Biblia Todo Logo
Bìoball air-loidhne

- Sanasan -

Jɛnɛsis 23 - Krio Fɔs Oli Baybul


Sera Day ɛn Ebraam Bay Bɛriŋrɔn

1 Sera bin ol wan ɔndrɛd ɛn twɛnti-sɛvin ia we i day,

2 ɛn i day na Ɛbrɔn we na Kiriath Aba insay Kenan. Ebraam fil am bad ɛn kray fɔ am.

3 Ebraam kɔmɔt usay in wɛf in dedebɔdi bin de, ɛn go to di Itayt pipul dɛn.

4 I beg dɛn fɔ sɛl ples gi am fɔ bɛr in wɛf as in na fɔrina.

5 Dɛn ansa am se,

6 “Duya lisin to wi, sa. Na yu na bigman pan wi ɔl, go bɛr yu wɛf na di bɛst grev we wi gɛt, sa. Nɔn pan wi nɔ go se yu nɔ fɔ bɛr de.”

7 Na de Ebraam grap ɛn baw bifo dɛn,

8 i se, “If una gri fɔ mek a bɛr mi wɛf na ya, duya una beg Ɛfrɔn, Zoa in bɔypikin

9 mek i sɛl Makpila kev, we de nain land, gi mi. Una tɛl am mek i sɛl am gi mi di ɛgzakt prayz bifo una ɔl na ya, so dat i go bi mi yon fɔ bɛriŋrɔn.

10 Da sem tɛm de Ɛfrɔn insɛf bin sidɔm wit sɔm ɔda Itayt pipul dɛn bifo di siti in get; so i ansa Ebraam bifo ɔlman we bin de de se,

11 “Lisin, sa, a gi yu di wanol fil ɛn di kev sɛf we de de. Bifo ɔl mi pipul dɛn, a de gi yu am fɔ mek yu bɛr yu wɛf de.”

12 Na de Ebraam baw bifo di Itayt pipul dɛn

13 ɛn tɔk fɔ mek ɔlman go yɛri se i go pe fɔ di wanol fil. I beg Ɛfrɔn duya mek i tek di mɔni, mek i go bɛr in wɛf.

14 Ɛfrɔn ansa am se,

15 “Pa, da grɔn de na fo ɔndrɛd silva kɔpɔ nɔmɔ fɔ am. Ɔmɔs na da mɔni de bitwin mi ɛn yu? Go bɛr yu wɛf.”

16 Ebraam si wit am bɔt i stil pe am fo ɔndrɛd silva kɔpɔ fɔ di kev bifo ɔl di pipul dɛn lɛkɛ aw dɛn biznɛsman bin fɔ sɛl am.

17 Na so Ebraam tek gɛt Makpila kev we na bin Ɛfrɔn in yon prɔpati nia di istɛn pat na Mamrɛ. Di land, di kev we de nia di land, ɛn ɔl di tik dɛn we de de bi in yon.

18 Ɛn na bifo ɔl di Itayt pipul i bay am.

19 Afta ɔl dis, Ebraam bɛr in wɛf Sera na di kev we de na Kenan we i bay.

20 Di fil ɛn di kev kam bi Ebraam in yon, ɛn di Itayt pipul dɛn gri fɔ lɛ de bi in yon bɛriŋrɔn.

Krio Bible © The Bible Society of Sierra Leone, 2013.

Bible Society in Sierra Leone
Lean sinn:



Sanasan