Jɛnɛsis 40 - Krio Fɔs Oli Baybul

Josɛf Intaprit Dɛn Jelman Dɛn Drim

¹ Afta sɔntɛm di man we bin de sav di kiŋ na Ijipt wayn ɛn di edman fɔ in bekaman dɛn bin ambɔg di kiŋ.

² Dat mek i vɛks bad bad wan pan di tu wokman dɛn,

³ so i sɛn dɛn go jel na di kapten fɔ di gyad in os, na di sem ples we Josɛf bin de.

⁴ Dɛn bin te na di jel ɛn di kapten fɔ di gyad mek Josɛf tek kia ɔf dɛn.

⁵ Wan nɛt we dɛn de na jel nain di man we bin de sav wayn to di kiŋ ɛn di edman fɔ di bekaman dɛn drim, ɛn di drim dɛn bin gɛt difrɛn minin.

⁶ We Josɛf kam to dɛn na mɔnin, i si se sɔntin de wɔri dɛn.

⁷ I aks dɛn se wetin de wɔri dɛn.

⁸ Nain dɛn se dɛn ɔl tu drim, bɔt nɔbɔdi nɔ de de fɔ intaprit di drim dɛn. Josɛf aks dɛn if nɔto PAPA GƆD de gi sɛns fɔ intaprit drim. I se lɛ dɛn tɛl am dɛn drim.

⁹ Na de di man we bin de sav wayn to di kiŋ se, in drim i si grep tik tinap bifo am.

¹⁰ Di tik gɛt tri branch dɛn pan am bɔt as di lif dɛn pan di tik bigin bɔs so, di flawa dɛnsɛf bigin bɔs fayn fayn wan dɔn i bigin bia bɔnch greps we rɛp wantɛm.

¹¹ I se in bin ol di kiŋ in kɔp; so i pik di greps dɛn ɛn kwis dɛn insay di kɔp ɛn gi di kiŋ.

¹² Na de Josɛf tɛl am wetin di drim min. I se, di tri branch dɛn min tri de.

¹³ Insay tri de di kiŋ go pul am na jel. I go fɔgiv am ɛn gi am in wok bak. In go de sav am wayn lɛkɛ aw i bin de du.

¹⁴ Josɛf beg am se duya lɛ i nɔ fɔgɛt am we i kɔmɔt na di jel, lɛ i tɛl di kiŋ bɔt am ɛn ɛp am mek insɛf kɔmɔt de

¹⁵ bikɔs, na kech dɛn kech am na Ibru kɔntri we mek in de de ɛn naw in nɔ du natin fɔ mek dɛn put am na jel.

¹⁶ We di edman fɔ di bekaman dɛn si se di drim bin fayn fɔ di man we bin de sav wayn to di kiŋ bay aw Josɛf intaprit am, insɛf tɛl Josɛf in drim. I se insɛf bin drim i tot tri blay bred nain ed.

¹⁷ Di blay we bin de pantap gɛt ɔlkayn gud it dɛn we dɛn bek fɔ di kiŋ, bɔt bɔd dɛn bin de it dɛn.

¹⁸ Josɛf tɛl am wetin di drim min: I se di tri blay min tri de.

¹⁹ Insay tri de di kiŋ go pul am na jel ɛn i go kɔt in ed kɔmɔt! Dɛn go ɛŋ in bɔdi na tik, ɛn bɔd dɛn go it in bɔdi.

²⁰ Insay tri de di kiŋ mek pati fɔ in bathde ɛn kɔl ɔl in ɔfisa dɛn; i pul di tu man dɛn kɔmɔt na jel ɛn mek dɛn tinap bifo di ɔfisa dɛn.

²¹ I mek di man we bin de sav wayn bigin wok ɛn gi am in post bak,

²² bɔt i kil di edman fɔ di bekaman dɛn. Ɔltin apin jɛs lɛkɛ aw Josɛf bin tɛl dɛn.

²³ Bɔt di man we bin de sav wayn to di kiŋ nɔ mɛmba Josɛf igen sɛf. I fɔgɛt bɔt am ɔltogɛda.