Jɛnɛsis 41 - Krio Fɔs Oli Baybul

Josɛf Intaprit Di Kiŋ In Drim

¹ Afta tu ia dɔn pas, di kiŋ na Ijipt drim se i tinap nia Riva Nayl.

² I si sɛvin fat kaw dɛn we bin fayn fɔ luk, kɔmɔt insay di riva ɛn dɛn bigin fɔ it di gras.

³ Dɛn i si sɛvin ɔda kaw dɛnsɛf kɔmɔt insay di riva; bɔt dɛn bin wɔwɔ ɛn dray tumɔs. Dɛn dray wɔwɔ kaw ya kam tinap nia di fat fayn kaw dɛn nia di riva.

⁴ Di dray wɔwɔ kaw dɛn it di fat, fayn kaw dɛn. Nain i skyad wek.

⁵ Di kiŋ lidɔm slip bak ɛn drim igen Insay dis drim i si sɛvin ed kɔn we dɔn ful ɛn trɔŋ de gro na wan tik.

⁶ Sɛvin ɔda ed kɔn bin bɔs, bɔt di briz we kɔmɔt na di ist bin mek dɛn dray bad bad wan.

⁷ Nain dɛn dray ed kɔn dɛn ya so, swɛla di wan dɛn we bin dɔn ful. Di kiŋ skyad wek ɛn kechɔp se na drim i bin de drim.

⁸ We do klin i bin wɔri, so i sɛn kɔl ɔl in majikman ɛn sɛnsman dɛn we de na Ijipt. I tɛl dɛn in drim, bɔt nɔn pan dɛn nɔ bin ebul fɔ intaprit dɛn.

⁹ Na de di man we de sav wayn to di kiŋ se, na da de de in mɛmba wetin i fɔ dɔn du.

¹⁰ I se wan tɛm bin de we di kiŋ bin vɛks pan am ɛn di edman fɔ di bekaman dɛn, so i put dɛn na jel na di kapten fɔ di gyad dɛn, in os.

¹¹ Wan nɛt dɛn ɔl tu bin drim ɛn di drim dɛn bin gɛt difrɛn minin.

¹² I se wan yɔŋ Ibru bɔy bin de na jel wit dɛn, we bin de wok fɔ di gyad dɛn bɔsman. I se dɛn tɛl am dɛn drim, ɛn i intaprit di drim fɔ dɛn.

¹³ Tin dɛn bi, jɛs lɛkɛ aw i bin se. I se di kiŋ bin gi am in wok bak, ɛn i bin kil di bekaman.

¹⁴ Di kiŋ sɛn kɔl Josɛf, ɛn dɛn pul am kɔmɔt na jel wantɛm. We i dɔn shev ɛn chenj in klos, i go mit di kiŋ.

¹⁵ Di kiŋ tɛl am se in drim wan drim bɔt nɔbɔdi nɔ ebul fɔ intaprit am fɔ am, bɔt dɛn tɛl am se i kin intaprit drim.

¹⁶ Josɛf ansa am se di kiŋ se, nɔto in de intaprit drim, bɔt PAPA GƆD go intaprit am fɔ am.

¹⁷ Di kiŋ se, in drim se i tinap nia Riva Nayl,

¹⁸ nain sɛvin fat kaw dɛn we fayn fɔ luk, kɔmɔt insay di riva ɛn dɛn bigin fɔ it di gras.

¹⁹ Dɛn sɛvin ɔda dray kaw dɛn we gɛt soso bon bon apia. I se in nɔ wande si dɛn kayn wɔwɔ kaw de na Ijipt.

²⁰ Di dray kaw dɛn it di fat wan dɛn,

²¹ bɔt ɔl we dɛn dɔn it di fat wan dɛn dɔn, na so dɛn dray lɛkɛ aw dɛn bin tan. Na de in skyad wek.

²² Dɔn i drim bak se i si sɛvin ed kɔn we ful ɛn trɔŋ bin de gro na di sem tik.

²³ Dɔn ɔda sɛvin ed kɔn bɔs na di sem tik we di ist briz blo dɛn mek dɛn dray bad bad wan.

²⁴ Di dray ed kɔn dɛn swɛla di wan dɛn we ful ɛn trɔŋ. I se we i tɛl di majikman dɛn in drim dɛn nɔn nɔ ebul intaprit am fɔ am.

²⁵ Josɛf tɛl di kiŋ se, di tu drim dɛn min di sem tin; PAPA GƆD dɔn sho am wetin i gɛt fɔ du.

²⁶ Di sɛvin fat kaw na sɛvin ia, ɛn di sɛvin ed ful trɔŋ kɔn dɛnsɛf na sɛvin ia; dɛn gɛt di sem minin.

²⁷ Di sɛvin dray kaw dɛn ɛn di sɛvin ed dray kɔn min sɛvin ia aŋri.

²⁸ Jɛs lɛkɛ aw i tɛl am, PAPA GƆD dɔn sho am wetin i gɛt fɔ du.

²⁹ Sɛvin ia go de we it go de bɔku na Ijipt,

³⁰ bɔt afta dat aŋri go de fɔ sɛvin ɔda ia. Ɔlman go fɔgɛt bɔt di tɛm we it bin de bikɔs di aŋri go so bad dat i go pwɛl di kɔntri.

³¹ Dɛn go fɔgɛt bɔt di tɛm we tin bin plɛnti, bikɔs di aŋri we go kam go traŋa bad bad wan.

