Jɛnɛsis 10 - Krio Fɔs Oli Baybul

Noa In Pikin dɛn ɛn dɛn Jɛnareshɔn

¹ Dɛn pipul ya so na Noa in pikin dɛn, Shɛm, Am ɛn Jefɛt, dɛn jɛnareshɔn. Afta di flɔd dɛn bin bigin bɔn pikin dɛn ɛn gɛt grampikin ɛn jɛnareshɔn dɛn.

² Jefɛt in bɔypikin dɛn na bin Goma, Magɔg, Maday, Javan, Tubal, Mishɛk ɛn Tayras.

³ Goma in bɔypikin dɛn na Ashkɛnaz, Rifat, ɛn Togama.

⁴ Javan in bɔypikin dɛn na Ilaysha, Tashish, Kitim ɛn Dodanim.

⁵ Dɛn pipul ya, we na Jefɛt in yon jɛnareshɔn na bin di grampa dɛn fɔ di pipul dɛn we bin de na di kost ɛn ayland dɛn. Dɛn bin gɛt dɛn yon kɔntri, ɛn ɔlman bin de tɔk difrɛn laŋwej wit in yon pipul dɛn.

⁶ Am in bɔypikin dɛn na Kush, Ijipt, Put, ɛn Kenan.

⁷ Kush in bɔypikin dɛn na Sɛba, Avila, Sabta, Raama, ɛn Sabtɛka. Raama in bɔypikin dɛn na Shiba ɛn Didan.

⁸ Kush bin gɛt wan bɔypikin we nem Nimrɔd. In na bin di fɔs sojaman: i gɛt trɛnk ɛn sabi fɔ fɛt.

⁹ PAPA GƆD gi am skil fɔ ɔntin. Ɛn na dat mek pipul dɛn kin tɔk se, “PAPA GƆD dɔn mek pɔsin sabi ɔntin lɛkɛ Nimrɔd!”

¹⁰ In yon say we i bigin rul na Babilɔn, Irɛk, Akad ɛn Kalnɛ; dɛn ɔl bin de insay Shina.

¹¹ Frɔm de, i go na Asiria ɛn bil Ninivɛ, Rɛobɔt Ir, Kala,

¹² ɛn Resɛn, we de bitwin Ninivɛ ɛn da big big siti we nem Kala.

¹³ Ijipt na di papa fɔ dɛn na Ludayt dɛn, Anamayt dɛn Liabayt dɛn, Naftuayt dɛn,

¹⁴ Patrɔsayt dɛn, Kaslɔayt dɛn, we na frɔm dɛn, dɛn Filistin dɛn kɔmɔt ɛn dɛn Kaftɔrayt dɛn.

¹⁵ Kenan na di papa fɔ Saydɔn, we na bin di fɔs wan pan dɛn Itayt,

¹⁶ dɛn Jɛbyusayt, dɛn Amɔrayt, dɛn Gagashayt,

¹⁷ dɛn Ivayt, dɛn Akayt, dɛn Sinayt,

¹⁸ dɛn Avadayt, dɛn Zɛmarayt, ɛn dɛn Amatayt dɛn: ɔl di difrɛn Kenan pipul dɛn prɛd ɔlɔbɔt,

¹⁹ sote dɛn bawndri rich na Saydɔn te go na Gɛra we de nia Gaza, ɛn na Sɔdɔm, Gomɔra, Adma, ɛn Zɛboim we de nia Lasha.

²⁰ Dɛn wan ya so na Am in yon jɛnareshɔn dɛn, we bin gɛt dɛn yon kɔntri, ɛn ɔlman bin de tɔk difrɛn laŋwej wit in yon pipul dɛn.

²¹ Di Ibru pipul dɛn na bin Shɛm, we na Jefɛt in big brɔda in jɛnareshɔn dɛn ɛn dɛn na Eba in bɔypikin dɛn.

²² Shɛm in bɔypikin dɛn na Ilam, Ashɔ, Apakshad, Lud, ɛn Aram.

²³ Aram in bɔypikin dɛn na Ɔz, Ɔl, Gɛtha, ɛn Mishɛk.

²⁴ Apakshad bɔn Shila, dɔn Shila in bɔn Eba.

²⁵ Eba bin gɛt tu bɔypikin dɛn: wan nem Pɛlɛg, bikɔs nain tɛm di pipul dɛn na di wɔl bin sheb dɛnsɛf bay dɛn laŋwej; ɛn di ɔda wan nem Joktan.

²⁶ Joktan in jɛnareshɔn dɛn na Almɔdad, Shɛlɛf, Azamavɛt, Jɛra,

²⁷ Adoram, Yuzal, Dikla,

²⁸ Obal, Abimaɛl, Shiba,

²⁹ Ofir, Avila, ɛn Jobab. Ɔl dɛn wan ya na bin Joktan in jɛnareshɔn dɛn.

³⁰ Di say we dɛn bin tap bigin frɔm Mɛsha sote rich Sɛfa we de ɔp il na di ist pat na di kɔntri.

³¹ Dɛn wan ya so na Shɛm in yon jɛnareshɔn dɛn. Dɛn bin gɛt dɛn yon kɔntri ɛn ɔlman bin de tɔk difrɛn laŋwej wit in yon pipul dɛn.

³² Ɔl dɛn pipul ya so na Noa in jɛnareshɔn dɛn, dɛn bin de bay dɛn yon neshɔn, bay usay dɛn kɔmɔt. Na frɔm dɛn wan ya ɔlman kam na di wɔl afta di flɔd.