Jɛnɛsis 19 - Krio Fɔs Oli Baybul

Di Bad Tin dɛn We Pipul Dɛn Bin De Du Na Sɔdɔm

¹ We di tu enjɛl dɛn rich na Sɔdɔm da ivin tɛm de, dɛn mit Lɔt sidɔm na di siti in get. As i si dɛn de kam so, i grap go mit dɛn. I butu in fes na grɔn bifo dɛn,

² ɛn se, “Du sa, una nɔ pas mi os go. Mek a briŋ wata fɔ una fɔ was una fut. Duya una slip to mi dis nɛt, dɛn una kin grap ali mɔnin ɛn go usay una de go.” Bɔt di man dɛn ansa se, “Nɔ-o, wi go go slip na trit midul siti.”

³ Bɔt Lɔt fos dɛn, ɛn dɛn go wit am insay in os. Lɔt mek gud it fɔ dɛn ɛn sav dɛn bred we nɔ gɛt yist, dɔn dɛn it.

⁴ Bay di tɛm we dɛn de rɛdi fɔ go lidɔm, ɔl di man dɛn na di siti dɔn sɔrawnd di os, big wan ɛn smɔl wan dɛn.

⁵ Dɛn ala aks Lɔt se, “We di trenja dɛn we kam slip to yu dis nɛt? Pul dɛn na do mek wi lidɔm wit dɛn.

⁶ Lɔt kɔmɔt go na do ɛn lɔk di do.

⁷ I beg dɛn mek dɛn nɔ du da kayn wikɛdnɛs de.

⁸ I se, “A gɛt tu gyal pikin dɛn we na vajin. Mek a gi una lɛ una du wetin una want du wit dɛn. Bɔt duya, una nɔ ambɔg dɛn po man dɛn ya, dɛn na mi trenja.”

⁹ Bɔt dɛn se, “Bo kɔmɔt bifo wi, yu we na trenja! Na yu de kam tɛl wi wetin fɔ du? Bo kɔmɔt bifo wi ya! Ɔ nɔ so wi go du yu wɔs tin pas wetin wi want du dɛn.” Dɛn push Lɔt te dɛn wan brok di do.

¹⁰ Bɔt di tu man dɛn we bin de insay, ol Lɔt ɛn drɔ am bak insay di os, ɛn lɔk di do.

¹¹ Dɔn dɛn mek ɔl di man dɛn we bin de na do dɛn yay blɛn so dat dɛn nɔ go ebul fɔ si di domɔt.

Lɔt Kɔmɔt na Sɔdɔm

¹² Di tu man dɛn aks Lɔt, if i gɛt ɛnibɔdi na di siti lɛkɛ bɔypikin, gyal pikin, sɔnɛnlɔ, ɔ ɛni ɔda fambul, lɛ i pul dɛn kɔmɔt de,

¹³ bikɔs dɛn de kam pwɛl di siti kpatakpata. Dɛn se PAPA GƆD dɔn yɛri bɔt di bad bad tin dɛn we di pipul dɛn na di siti de du, ɛn i dɔn sɛn dɛn fɔ kam pwɛl di siti.

¹⁴ So Lɔt go to di man dɛn we gɛt fɔ mared in gyal pikin dɛn ɛn tɛl dɛn fɔ mekes kɔmɔt na di siti, as PAPA GƆD want fɔ pwɛl dis siti kpatakpata. Bɔt dɛn fil se na ple i de ple.

¹⁵ We do klin di enjɛl dɛn tɛl Lɔt bak fɔ mekes. Dɛn tɛl am se, mek i mekes tek in wɛf ɛn tu gyal pikin dɛn we de wit am ɛn kɔmɔt de kwik kwik wan ɔ nɔ so dɛnsɛf go miks pan di pwɛl we di siti gɛt fɔ pwɛl.

¹⁶ Lɔt bigin drɛg fut. Bɔt PAPA GƆD sɔri fɔ am, so di tu man dɛn kapu Lɔt, in wɛf ɛn in tu gyal pikin dɛn bonikali ɛn drɛg dɛn kɔmɔt na di siti.

