Jɛnɛsis 2 - Krio Fɔs Oli Baybul

¹ Na so PAPA GƆD tek mek di wanol wɔl, ɛvin ɛn ath ɛn ɔl wetin de insay de.

² Bay di tɛm we di de we mek sɛvin rich, PAPA GƆD bin dɔn dɔn ɔl wetin i bin de du, so i blo da de de.

³ I blɛs da sem de de ɛn mek am oli, bikɔs bifo da de de bin kam, i bin dɔn dɔn ɔl wetin i gɛt fɔ du, ɛn na da de de i blo.

⁴ Na so PAPA GƆD tek mek di wanol wɔl; ɛvin ɛn ath ɛn ɔl wetin de insay de. We PAPA GƆD dɔn mek ɛvin ɛn ath dɔn,

Aw PAPA GƆD Mek Di Fɔs Man Ɛn Uman

⁵ plant dɛn nɔ bin de na grɔn, ɛn sid sɛf nɔ bin bigin bɔs yet. Natin nɔ bin de gro na di grɔn bikɔs PAPA GƆD nɔ bin mek ren bigin kam yet, ɛn nɔbɔdi nɔ bin de yet fɔ dig di grɔn;

⁶ bɔt wata bin de kɔmɔt ɔnda di grɔn ɛn mek ɔl di grɔn sok.

⁷ PAPA GƆD tek sɔm pan di dɔti na grɔn ɛn mek mɔtalman; i blo insay in nos dɛn mɔtalman gɛt layf.

⁸ Dɛn PAPA GƆD mek wan fam na Idɛn we de na di ist ɛn put di man we i bin dɔn mek de.

⁹ I mek fayn fayn tik dɛn gro de we gɛt gud frut fɔ it. Wan tik bin de midul di fam we nem “Layf tik.” Dɛn igen, wan ɔda tik bin de de we nem “Sɛns tik.”

¹⁰ Wan big riva bin de flo ɛn wata di fam; ɛn i bin sheb to fo riva dɛn wɛn i kɔmɔt na di fam.

¹¹ Di fɔs riva nem Pishɔn; in bin pas insay di kɔntri Avila usay gold de.

¹² Piɔ gold bin de de, wit fayn pafyum ɛn miniral ston dɛm.

¹³ Di sɛkɛn riva nem Giɔn; insɛf pas insay di kɔntri Kush.

¹⁴ Di tɔd riva in nem Taygris, we de to di ist we yu kɔmɔt Ashɔ, ɛn di riva we mek fo na Riva Yufretis.

¹⁵ PAPA GƆD bin put di man we i mek na di fam na Idɛn, fɔ mek i go tek kia ɔf am ɛn wok de.

¹⁶ I tɛl am se, “Yu kin it di frut dɛn pan ɛni tik na di fam,

¹⁷ bɔt yu nɔ fɔ it pan di “Sɛns tik,” bikɔs if yu it pan am, da sem de de, yu go day.”

¹⁸ Naw PAPA GƆD se, “I nɔ gud fɔ mek di man in wangren de. A go mek sɔmbɔdi we dɛn tu go de, fɔ ɛp am.”

¹⁹ PAPA GƆD bin dɔn tek sɔm dɔti na grɔn mek ɔl dɛn animal ɛn ɔl dɛn bɔd. Dɛn i briŋ dɛn kam to di man fɔ si uskayn nem i go gi dɛm; ɛni nem we i gi dɛm, na da nem de lɛf pan dɛm. Na so dɛn ɔl tek gɛt dɛn nem.

²⁰ So di man bin gi dɛn ɔl nem; bɔt nɔn pan dɛm nɔ bin fit fɔ de wit di man fɔ ɛp am.

²¹ So PAPA GƆD mek di man slip dip dip wan. We i de slip, i pul wan pan di man in ribs nain sayd ɛn lɔk di ples bak.

²² I tek di ribs we i pul na di man in sayd mek wan uman. Wɛn i briŋ am kam to di man,

²³ di man se, “E, i dɔn bi. Dis na mi kayn, dis na bon we kɔmɔt pan mi yon bon, ɛn flɛsh we kɔmɔt pan mi yon flɛsh. I nem ‘Uman’ bikɔs, na pat pan man dɛn tek mek am”

²⁴ Na fɔ dis mek man go lɛf in mama ɛn papa ɛn go de wit in wɛf, ɛn dɛn tu go bi wan.

²⁵ Di man ɛn di uman bin de nekɛd, bɔt dɛn nɔ bin de shem.