Jɛnɛsis 35 - Krio Fɔs Oli Baybul

PAPA GƆD Blɛs Jekɔb Na Bɛthɛl

¹ PAPA GƆD tɛl Jekɔb se, “Go na Bɛthɛl ɛn go tap de. Bil ɔlta de fɔ wɔship mi we na di PAPA GƆD we bin apia to yu di tɛm we yu bin de rɔnawe pan yu brɔda Isɔ.”

² So Jekɔb tɛl ɔl dɛn wan we de nain os fɔ trowe ɔl dɛn tin we dɛn kin de wɔship, fɔ was ɛn wɛr klin klos.

³ I se dɛn de kɔmɔt usay dɛn de so fɔ de go Bɛthɛl, usay in de go bil ɔlta fɔ wɔship PAPA GƆD we bin ɛp am di tɛm we i bin de pan trɔbul ɛn we dɔn de wit am ɔlsay we i bin de go.

⁴ So dɛn gi Jekɔb ɔl dɛn tin dɛn we dɛn bin de wɔship ɛn dɛn yerin dɛn ɛn i bɛr dɛn ɔnda wan big Ok tik nia Shɛkɛm.

⁵ We Jekɔb ɛn i bɔypikin dɛn bin lɛf fɔ go, PAPA GƆD mek di pipul dɛn we bin de na di ɔda siti dɛn fred, so dɛn nɔ bin atak dɛn.

⁶ Jekɔb go wit ɔl in pipul dɛn na Luz, we naw nem Bɛthɛl, na Kenan.

⁷ I bil ɔlta de ɛn gi di ples nem Ɛl-Bɛthɛl, bikɔs na de PAPA GƆD bin apia to am di tɛm we i bin de rɔnawe pan in brɔda.

⁸ Afta dis, Ribɛka in fɔs nɔs Dɛbora day ɛn dɛn bɛr am ɔnda wan ok tik dɔŋ say na Bɛthɛl. Fɔseka dis bɛrin dɛn gi di ok tik nem Alɔn Bakuth

⁹ PAPA GƆD apia to Jekɔb bak na Bɛthɛl we i kɔmɔt Mɛsopotemia ɛn blɛs am.

¹⁰ PAPA GƆD tɛl am se, i nɔ go nem Jekɔb igen, bɔt frɔm da de de in nem na Izrɛl. So PAPA GƆD gi am nem Izrɛl.

¹¹ PAPA GƆD tɛl am se, “Mi na PAPA GƆD Ɔlmayti. Bɔn bɔku bɔku pikin we go de ɔlsay na di wɔl. Yu go bi papa fɔ bɔku dɛn neshɔn dɛn, kiŋ dɛn go de insay yu jɛnareshɔn.

¹² A go gi yu di land we a bin gi Ebraam ɛn Ayzak, ɛn a go gi am to yu ɛn yu jɛnareshɔn dɛn.”

¹³ So PAPA GƆD lɛf am na di ples usay i bin de tɔk to am.

¹⁴ We PAPA GƆD dɔn tɔk to am dɔn, Jekɔb bil ston pila de fɔ mak de, ɛn tɔn ɔyl ɛn wayn pan am we i tek mek sakrifays to PAPA GƆD.

¹⁵ I gi di ples nem “Bɛthɛl.”

Aw Rechɛl Day

¹⁶ Jekɔb ɛn in fambul dɛn kɔmɔt na Bɛthɛl, bɔt dɛn bin de fawe lilibit fɔ rich na Ɛfrat. We di tɛm rich fɔ mek Rechɛl bɔn in pikin, di pen bin traŋa fɔ am.

¹⁷ We i de pan dis pen, di uman we bin de ɛp am fɔ bɔn tɛl am se, lɛ i nɔ fred, na ɔda bɔypikin i de bɔn.

¹⁸ Bɔt i bin de day, so bifo i blo in las blo, i gi in bɔypikin nem Bɛnonay, bɔt in papa in gi am nem Bɛnjamin.

¹⁹ We Rechɛl day, dɛn bɛr am na di rod fɔ go na Ɛfrat, we nem Bɛtliɛm naw.

²⁰ Jekɔb put ston fɔ mɛmba de. Di mak stil de na Rechɛl in grev te tide.

²¹ Izrɛl muf go bifo say ɛn put in tɛnt na wan ɔda say afta di tawa we nem Ɛda.

Izrɛl In Bɔy pikin Dɛn

²² We Izrɛl bin de na da kɔntri de, Rubɛn go gɛt biznɛs wit Bila, wan pan in papa in ɔda uman dɛn we bɔn fɔ in papa ɛn Jekɔb bin gɛt fɔ no bɔt dat. Jekɔb bin gɛt twɛlv bɔypikin dɛn.

²³ Di bɔypikin dɛn we Lia bɔn na Rubɛn, we na Jekɔb in fɔs-bɔy-pikin, Simiɔn, Livay, Juda, Isaka, ɛn Zɛbyulɔn.

²⁴ Rechɛl in bɔn Josɛf ɛn Bɛnjamin.

²⁵ Rechɛl in savant-gyal Bila bɔn Dan ɛn Naftali.

²⁶ Dɔn Lia in savant-gyal in bɔn Gad ɛn Asha. Na Jekɔb dis we i bin bɔn na Padan Aram.

Aw Ayzak Day

²⁷ Jekɔb faynali rich to in papa Ayzak na Mamrɛ, nia Kiriath Aba, dat na Ɛbrɔn usay Ebraam ɛn Ayzak bin dɔn tap.

²⁸ Ayzak bin dɔn ol wan ɔndrɛd ɛn eti ia,

²⁹ ɛn i day we i dɔn ol gud gud wan. Nain bɔypikin dɛn Isɔ ɛn Jekɔb bɛr am.