Jɛnɛsis 14 - Krio Fɔs Oli Baybul

Ebram Sev Lɔt in Layf

¹ Dɛn fo kiŋ ya so, Amrafɛl, di kiŋ na Shina; Ariɔk, di kiŋ na Ɛlasa; Kɛdɔlaoma, kiŋ na Ilam; ɛn Tidal, kiŋ na Goim,

² bin go fɛt wa agens fayv ɔda kiŋ dɛn. Di fayv ɔda kiŋ dɛn, Bɛra, we na kiŋ na Sɔdɔm; wit Basha, kiŋ na Gomɔra; Shinab, kiŋ na Adma; Shɛmɛba, kiŋ na Zɛboim; ɛn di kiŋ na Bɛla: Bɛla in ɔda nem na Zoa.

³ Dɛn fayv kiŋ ya so bin mek wanwɔd ɛn dɛn mitɔp na wan vali we nem Sidim Vali, we naw na di Sɔl Si.

⁴ Dɛn bin dɔn de ɔnda Kiŋ Kɛdɔlaoma in kɔntrol fɔ twɛlv ia, bɔt di ia we mek tɔtin dɛn bin tɔn agens am.

⁵ Di ia we mek fotin, Kiŋ Kɛdɔlaoma ɛn in kɔmpin sojaman dɛn bin bit dɛn pipul ya so, di Rɛfaayt dɛn na Ashtɛrɔth Kanaim, di Zuzayt dɛn na Am, di Ɛmayt dɛn na di flat grɔn na Shavɛ - Kiriathaim,

⁶ ɛn di Orayt dɛn na dɛn yon mawnten na Sɛir. Dɛn rɔnata dɛn sote dɛn rich na Ɛl Paran we de na di ples we pɔsin nɔ go ebul tap in bɔda

⁷ dɔn dɛn tɔn bak na Ɛnmishpat, we naw na Kedɛsh. Dɛn siz ɔl di Amalɛkayt dɛn land dɛn, ɛn usay di Amɔrayt dɛn bin de na Azazɔn Tama.

⁸ Dɔn, fayv kiŋ dɛn we kɔmɔt na Sɔdɔm, Gomɔra, Adma, Zɛboim, ɛn Bɛla bin gɛda dɛn sojaman dɛn fɔ go fɛt na di vali na Sidim. Dɛn bin fɛt

⁹ fo ɔda kiŋ dɛn we kɔmɔt na Ilam, Goim, Shina, ɛn Ɛlasa: So fo kiŋ bin de fɛt agens fayv kiŋ.

¹⁰ Dis vali bin pak ful wit ol dɛn we gɛt ta insay ɛn wɛn di kiŋ dɛn na Sɔdɔm ɛn Gomɔra bin de tray fɔ rɔnawe pan di fɛt, sɔm pan dɛn sojaman dɛn bin fɔdɔm insay dɛn ol ya, dɔn di balans rɔn go ɔp sɔm mawnten dɛn.

¹¹ Di fo kiŋ dɛn tek ɔl wetin de na Sɔdɔm ɛn Gomɔra, ɛn ɔl wetin dɛn bin gɛt fɔ it, ɛn kɛr dɛn go.

¹² Dɛn kɛr Lɔt insɛf ɛn ɔl in prɔpati go. Lɔt na Ebram in brɔda pikin, we bin tap na Sɔdɔm.

¹³ Bɔt wan man bin rɔnawe ɛn go tɛl Ebram, da Ibru man, ɔl wetin apin. Da tɛm de Ebram bin tap nia Mamrɛ da Amɔrayt man in ok tik dɛn. Mamrɛ ɛn in tu brɔda dɛn, Ɛshkɔl ɛn Ana, na bin Ebram in tayt padi dɛn.

¹⁴ We Ebram yɛri se dɛn dɔn kech in brɔda in pikin, i tek di tri ɔndrɛd ɛn etin man dɛn nain os we bin dɔn tren fɔ fɛt, ɛn dɛn rɔnata di fo kiŋ dɛn sote rich Dan.

¹⁵ Dɔn i sheb dɛn to difrɛn difrɛn grup. Dɛn atak di ɛnimi na nɛt ɛn bit dɛn. Ebram bin rɔnata dɛn ɔda wan dɛn sote dɛn rich na Oba, we de na di nɔtan say na Damaskɔs.

¹⁶ I gɛda ɔl wetin dɛn bin dɔn lut ɛn tek in brɔda in pikin Lɔt wit ɔl in prɔpati dɛn, wit di uman dɛn, ɛn di ɔda pipul dɛn we dɛn bin dɔn abdɔkt go wit am.

Mɛlkizidɛk Blɛs Ebram

¹⁷ We Ebram dɔn bit Kiŋ Kɛdɔlaoma ɛn di ɔda kiŋ dɛn, di kiŋ na Sɔdɔm bin go mit am na di vali na Shavɛ we dɛn kin kɔl Kiŋ in Vali.

¹⁸ Mɛlkizidɛk, we na bin kiŋ na Selɛm ɛn na bin man we de mek sakrifays fɔ pipul sin to PAPA GƆD we pas ɔl, bin kɛr bred ɛn wayn go to Ebram.

¹⁹ Mɛlkizidɛk blɛs Ebram. I se, “Mek PAPA GƆD we pas ɔl, we mek di wanol wɔl, ɛvin ɛn ath, blɛs yu Ebram!

²⁰ Lɛ wi prez PAPA GƆD we pas ɔl we dɔn mek yu bit yu ɛnimi dɛn!” Ebram sheb ɔl di tin dɛn we di ɛnimi bin dɔn lut tɛn pat. Ɛn i gi Mɛlkizidɛk wan pat.

²¹ Di kiŋ na Sɔdɔm tɛl Ebram se, “Tek ɔl wetin yu dɔn gɛda, bɔt gi mi ɔl mi pipul dɛn bak.”

²² Ebram ansa am se, “A dɔn swɛ to PAPA GƆD we pas ɔl, we mek di wanol wɔl, ɛvin ɛn ath,

²³ se, a nɔ go tek ɛnitin we na yu yon, i lɛk sɛf na trɛd ɔ les. Mek yu nɔ go se na yu mek Ebram jɛntri.

²⁴ Mi nɔ go tek natin fɔ misɛf. Wetin mi sojaman dɛn dɔn it na dɛn yon. Mek mi sojaman dɛn, Ana, Ɛshkɔl, ɛn Mamrɛ, tek wetin dɛn want.”