Jɛnɛsis 45 - Krio Fɔs Oli Baybul

Josɛf Tɛl In Brɔda Dɛn Udat I Bi

¹ Josɛf nɔ bin ebul kɔntrol insɛf igen bifo in wokman dɛn, so i tɛl dɛn ɔl fɔ jɛs go na do saful. I nɔ bin want ɔda pɔsin fɔ de de we i de tɛl in brɔda dɛn udat i bi.

² I kray lawd lawd wan. Di Ijipshian dɛn yɛri, so dɛn kɛr di nyuz go na di kiŋ in os.

³ I tɛl in brɔda dɛn se in na Josɛf ɛn aks if in papa de te naw. In brɔda dɛn so skyad dat dɛn tɔn mumu wantɛm. Dɛn nɔ ebul biliv se nain tinap bifo dɛn korokoro wan so.

⁴ Josɛf kɔl dɛn fɔ go nia am. We dɛn go nia am, i tɛl dɛn se in na dɛn brɔda Josɛf, we dɛn bin sɛl gi dɛn Ijipshian dɛn.

⁵ I se lɛ dɛn nɔ fil bad ɛn lɛ dɛn nɔ blem dɛnsɛf bikɔs na PAPA GƆD du am so. I se, PAPA GƆD sɛn am go bifo dɛn fɔ mek de lɛkɛ da de de bɔku pipul nɔ go day.

⁶ I se na tu ia nɔmɔ di aŋri dɔn de fɔ, ɛn i gɛt fɔ de fayv mɔ ia we pipul nɔ go ebul fɔ mak fam ɛn avɛst ɛnitin.

⁷ I se PAPA GƆD sɛn am go bifo dɛn so dat dɛn ɛn dɛn jɛnareshɔn dɛn nɔ go day.

⁸ I se na PAPA GƆD sɛn am go de, nɔto dɛn, ɛn ɔl di kiŋ in biznɛs nain os de nain an. Infakt PAPA GƆD dɔn mek i bi bigman pas ɔlman na Ijipt pas di kiŋ nɔmɔ.

⁹ So i tɛl dɛn mek dɛn mekes go tɛl in papa se, in se, PAPA GƆD dɔn mek i bi di bigman pas ɔlman na Ijipt; so mek i mekes kam mit am de.

¹⁰ I se in papa fɔ kam tap na di siti we nem Goshɛn so i go de nia am. I fɔ kam wit in pikin ɛn grampikin dɛn, in ship, got, ɛn ɔl wetin i gɛt.

¹¹ I se dɛn fɔ tɛl am se, di aŋri gɛt fɔ de fɔ fayv ia mɔ. So i fɔ mek kam mek in fambul dɛn ɛn ɔl udat de wit am nɔ sɔfa.

¹² Josɛf bin tɛl dɛn igen se, dɛn ɔl wit Bɛnjamin insɛf dɔn si fɔ tru tru se in we de tɔk to dɛn so na Josɛf.

¹³ I se dɛn fɔ tɛl in papa bɔt di pawa we i gɛt na Ijipt. Dɛn fɔ tɛl am bɔt ɔl wetin dɛn dɔn si, mek i mekes kam na Ijipt.

¹⁴ I grip in brɔda Bɛnjamin ɛn dɛn tu bɔskray wit gladi.

¹⁵ Dɛn i kis in brɔda dɛn wan bay wan. Na so i de kray wit gladi. Afta dat, in brɔda dɛn fil fri fɔ tɔk to am.

¹⁶ We di nyuz rich di kiŋ se Josɛf in brɔda dɛn dɔn kam, di kiŋ ɛn in ɔfisa dɛn ɔl gladi.

¹⁷ Di kiŋ tɛl Josɛf se mek i tɛl in brɔda dɛn mek dɛn lod dɛn animal ɛn mek dɛn go kwik na Kenan,

¹⁸ ɛn lɛ dɛn tek dɛn papa ɛn ɔl dɛn fambul dɛn mek dɛn tɔn bak kam na Ijipt. I se in go gi dɛn di say we fayn pas ɔl na Ijipt ɛn dɛn go gɛt bɔku gud tin fɔ it.

¹⁹ I tɛl am igen se mek dɛn go wit wagɔn dɛn frɔm Ijipt we dɛn go put dɛn wɛf ɛn di smɔl pikin dɛn ɛn fɔ dɛn papa fɔ briŋ dɛn kam.

²⁰ I se lɛ dɛn nɔ wɔri bɔt dɛn prɔpati we dɛn de lɛf biɛn, di ples we fayn pas ɔl na Ijipt go bi dɛn yon.

²¹ Izrɛl in pikin dɛn bin du wetin di kiŋ se, Josɛf gi dɛn di wagɔn dɛn, lɛkɛ aw di kiŋ bin se, ɛn it fɔ di patrol.

²² I gi dɛn ɔl nyu klos, bɔt i gi Bɛnjamin tri ɔndrɛd silva kɔpɔ ɛn fayv sɛt nyu klos.

²³ I sɛn tɛn dɔŋki we lod wit fayn Ijipt it to in papa, ɛn tɛn dɔŋki lod wit it lɛkɛ bred, tin fɔ mek pap, ɛn ɔda af af tin dɛn we i go it na rod we i de kam.

²⁴ I sɛn in brɔda dɛn go; ɛn we dɛn de go, i tɛl dɛn mek dɛn nɔ mek plaba na rod.

²⁵ Dɛn kɔmɔt na Ijipt ɛn go bak to dɛn papa Jekɔb na Kenan.

²⁶ Dɛn tɛl dɛn papa se Josɛf de ɛn i nɔ day yet. In na big bigman na Ijipt. We Jekɔb yɛri dis in mɔt ful ɛn i nɔ bin biliv wetin dɛn se.

²⁷ Bɔt we dɛn gi am ɔl Josɛf in mɛsej, ɛn we i si di wagɔn dɛn wit it we Josɛf sɛn, in at kam dɔŋ.

²⁸ I se, in biliv fɔ tru tru se in pikin Josɛf nɔ day yet ɛn in fɔ go si am bifo i day.