Jɛnɛsis 16 - Krio Fɔs Oli Baybul

Ebram bɔn pikin wit Ega

¹ Ebram in wɛf Seray nɔ bɔn. Seray bin gɛt wan slev gyal we nem Ega we kɔmɔt Ijipt.

² So i tɛl Ebram se, “PAPA GƆD nɔ mek a bɔn, yu nɔ tink se yu fɔ tek Ega mek yu wɛf? Sɔntɛm wi go gɛt pikin bay dat.” Ebram gri wit wetin Seray se,

³ so Seray gi Ega in slev gyal to Ebram fɔ tek mek wɛf. Dis apin afta Ebram dɔn de na Kenan fɔ tɛn ia.

⁴ Ebram bin gɛt biznɛs wit Ega, ɛn i gi am bɛlɛ. We Ega kam no se i dɔn gɛt bɛlɛ fɔ Ebram, i bigin mek prawd ɛn fityay Seray.

⁵ Nain Seray tɛl Ebram se, “Na yu mek Ega de fityay mi so. Na mi bin tek am gi yu, bɔt frɔm we i no se i gɛt bɛlɛ, nain i bigin fityay mi. Na PAPA GƆD go jɔj bitwin mi ɛn yu!”

⁶ Ebram ansa se, “Wɛl, na yu slev gyal ɛn i de ɔnda yu; du ɛnitin we yu want du wit am.” Seray bigin trit Ega bad sote i gɛt fɔ rɔnawe.

⁷ Ega go te i rich na wan ples we gɛt smɔl wata na di ples we pɔsin nɔ go ebul tap, na di rod fɔ go Shɔ. PAPA GƆD in enjɛl mit am de.

⁸ I aks am se, “Ega, yu we na Seray in slev gyal, usay yu kɔmɔt ɛn usay yu de go?” I ansa se, “A de rɔnawe pan mi misis, sa.”

⁹ Di enjɛl se, “Tɔn bak go wok fɔ yu misis ɛn put yusɛf dɔŋ.

¹⁰ A go mek yu jɛnareshɔn dɛn bɔku so dat nɔbɔdi nɔ go ebul kɔnt dɛn.

¹¹ Naw yu dɔn gɛt bɛlɛ ɛn na bɔypikin yu go bɔn. PAPA GƆD dɔn si yu waala, so yu fɔ gi di pikin nem Ishmɛl,

¹² Yu bɔypikin go wayl ɛn nɔbɔdi nɔ go ebul kɔntrol am. In ɛn nɔbɔdi nɔ go gri. In ɛn in brɔda dɛnsɛf nɔ go pul.”

¹³ Ega tɔk nain at se, “Fɔ tru se a dɔn si PAPA GƆD ɛn a nɔ day?” So i kɔl di PAPA GƆD we dɔn tɔk to am “PAPA GƆD We De Si.”

¹⁴ Na dat mek di pipul dɛn kɔl di wɛl “Bia-laay-rɔy”. I de bitwin Kedɛsh ɛn Bɛrɛd

¹⁵ Ega bɔn bɔypikin fɔ Ebram, ɛn Ebram gi am nem Ishmɛl.

¹⁶ Da tɛm de Ebram bin ol eti-siks ia.