³² I se di kiŋ drim di sem tin tu tɛm bikɔs na tin we PAPA GƆD dɔn disayd fɔ du, ɛn i go bi jisnɔ.

³³ I tɛl di kiŋ se lɛ i pik man we gɛt sɛns ɛn put am inchaj ɔf di wanol kɔntri.

³⁴ Dɔn lɛ i pik ɔda man dɛn we go de inchaj fɔ kɔlɛkt wan pan fayv pat pan di tin dɛn we dɛn go avɛst insay di fɔs sɛvin ia we it go bɔku.

³⁵ Dɛn fɔ gɛda dɛn it ya ɛn kip dɛn na di kiŋ in yon sto so dat it go de ɔlsay na di kɔntri.

³⁶ Dɛn fɔ kip dɛn it ya so fɔ di sɛvin ia dɛn we it nɔ go de na di kɔntri so aŋri nɔ go kil di pipul dɛn.

Dɛn Mek Josɛf Bi Gɔvna Na Ijipt.

³⁷ Di kiŋ ɛn di ɔfisa dɛn bin gri fɔ du wetin Josɛf se.

³⁸ Ɛn i tɛl dɛn se, nɔbɔdi nɔ go ebul du di wok bɛtɛ pas Josɛf, we gɛt PAPA GƆD in spirit insay am

³⁹ I tɔn to Josɛf ɛn tɛl am se, as PAPA GƆD dɔn sho am ɔl dis, nɔbɔdi nɔ de igen we gɛt da kayn sɛns de nain kɔntri.

⁴⁰ So i go mek am bi edman nain kɔntri fɔ di projɛkt, ɛn ɔl in pipul dɛn go obe am. Di wan tin nɔmɔ, Josɛf go de sɛkɛn to am.

⁴¹ Ɛn frɔm da de de in di kiŋ dɔn mek Josɛf bi gɔvna na di kɔntri.

⁴² Di kiŋ pul in riŋ nain fiŋa we gɛt in mak pan am ɛn put am na Josɛf in fiŋa fɔ sho se i dɔn gɛt pawa. I wɛr fayn linin klos pan am, ɛn put gold chen rawnd in nɛk.

⁴³ I mek i rayd pan di ɔs ɛn karej we di sɛkɛn in kɔmand kin rayd ɛn in sikyɔriti dɛn de bifo de ala se, “Una gi rod! Una gi rod!” Na so Josɛf tek bi gɔvna na Ijipt.

⁴⁴ Dɛn di kiŋ tɛl am se, “Mi na di kiŋ bɔt nɔbɔdi na Ijipt nɔ go muf wan inch if yu nɔ tɛl am fɔ du so.”

⁴⁵ Di kiŋ chenj Josɛf in nem to Zafɛnath Pania we na Ijipshian nem, ɛn gi am Asɛnath we na Pɔtifɛra in gyal pikin fɔ bi in wɛf. Pɔtifɛra na bin man we de mek sakrifays fɔ pipul sin na On. So Josɛf ebul fɔ go ɔlsay insay Ijipt.

⁴⁶ Josɛf bin ol tati ia we i bigin fɔ sav di kiŋ na Ijipt. I bin kɔmɔt na di kiŋ in ples ɛn i waka ɔlsay na di kɔntri.

⁴⁷ We di fɔs sɛvin ia kam it bin plɛnti na di kɔntri.

⁴⁸ Josɛf gɛda bɔku it ɛn kip dɛn na di big siti dɛn sto. I kip di it we kɔmɔt na ɛni fam na di big siti in sto we de nia da fam de.

⁴⁹ Di it bin so plɛnti dat Josɛf tap fɔ mɛnshɔ am. It bin bɔku lɛkɛ sansan na bich.

⁵⁰ Bifo di ia dɛn kam we di aŋri fɔ de, Asɛnath dat na Pɔtifɛra di man we kin mek sakrifays fɔ pipul sin, in gyal pikin bin dɔn bɔn tu bɔypikin dɛn fɔ Josɛf.

⁵¹ Josɛf gi in fɔs-bɔy-pikin nem Manasɛ. I se, “PAPA GƆD dɔn mek a fɔgɛt ɔl mi waala ɛn ɔl mi papa in fambul dɛn.”

⁵² I gi in sɛkɛn pikin nem Ifrem. I tɔk se, “PAPA GƆD dɔn gi mi pikin na di kɔntri usay a sɔfa.”

⁵³ Di sɛvin ia we it bin plɛnti na Ijipt bin kam ɛn pas,

⁵⁴ dɔn di sɛvin ia we di aŋri fɔ bigin kam lɛkɛ aw nɔmɔ Josɛf bin se. Aŋri bin de na dɛn ɔda kɔntri, bɔt it bin de na Ijipt.

⁵⁵ We di aŋri bigin fɔ mɔna di pipul dɛn na Ijipt, dɛn go kray to di kiŋ fɔ it, so di kiŋ tɛl dɛn fɔ go to Josɛf, ɛn du wetin i tɛl dɛn fɔ du.

⁵⁶ Di aŋri bin traŋa dat i prɛd ɔlɔbɔt na di kɔntri. Josɛf opin di sto ɛn sɛl kɔn gi di pipul dɛn na Ijipt.

⁵⁷ Pipul dɛn bin de kɔmɔt ɔlsay na di wɔl fɔ go bay it to Josɛf na Ijipt, bikɔs di aŋri bin dɔn pasmak ɔlsay.