¹⁷ We di enjɛl dɛn dɔn pul dɛn kɔmɔt de, wan pan di enjɛl ala se, “Una rɔn fɔ una layf! Una nɔ luk biɛn ɛn una nɔ tinap na di vali. Una rɔn go na dɛn il fɔ lɛ una nɔ go day.”

¹⁸ Bɔt Lɔt beg se, “Duya a nɔ ebul go ɔp di il dɛn bikɔs dɛn de tu fa.

¹⁹ Du sa yu dɔn du big tin fɔ mi we yu sev mi layf. Bɔt di il dɛn de fa tumɔs; di waala go mit mi na rod, ɛn a go day bifo a rich de.

²⁰ Yu si da smɔl siti de oba yanda? I de nia lilibit. Duya, mek a go de; yu kin si se na smɔl ples ɛn natin nɔ go apin to mi de.”

²¹ Di enjɛl gri se i kin go de. I se, “Ɔrayt, A nɔ go pwɛl da siti de.

²² Mekes! Rɔn! A nɔ go du natin te yu rich de.” Lɔt se di siti smɔl, na dat mek dɛn kɔl di siti Zoa.

PAPA GƆD Pwɛl Sɔdɔm ɛn Gomɔra

²³ Bay di tɛm we Lɔt rich Zoa, san dɔn tinap.

²⁴ Da sem tɛm de nain PAPA GƆD mek big, big faya ɛn sɔlfa kɔmɔt na ɛvin ɛn bɔn Sɔdɔm ɛn Gomɔra.

²⁵ I pwɛl pwɛl ɔl di siti dɛn, di vali dɛn, di pipul dɛn, di plant ɛn ɔl di animal dɛn.

²⁶ Bɔt Lɔt in wɛf tɔn biɛn fɔ luk wetin de apin. As i du dat so, in wanol bɔdi jɛs stif ɛn tɔn to sɔl.

²⁷ Ebraam grap di mɔnin go tinap na di ples we in ɛn PAPA GƆD bin tinap de tɔk.

²⁸ I luk dɔŋ na Sɔdɔm ɛn Gomɔra ɛn di vali, ɛn si tik tik smok de kɔmɔt dɔŋ de. Di smok tan lɛkɛ we big big faya de kech.

²⁹ We PAPA GƆD bin wan pwɛl di siti dɛn we de na di vali usay Lɔt bin tap, i mɛmba Ebraam ɛn na dat mek i sev Lɔt ɛn nɔ mek natin du am.

Aw Di Moabayt Ɛn Amonayt Pipul Dɛn Kam Na Wɔl

³⁰ Lɔt bin de fred fɔ tap na Zoa, so in ɛn in tu gyal pikin dɛn muf go ɔp dɛn il go tap na wan kev.

³¹ Wande big gyal pikin tɛl in sista se, “Wi papa dɔn ol, man nɔ de na ya we go mared wi fɔ lɛ wi go bɔn pikin.

³² Yu no wetin lɛ wi gi papa rɔm lɛ i drɔnk we i chak we go go lidɔm wit am so wi go gɛt pikin we go mek wi nem nɔ day.”

³³ Da nɛt de dɛn gi dɛn papa rɔm fɔ drink we mek i drɔnk, ɛn di big gyal pikin lidɔm wit am. Lɔt bin so drɔnk dat i nɔ no natin.

³⁴ Di nɛks de, di big gyal pikin tɛl in sista se, “A lidɔm wit papa yɛstade nɛt; lɛ wi mek i drɔnk bak dis nɛt, so dat yu kin lidɔm wit am. Dɔn wi ɔl tu go gɛt pikin we go mek wi nem nɔ day.”

³⁵ Da nɛt de dɛn mek i drɔnk gud, ɛn di smɔl gyal pikin lidɔm wit am. I bin so drɔnk dat i nɔ no natin.

³⁶ Na so Lɔt in gyal pikin dɛn tek gɛt bɛlɛ fɔ am.

³⁷ Di big wan bɔn bɔypikin, we i gi nem Moab. Moab na di papa fɔ di Moabayt dɛn we de te tide.

³⁸ Di smɔl wan insɛf bɔn bɔypikin, we i gi nem Bɛn Ami, Bɛn Ami na di papa fɔ di Amonayt dɛn we stil de te tide.