Jɛnɛsis 39 - Krio Fɔs Oli Baybul

Aw Josɛf Ɛn Pɔtifa In Wɛf Pas

¹ Di Ishmɛlayt dɛn kɛr Josɛf go na Ijipt ɛn sɛl am gi Pɔtifa, wan pan di kiŋ in ɔfisa dɛn. Nain na bin di kapten fɔ di gyad dɛn na di kiŋ in os.

² PAPA GƆD bin de wit Josɛf ɛn mek bɛtɛ fala am. I bin tap nain Ijipshian masta in os.

³ Pɔtifa bin si se PAPA GƆD de wit Josɛf ɛn de mek bɛtɛ fala am pan ɛnitin we i de du.

⁴ Pɔtifa in at bin so tek am dat i lɛf ɔl in biznɛs nain os nain an.

⁵ Fɔseka Josɛf PAPA GƆD blɛs ɔl wetin de insay di Ijipt kapten in os ɛn in fam dɛn.

⁶ Pɔtifa an ova ɔl in biznɛs to Josɛf ɛn i nɔ wɔri insɛf bɔt ɛnitin pas di it we i de it. Josɛf na bin fayn man,

⁷ ɛn afta sɔm tɛm Josɛf in masta in wɛf bi want am, so i aks am fɔ mek dɛn gɛt biznɛs.

⁸ Josɛf nɔ gri ɛn tɛl am se, in masta nɔ de wɔri insɛf fɔ ɛnitin na di os, bikɔs in de. I se i dɔn put am inchaj ɔf ɔl wetin i gɛt.

⁹ I se in gɛt pawa na di os lɛkɛ insɛf, ɛn i nɔ ayd natin pan am pas in we nain wɛf. I se, wetin fɔ mek in du dis kayn wikɛd tin ɛn sin to PAPA GƆD.

¹⁰ Di uman bin de mɔna Josɛf ɛvride, bɔt i nɔ gri fɔ lidɔm wit am ɔ go nia am.

¹¹ Wande we Josɛf go insay di os fɔ go du in wok, we nɔn pan di ɔda wokman dɛn nɔ bin de insay,

¹² Pɔtifa in wɛf grip in klos ɛn tray fɔ fos fɔ lidɔm wit am. Bɔt Josɛf jɔg kɔmɔt nain an ɛn rɔn go na do, bɔt in klos lɛf na di uman in an.

¹³ We i si se Josɛf in klos dɔn lɛf nain an ɛn i dɔn rɔn go na do,

¹⁴ i bigin ala kɔl di ɔda pipul dɛn na di os. I se, “Una kam o! Dis Ibru bɔy we mi man briŋ kam na mi os wan briŋ disgres pan wi. I kam insay mi rum fɔ rep mi, bɔt a ala lawd wan.

¹⁵ We i yɛri mi de ala i rɔn go na do, ɛn i lɛf in klos ya.”

¹⁶ I kip di klos sote in man kam bak na os da nɛt de

¹⁷ ɛn tɛl am di sem stori. I se da Ibru slev we i briŋ kam na dɛn os go insay in rum fɔ disgres am.

¹⁸ Bɔt we in ala, i rɔn kɔmɔt na do, ɛn i lɛf in klos de.

¹⁹ We Josɛf in masta yɛri wetin in wɛf tɛl am bɔt aw in slev bin wan disgres am, i vɛks bad ɛn

²⁰ mek dɛn ol Josɛf ɛn put am na di jel we di kiŋ kin kip in jelman dɛn.

²¹ Bɔt PAPA GƆD bin de wit Josɛf ɛn i blɛs am, ɛn mek di wɔda lɛk in biznɛs.

²² Di wɔda mek Josɛf bi edman fɔ ɔl di jelman dɛn ɛn put am inchaj ɔf ɔltin na di jel.

²³ Di wɔda nɔ bin de wɔri bɔt natin we Josɛf de du, bikɔs PAPA GƆD bin de wit am ɛn i bin mek bɛtɛ fala am pan ɔl wetin i bin de du.