Jɛnɛsis 44 - Krio Fɔs Oli Baybul

Josɛf In Silva Kɔp Lɔs

¹ Josɛf tɛl di wokman nain os mek i ful-ɔp di man dɛn bag dɛn wit it we dɛn go ebul fɔ tot, ɛn put dɛn mɔni bak insay dɛn bag.

² I se mek i put in silva kɔp insay di smɔl brɔda in bag wit in kɔpɔ. Di wokman du wetin Josɛf tɛl am.

³ We do klin di brɔda dɛn ol rod fɔ go bak wit dɛn dɔŋki.

⁴ We dɛn dɔn go fa lilibit frɔm di big siti, Josɛf tɛl in wokman se, lɛ i mekes kwik ɛn go biɛn di man dɛn. I se we i mit dɛn, i fɔ aks dɛn wetin mek dɛn du bad fɔ gud

⁵ ɛn wetin mek dɛn tif in masta in silva kɔp we i de drink wit, ɛn de tek luk grɔn. I fɔ tɛl dɛn se dɛn dɔn du bad bad tin.

⁶ We di wokman rich dɛn, i tɛl dɛn jɛs wetin Josɛf se.

⁷ Dɛn aks am wetin mek i de tɔk to dɛn so. Dɛn se dɛn nɔ ɔndastand. Dɛn swɛ se dɛn nɔ go du da kayn tin de.

⁸ Dɛn se dɛn no se we dɛn bin fɛn mɔni na dɛn bag dɛn, dɛn bin kɛr am go bak. Dɛn se wetin mek dɛn go kam tif silva ɔ gold naw nain masta in os.

⁹ Dɛn, if i fɛn di kɔp wit ɛniwan pan dɛn, dɛn fɔ dɛn kil da pɔsin de, dɔn dɛn ɔl go bi in masta in slev dɛn.

¹⁰ Di wokman se ɔrayt; bɔt dat na di wan nɔmɔ we tek di kɔp go bi in masta in slev, dɔn dɛn kin go.

¹¹ Dɛn mekes put dɛn bag dɛn dɔŋ na grɔn ɛn bigin opin dɛn wan bay wan.

¹² Josɛf in wokman bigin sach frɔm di big wan in bag sote rich to di smɔl wan, ɛn i fɛn di kɔp na Bɛnjamin in bag.

¹³ We dis bi, di brɔda dɛn chɛr chɛr dɛn klos fɔ sho se dɛn fil am bad. Dɛn lod dɛn dɔŋki dɛn bak ɛn tɔn bak go na di siti.

¹⁴ Josɛf bin stil de na os we Juda ɛn in brɔda dɛn kam. Dɛn lidɔm na grɔn bifo am.

¹⁵ Josɛf aks dɛn wetin mek dɛn tif in kɔp. I se if dɛn nɔ no se bigman lɛkɛ am kin luk grɔn fɔ no udat tek am.

¹⁶ Juda ansa se dɛn nɔ gɛt ɛnitin fɔ se. I se natin nɔ de we dɛn go du fɔ sho se dɛn nɔ tif in kɔp. I se na PAPA GƆD de pɔnish dɛn fɔ di bad dɛn we dɛn dɔn du. I se dɛn ɔl dɔn tɔn bak fɔ bi in slev dɛn, nɔto di wan nɔmɔ we dɛn fɛn di kɔp to.

¹⁷ Na de Josɛf se, nɔ in nɔ go du da! Na di wan nɔmɔ we dɛn fɛn di kɔp to go bi in slev. I tɛl dɛn se lɛ dɛn go bak saful wan to dɛn papa.

Juda Beg Fɔ Bɛnjamin

¹⁸ Juda go mit Josɛf ɛn beg am mek i gi am chans fɔ tɔk to am. I se duya, mek i nɔ vɛks pan am, lɛ i bia am bikɔs in na lɛkɛ di kiŋ insɛf to am.

¹⁹ I se i bin aks am if dɛn gɛt papa ɛn smɔl brɔda.

²⁰ Dɛn tɛl am se dɛn gɛt ɛn se dɛn papa na olpa naw ɛn i bin bɔn da dɛn smɔl brɔda de we i bin dɔn ol. I se di bɔbɔ in wan mami brɔda bin dɔn day, so nain wangren dɔn lɛf pan in mama in pikin dɛn; in papa lɛk am bad bad wan.

²¹ I se in bin tɛl dɛn fɔ briŋ am kam mek i kam si am.

²² Dɛn bin ansa am se di bɔbɔ nɔ fɔ kɔmɔt nia in papa, ɔ nɔ so in papa go day.

²³ Nain i se, i nɔ go gri mek dɛn si am igen pas dɛn briŋ dɛn smɔl brɔda kam.

²⁴ We dɛn go bak to dɛn papa dɛn bin tɛl am wetin i se.

²⁵ Bɔt dɛn papa tɛl dɛn fɔ kam bak kam bay smɔl mɔ it.

²⁶ So dɛn ansa am se, dɛn nɔ go pas dɛn briŋ dɛn smɔl brɔda kam wit dɛn. I se dɛn tɛl am se di man nɔ go gri mek dɛn si am igen pas dɛn kam wit dɛn brɔda.

²⁷ Bɔt dɛn papa tɛl dɛn se, dɛn no se in wɛf bin bɔn tu bɔypikin dɛn fɔ am.

²⁸ Wan dɔn go lɛf am ɛn na wayl animal go dɔn chɛr chɛr am, bikɔs i nɔ si am igen frɔm we i go.

²⁹ So, if dɛn tek da wande naw nain an ɛn sɔntin go apin to am, na da sɔri de go de pan am te i day go Shiol lɛkɛ aw i dɔn ol so.

³⁰ So Juda beg Josɛf se in nɔ go ebul go bak to in papa if i nɔ kɛr di bɔbɔ go bikɔs i tan lɛkɛ dɛn ɔl tu layf na wan.

³¹ If in papa si se di bɔbɔ nɔ de wit am, i go jɛs fɔdɔm day: da tɛm de dɛn go se na dɛn kil am wit brok at lɛkɛ we i dɔn ol so.

³² I se in di Juda bin dɔn le in layf dɔŋ se in go go bak wit di bɔbɔ, ɛn se if i nɔ go bak wit am, in rɛdi fɔ tek di blem te i day.

³³ So i beg Josɛf fɔ mek in bi di slev, lɛ di bɔbɔ in go bak wit in brɔda dɛn. Juda se in go tap de mek i tek di bɔbɔ in ples ɛn bi Josɛf in slev; bɔt beg lɛ di bɔbɔ go bak wit in brɔda dɛn.

³⁴ I aks aw in go go bak to in papa if di bɔbɔ nɔ go wit am. I se in nɔ go want fɔ si wetin go bi to in papa.