Jɛnɛsis 38 - Krio Fɔs Oli Baybul

Tama Trik Juda

¹ Da sem tɛm de, Juda bin lɛf in brɔda dɛn ɛn go tap to wan man we nem Ira, we kɔmɔt Adulam.

² Na de Juda mit wan Kenan man we nem Shua, in gyal pikin ɛn mared am,

³ ɛn dɛn bɔn wan bɔypikin, we dɛn gi nem A.

⁴ Di uman bin gɛt bɛlɛ bak ɛn bɔn ɔda bɔypikin we dɛn gi nem Onan.

⁵ Dɔn i bɔn ɔda bɔypikin we dɛn gi nem Shila. Juda bin de na Kɛzib we Shila in bin bɔn.

⁶ Juda fɛn wɛf fɔ in fɔs-bɔy-pikin A. Dis uman nem Tama.

⁷ A bin de du bɔku wikɛd tin dɛn we PAPA GƆD nɔ lɛk, so PAPA GƆD tek in layf.

⁸ Na de Juda tɛl Onan se i fɔ mared Tama, yu brɔda we dɔn day in wɛf, so dat i go bɔn bɔypikin we go mek in brɔda insɛf gɛt jɛnareshɔn dɛn.

⁹ Bɔt Onan bin no se di bɔypikin nɔ go bi in yon, so ɛnitɛm i lidɔm wit in brɔda in wɛf, i kin trik am ɛn grap kwik so i nɔ go gɛt bɛlɛ, bikɔs i nɔ want gɛt pikin fɔ in brɔda.

¹⁰ PAPA GƆD nɔ lɛk wetin i bin de du so i tek insɛf yon layf.

¹¹ Na de Juda tɛl Tama we nain dɔtɛnlɔ mek i go bak nain papa in os; i se Tama nɔ fɔ mared te in bɔypikin Shila big. I bin se so bikɔs i de fred se Shila insɛf go day lɛkɛ in brɔda dɛn. So Tama go bak nain papa in os.

¹² Afta sɔm tɛm Juda in wɛf day. We i dɔn munin dɔn fɔ am, in ɛn in padi Ira we de Adulam go na Timna, usay dɛn bin de kɔt in ship dɛn ia.

¹³ Sɔmbɔdi go tɛl Tama se in fadɛnlɔ dɔn go na Timna fɔ go kɔt in ship dɛn ia.

¹⁴ Tama bin dɔn no se Juda in smɔl bɔypikin we nem Shila bin dɔn big, bɔt dɛn nɔ mek i mared am. So i pul in klos we uman we i man dɔn day kin wɛr, wɛr ɔda klos, ɛn kɔba in fes wit vel. Dɛn i sidɔm bifo say na Ɛnaim, wan siti we de na di rod fɔ go na Timna.

¹⁵ We Juda si Tama, i tink se na rare gyal, bikɔs in fes bin kɔba.

¹⁶ I go mit am usay i bin sidɔm oba di rod ɛn tɛl am se i want fɔ du biznɛs da nɛt de. Bɔt i nɔ bin no se nain dɔtɛnlɔ. Tama aks am se, if i gri wetin i go gi am.

¹⁷ Juda ansa se, i go sɛn wan pan in yɔŋ got dɛn fɔ am. Nain Tama se, ɔrayt, bɔt i fɔ plɛj sɔntin to am we i go kip.

¹⁸ Juda aks am se lɛkɛ wetin so i go want fɔ plɛj. Tama ansa am se, in want in riŋ we gɛt Juda in inishal wit di kɔd ɛn in wɔkin stik Juda gri. I gi Tama ɔl wetin i aks fɔ as plɛj, dɔn i gɛt biznɛs wit am we mek i gɛt bɛlɛ.

¹⁹ Tama go bak nain os, pul in vel ɛn wɛr di klos we uman we i man dɔn day kin wɛr, bak.

²⁰ Juda sɛn in padi Ira fɔ kɛr di yɔŋ got go, so i go gɛt in tiŋs dɛn bak we i bin plɛj to di uman; bɔt Ira nɔ bin ebul fɔ fɛn di uman.

²¹ I aks sɔm man dɛn na Ɛnaim se usay da rare gyal we kin sidɔm na di rod de. Dɛn ansa am se, dɛn nɔ wande gɛt rare gyal na dɛn ples.

²² So i tɔn bak go tɛl Juda se in nɔ ebul fɛn di uman. I tɛl am se di man dɛn we de na di ples se dɛn nɔ gɛt rare gyal de.

²³ Juda se, lɛ di uman kip di tiŋs dɛn ɔ nɔ so pipul dɛn go laf dɛn. I se in no se in dɔn sɛn di got bɔt na Ira nɔ ebul fɔ fɛn di uman.

²⁴ Afta tri mɔnt sɔmbɔdi tɛl Juda se in dɔtɛnlɔ dɔn tɔn rare gyal, ɛn i dɔn gɛt bɛlɛ. Nain Juda gi ɔda se, mek dɛn kɛr am go na do ɛn bɔn am na faya.

²⁵ We dɛn de kɛr am go na de i sɛn wɔd to in fadɛnlɔ wit di tiŋs dɛn se di man we gɛt dɛn tiŋs de nain gi am bɛlɛ. I se lɛ Juda luk dɛn gud ɛn si if i no udat gɛt dɛn, dat na di riŋ we gɛt inishal wit di kɔd ɛn di wɔkinstik.

²⁶ Juda bin no se nain tiŋs dɛn so i se, di uman dɔn du di rayt tin. Nain nɔ du wetin i bin fɔ du fɔ am ɛn dat na fɔ mek in bɔypikin Shila mared am. Juda nɔ gɛt biznɛs wit am igen

²⁷ We di tɛm rich fɔ mek i bɔn, i bɔn twin.

²⁸ We i bin de bɔn, wan pan di pikin pul in an kɔmɔt na do. Di uman we de ɛp am fɔ bɔn tay rɛd trɛd pan di an, ɛn se, “dis na di fɔs wan we bɔn.”

²⁹ Bɔt i put in an insay bak, ɛn in brɔda kɔmɔt bifo am. Na de di uman se, “So na so yu de kɔmɔt!” Fɔseka dat i gi am nem Pɛrɛz.

³⁰ Dɔn in brɔda bɔn wit di rɛd trɛd nain an ɛn dɛn gi am nem Zira.