Jɛnɛsis 15 - Krio Fɔs Oli Baybul

PAPA GƆD Mek Kɔvinant wit Ebram

¹ Afta ɔl wetin bin dɔn apin, PAPA GƆD apia to Ebram na vishɔn. I tɛl am se, “Nɔ fred, Ebram. A go kɔba yu ɛn a go gi yu ɔlkayn gud tin.”

² Bɔt Ebram ansa se, “E PAPA GƆD, uskayn gud tin yu go gi mi we a nɔ gɛt pikin sɛf? Na Ɛliaza we kɔmɔt Damaskɔs nɔmɔ go bɛnifit we a day.

³ Yu nɔ gi mi pikin, so na wan pan mi wokman dɛn go gɛt ɔl mi prɔpati.”

⁴ Nain PAPA GƆD tɔk to am igen se, “Nɔ-o, nɔto Ɛliaza go bɛnifit; a go gi yu yu yon yon pikin we go gɛt yu prɔpati we yu day.”

⁵ So PAPA GƆD kɛr Ebram go na do ɛn tɛl am se, “Luk ɔp di skay ɛn tray fɔ kɔnt di sta dɛn; lɛkɛ aw di sta dɛn bɔku so na so yu jɛnareshɔn dɛn go tan.”

⁶ Ebram biliv wetin PAPA GƆD se ɛn dat mek PAPA GƆD luk am se in na pɔsin we de waka tret wit am.

⁷ PAPA GƆD tɛl Ebram se, “Na mi na di PAPA GƆD, we pul yu kɔmɔt Ɔ we de na Babilonia, ɛn a go gi yu dis land fɔ mek i go bi yu yon.”

⁸ Bɔt Ebram aks am se, “PAPA GƆD, aw a go no se i go bi mi yon?”

⁹ PAPA GƆD ansa se, “Briŋ wan tri ia ol kaw, wan tri ia ol uman got, ɛn wan tri ia ol man ship wit wan dɔv ɛn wan pijin fɔ mi.

¹⁰ Ebram bin kɛr dɛn animal ya go gi PAPA GƆD. I kil dɛn ɛn plit dɛn midul wan bay wan. Dɔn i mek di tu af dɛn de ɔpozit dɛn kɔmpin. Na di bɔd dɛn nɔmɔ i nɔ kɔt tu.

¹¹ Wɛn dɛn yuba dɛn kam fɔ kam it di animal dɛn, Ebram drɛb dɛn.

¹² We di san go dɔŋ nain slip kɛr Ebram go, ɛn i tan lɛkɛ se di ples dak ɛn i bigin fɔ fred.

¹³ Nain PAPA GƆD tɛl am se, “No naw fɔ tru tru se, yu jɛnareshɔn dɛn go bi trenja na ɔda kɔntri; dɛn go bi slev de ɛn dɛn go trit dɛn bad fɔ fo ɔndrɛd ia.

¹⁴ Bɔt a go pɔnish di kɔntri we go tɔn dɛn to slev, ɛn we dɛn de kɔmɔt na da kɔntri de dɛn go jɛntri.

¹⁵ Yusɛf go de te yu ol, bifo yu day, ɛn yu go day wit kolat.

¹⁶ Fo jɛnareshɔn go dɔn bɔn bifo ɛniwan go kam bak na ya so, bikɔs di tɛm nɔ go rich yet we di Amɔrayt dɛn sin go dɔn pasmak.”

¹⁷ We di san dɔn go dɔŋ ɛn di ples dɔn dak, Ebram jɛs si wan pɔt we smok bin de kɔmɔt pan, ɛn wan faya tik jɛs pas midul di bif dɛn we i bin dɔn kɔt.

¹⁸ Da sem tɛm de PAPA GƆD mek Kɔvinant wit Ebram. I se, “A dɔn prɔmis fɔ gi yu jɛnareshɔn ɔl dis kɔntri frɔm di bɔda na Ijipt sote rich na Riva Yufretis,

¹⁹ dat na usay dɛn Kɛnayt, dɛn Kɛnizayt, dɛn Kadmɔnayt,

²⁰ dɛn Itayt, dɛn Pɛrizayt, dɛn Rɛfaayt,

²¹ dɛn Amɔrayt, dɛn Kenanayt, dɛn Gagashayt, ɛn dɛn Jɛbyusayt dɛn de.