Jɛnɛsis 11 - Krio Fɔs Oli Baybul

Babilɔn Tawa

¹ Fɔs fɔs tɛm, na wangren laŋwej ɔlman na di wɔl bin de tɔk, ɛn na bin di sem we dɛn bin de tɔk am.

² As di pipul dɛn de wirɔn ɔlɔbɔt na di ist, dɛn rich na Babilɔn; ɛn dɛn tek de mek dɛn siti ɛn tap de.

³ Dɛn tɛl dɛn kɔmpin se, “Una kam! Lɛ wi mek kle blɔk dɛn ɛn bek dɛn mek dɛn go traŋa gud gud wan.” So dɛn mek di kle blɔk ɛn yuz dɛn fɔ bil. Dɛn yuz ta lɛkɛ mɔta fɔ fasin dɛn.

⁴ Dɛn se, “Lɛ wi bil wan big siti we gɛt tawa we go rich ɔpskay, so wi go mek nem fɔ wisɛf ɛn wi nɔ go skata ɔlsay na di wɔl.”

⁵ We di pipul dɛn de bil di tawa, PAPA GƆD kam dɔŋ kam luk wetin dɛn de du.

⁶ I se, “If dɛn pipul ya so we dɛn de tɔk wan laŋwej kin ebul du dis kayn tin, wetin lɛf we dɛn nɔ go ebul du?

⁷ Lɛ wi go dɔŋ go miksɔp dɛn laŋwej so dat dɛn nɔ go ebul fɔ ɔndastand dɛnsɛf.”

⁸ So PAPA GƆD skata dɛn ɔlsay na di wɔl, ɛn dɛn tap fɔ bil di big siti.

⁹ Na dat mek di siti nem Bebɛl, bikɔs na de PAPA GƆD miksɔp dɛn laŋwej, ɛn na de i skata dɛn go ɔlsay na di wɔl.

Frɔm Shɛm To Ebram

¹⁰ Dɛn wan ya na Shɛm in jɛnareshɔn dɛn. We Shɛm ol wan ɔndrɛd ia, dat na tu ia afta di flɔd, nain i bɔn Apakshad.

¹¹ Afta dat, i de fayv ɔndrɛd ia mɔ ɛn bɔn ɔda bɔy ɛn gyal pikin dɛn.

¹² We Apakshad in ol tati-fayv ia, i bɔn wan bɔypikin we nem Shila.

¹³ Afta dat, i de fo ɔndrɛd ɛn tri ia mɔ ɛn bɔn ɔda bɔy ɛn gyal pikin dɛn.

¹⁴ We Shila ol tati ia, i bɔn wan bɔypikin we nem Eba.

¹⁵ Afta dat, i de fo ɔndrɛd ɛn tri ia mɔ ɛn bɔn ɔda bɔy ɛn gyal pikin dɛn.

¹⁶ We Eba ol tati-fo ia, i bɔn wan bɔypikin we nem Pɛlɛg.

¹⁷ Afta dat, i de fo ɔndrɛd ɛn tati ia mɔ ɛn bɔn ɔda bɔy ɛn gyal pikin dɛn.

¹⁸ We Pɛlɛg ol tati ia, i bɔn wan bɔypikin we nem Reu.

¹⁹ Afta dat, i de tu ɔndrɛd ɛn nayn ia mɔ ɛn bɔn ɔda bɔy ɛn gyal pikin dɛn.

²⁰ We Reu ol tati-tu ia, i bɔn wan bɔypikin we nem Sirug.

²¹ Afta dat, i de tu ɔndrɛd ɛn sɛvin ia mɔ ɛn bɔn ɔda bɔy ɛn gyal pikin dɛn.

²² We Sirug ol tati ia, i bɔn wan bɔypikin we nem Neɔ.

²³ Afta dat, i de tu ɔndrɛd ia mɔ ɛn bɔn ɔda bɔy ɛn gyal pikin dɛn.

²⁴ We Neɔ ol twɛnti-nayn ia, i bɔn wan bɔypikin we nem Tɛra.

²⁵ Afta dat, i de wan ɔndrɛd ɛn nayntin ia mɔ ɛn bɔn ɔda bɔy ɛn gyal pikin dɛn.

²⁶ Tɛra bin ol sɛvinti ia we i bɔn Ebram, Neɔ, ɛn Eran.

Tɛra in jɛnareshɔn dɛn

²⁷ Dɛn wan ya na Tɛra in jɛnareshɔn dɛn. Tɛra na bin Ebram, Neɔ, ɛn Eran dɛn papa. Eran in na Lɔt in papa,

²⁸ bɔt Eran day bifo in papa Tɛra na Ɔ, di siti we i bɔn.

²⁹ Ebram ɛn Neɔ dɛn tu bin mared. Ebram in wɛf nem Seray, ɛn Neɔ in yon wɛf nem Milka we na Eran in gyal pikin. Iska na bin Neɔ in ɔda gyal pikin.

³⁰ Seray in nɔ bin ebul bɔn pikin.

³¹ Tɛra tek in bɔypikin Ebram, in grampikin Lɔt, we na Eran in bɔypikin, ɛn in dɔtɛnlɔ Seray, Ebram in wɛf, kɔmɔt na Ɔ we de na Babilonia fɔ go na Kenan. Bɔt we dɛn rich na wan ples we nem Eran, dɛn disayd fɔ tap de.

³² Tɛra day na Eran we i ol tu ɔndrɛd ɛn fayv ia.