Jɛnɛsis 17 - Krio Fɔs Oli Baybul

Di Kɔvinant Ɛn Fɔ Sakɔmsayz

¹ We Ebram bin ol naynti-nayn ia, PAPA GƆD apia to am ɛn tɛl am se, “Mi na PAPA GƆD Ɔlmayti. Obe mi ɛn du wetin rayt ɔltɛm.

² A go mek Kɔvinant wit yu ɛn a go gi yu bɔku gret grampikin.”

³ Ebram lidɔm flat wit in fes na grɔn wantɛm. PAPA GƆD se,

⁴ “A de mek dis Kɔvinant wit yu naw ɛn a de prɔmis yu se yu go bi di papa fɔ bɔku neshɔn.

⁵ Yu nɔ go nem Ebram igen, naw yu nem go bi Ebraam bikɔs a dɔn mek yu di papa fɔ bɔku neshɔn dɛn.

⁶ A go mek yu jɛnareshɔn dɛn so bɔku, dat dɛn go bi difrɛn difrɛn neshɔn dɛn ɛn sɔm pan dɛn go bi kiŋ.”

⁷ “A de mek dis Kɔvinant bitwin mi ɛn yu ɛn bitwin mi ɛn yu jɛnareshɔn dɛn we nɔ bɔn yet. Dis Kɔvinant go de sote go ɛn a go bi yu PAPA GƆD ɛn ɔl yu jɛnareshɔn dɛn PAPA GƆD.

⁸ Dis land we yu de so naw lɛkɛ trenja go blant yu ɛn yu jɛnareshɔn dɛn. A go gi yu jɛnareshɔn dɛn dis wanol Kenan. I go bi dɛn yon sote go, ɛn a go bi dɛn PAPA GƆD.”

⁹ PAPA GƆD tɛl Ebraam se, “Yusɛf ɛn yu jɛnareshɔn dɛn, ɛn ivin dɛn wan we nɔ bɔn yet gɛt sɔntin fɔ du fɔ kip di Kɔvinant.

¹⁰ Una yon pat we una fɔ kip pan di Kɔvinant na dat ɔl di man dɛn fɔ sakɔmsayz.

¹¹ Frɔm naw sote go, ɔl di man dɛn fɔ sakɔmsayz we nain go sho se Kɔvinant de bitwin mi ɛn una.

¹² Ɔl bɔypikin fɔ sakɔmsayz we i dɔn ol et de; wɛda i bɔn na yu os ɔ yu bay am frɔm ɛni trenja,

¹³ as lɔŋ as na bɔypikin yu fɔ sakɔmsayz am. Na dis go mek di Kɔvinant de sote go.

¹⁴ Ɛni man we nɔ sakɔmsayz dɔn brok mi Kɔvinant. I nɔ fɔ de wit in pipul dɛn.”

¹⁵ PAPA GƆD tɛl Ebraam igen se, “Fɔ yu wɛf Seray in yon say, yu nɔ fɔ kɔl am Seray igen; frɔm naw sote go in nem na Sera.

¹⁶ A go blɛs am, ɛn a go mek i bɔn bɔypikin fɔ yu. A go blɛs am, ɛn i go bi di mami fɔ bɔku neshɔn dɛn, ɛn kiŋ dɛn go kɔmɔt nain bɛlɛ.”

¹⁷ Ebraam lidɔm flat wit in fes na grɔn, i bɔs laf ɛn aks insɛf se, if man kin bɔn pikin we i ol wan ɔndrɛd ia. Ɛn if Sera go ebul bɔn pikin we i ol naynti.

¹⁸ Ebraam beg PAPA GƆD se, “Duya, mek Ishmɛl bi di pikin we go gɛt di blɛsin.”

¹⁹ Dɛn PAPA GƆD se, “Nɔ-o! Yu wɛf Sera go bɔn bɔypikin fɔ yu ɛn yu fɔ gi am nem Ayzak. A go mek mi Kɔvinant wit am ɛn wit insɛf yon jɛnareshɔn dɛn, we go bi Kɔvinant we gɛt fɔ de sote go.

²⁰ Fɔ Ishmɛl in yon say, a dɔn yɛri wetin yu se. A go blɛs insɛf, ɛn gi am bɔku pikin dɛn ɛn mek insɛf yon jɛnareshɔn bɔku. I go gɛt twɛlv bɔypikin dɛn we go rul, ɛn a go mek am bi di papa fɔ big big neshɔn dɛn.

²¹ Bɔt mi Kɔvinant go bi wit yu bɔypikin Ayzak, we Sera gɛt fɔ bɔn dis sem tɛm nɛks ia.”

²² We PAPA GƆD dɔn tɔk to Ebraam dɔn, i lɛf am.

²³ Ebraam obe PAPA GƆD in kɔmand ɛn sakɔmsayz in bɔypikin Ishmɛl ɛn ɔl di ɔda man dɛn nain os. I sakɔmsayz di wan dɛn we bɔn nain os ɛn dɛn wan dɛn we i bin bay. Dɛn ɔl sakɔmsayz da sem de de jɛs lɛkɛ aw PAPA GƆD bin tɛl am.

²⁴ Ebraam bin ol naynti-nayn ia we i sakɔmsayz,

²⁵ ɛn in bɔypikin Ishmɛl in bin ol tɔtin ia.

²⁶ Dɛn ɔl tu bin sakɔmsayz da sem de de.

²⁷ Ɔl di man dɛn we tap nain os, di wan dɛn we bɔn nain os, ɛn di wan dɛn we i bin sakɔmsayz wit am.