɛd ɛn sɛvinti-sɛvin ia.

³² Bay di tɛm we Noa de ol fayv ɔndrɛd ia, i bin dɔn bɔn tri bɔypikin dɛn we i gi nem Shɛm, Am ɛn Jefɛt.