Jɛnɛsis 32 - Krio Fɔs Oli Baybul

Jekɔb Rɛdi Fɔ Mit Isɔ

¹ We Jekɔb bin de na rod de go, in ɛn sɔm pan PAPA GƆD in enjɛl dɛn mitɔp.

² As i si dɛn so, i se, “Dis na PAPA GƆD in Kamp” so i kɔl di ples Maanaim.

³ Jekɔb sɛn mɛsenja dɛn to in brɔda Isɔ na di Sɛir eria insay Idɔm.

⁴ I tɛl dɛn fɔ tɛl mista Isɔ se in bɔbɔ Jekɔb de tɛl am adu. I se mek dɛn tɛl am se i bin tap to Leban ɛn na de i bin de te i de tɔn bak so.

⁵ I se i gɛt kaw, dɔŋki, ship, ɛn slev dɛn ɛn i de sɛn wɔd to am, mek i no se i de kam ɛn abop se i go gladi fɔ si am.

⁶ We di mɛsenja dɛn kam bak to Jekɔb, dɛn tɛl am se, dɛn mit in brɔda Isɔ de na rod de kam mit am wit fo ɔndrɛd man dɛn.

⁷ We Jekɔb yɛri dis i bin fred so i sheb di pipul dɛn we bin de wit am wit in ship, got, kaw ɛn kamɛl dɛnsɛf to tu say.

⁸ Dɔn i tɔk nain at se, “If Isɔ kam atak wan grup, di ɔda grup go rɔnawe.”

⁹ Dɔn Jekɔb pre se, “PAPA GƆD, we na mi grampa Ebraam ɛn mi papa Ayzak dɛn PAPA GƆD, yu bin dɔn tɛl mi se a fɔ go bak na mi kɔntri ɛn to mi fambul dɛn, ɛn yu go mek ɔltin fayn fɔ mi.

¹⁰ A nɔ fit fɔ gɛt ɔl di gudnɛs ɛn di fethfulnɛs we yu de sho mi we na yu savant. Di tɛm we a bin de go, a krɔs Riva Jɔdan wit natin pas wɔkinstik, bɔt naw a dɔn kam bak wit ɔl dɛn bɔku pipul ya so we a dɔn sheb to tu grup.

¹¹ A de pre duya, nɔ mek mi brɔda Isɔ du mi ɛnitin bad. A de fred se i de kam fɔ kil mi wit mi wɛf ɛn pikin dɛn.

¹² Yu bin dɔn se yu go mek ɔltin fayn fɔ mi ɛn yu go mek mi jɛnareshɔn bɔku lɛkɛ sansan na bich we nɔbɔdi nɔ go ebul fɔ kɔnt.”

¹³ Jekɔb slip da nɛt de ɛn we do klin i tek sɔm pan di animal dɛn we i gɛt, fɔ go gi Isɔ as prɛzɛnt.

¹⁴ I tek tu ɔndrɛd uman got, twɛnti man got, tu ɔndrɛd uman ship, twɛnti man ship,

¹⁵ tati uman kamɛl wit dɛn pikin dɛn, fɔti uman kaw, tɛn man kaw, twɛnti uman dɔŋki ɛn tɛn man dɔŋki dɛn.

¹⁶ I mek di wokman dɛn waka bifo am wit dɛn animal ya, bɔt i lɛf spes bitwin di grup dɛn.

¹⁷ I tɛl di wokman we de bifo se, if in brɔda Isɔ mit am na rod ɛn aks am udat nain masta, usay i de go ɛn udat gɛt dɛn animal ya we de wit am so,

¹⁸ i fɔ ansa am se, “Nain bɔbɔ Jekɔb gɛt dɛn. I se fɔ briŋ dɛn kam to in brɔda mista Isɔ fɔ prɛzɛnt, ɛn insɛf de biɛn dɛn de kam.”

¹⁹ Jekɔb tɛl ɔl in wokman dɛn na di difrɛn grup di sem tin. I se, dɛn ɔl fɔ gi mista Isɔ di sem mɛsej we dɛn mit am.

²⁰ I wɔn dɛn bak se dɛn fɔ mek shɔ se dɛn tɛl Isɔ se in bɔbɔ Jekɔb de biɛn de kam. Jekɔb du so bikɔs i bin de op se we Isɔ si di prɛzɛnt dɛn in at go kol bifo dɛn tu mit. I se sɔntɛm Isɔ go gladi fɔ mi.

²¹ I sɛn di prɛzɛnt dɛn go bifo bɔt insɛf bin lɛf na di kamp da nɛt de.

Jekɔb Fɛt Wit Wan Enjɛl

²² Da sem nɛt de Jekɔb grap, tek in tu wɛf, di tu savant-gyal dɛn ɛn in ilɛvin bɔypikin dɛn dɔn dɛn krɔs Riva Jabɔk.

²³ Wɛn dɛn dɔn krɔs go oba, i sɛn ɔl in prɔpati go mit dɛn.

²⁴ In wangren bin lɛf biɛn ɛn wan man fɛt am te do klin.

²⁵ We di man si se i nɔ ebul win di fɛt, i wap Jekɔb nain wesbon, ɛn mek di bon shift.

²⁶ Di man tɛl Jekɔb lɛ i lɛf am fɔ go bikɔs do dɔn klin. Jekɔb ansa am se in nɔ go lɛf am, pas i blɛs am.

²⁷ Di man aks am wetin i nem I ansa se nem Jekɔb.

²⁸ Nain di man tɛl am se in nɔ go nem Jekɔb igen In nem naw na Izrɛl bikɔs i dɔn chalenj wit PAPA GƆD ɛn mɔtalman, ɛn i dɔn win.

²⁹ Nain Jekɔb aks di man, wetin nain yon nem Bɔt di man aks am wetin mek i want fɔ no in yon nem. Dɔn i blɛs Jekɔb de.

³⁰ Jekɔb gi di ples nem Pɛniɛl, bikɔs i se, in dɔn si PAPA GƆD fes to fes ɛn i nɔ day.

³¹ Di san bin jɛs de kɔmɔt we Jekɔb bin de lɛf Pɛniɛl, ɛn i nɔ bin de waka tret bikɔs ɔf in wesbon.

³² Na dat mek te tide, di Izrɛlayt dɛn nɔ de it di bif we de na di wesbon, bikɔs na da say de di man bin wap Jekɔb.