Jɛnɛsis 1 - Krio Fɔs Oli Baybul

Aw PAPA GƆD Bin Mek Di Wɔl Ɛn Mɔtalman

¹ Wɛn PAPA GƆD bigin mek di wanol wɔl

² di wɔl nɔ bin gɛt shep ɛn natin nɔ bin de de yet. Daknɛs bin de oba di wata ɛn PAPA GƆD in Spirit bin de oba di wata.

³ Nain Gɔd se, “Mek layt kam” nain layt kam.

⁴ PAPA GƆD si di layt i si se i gud. Dɛn PAPA GƆD mek di layt ɛn di daknɛs de difrɛn say,

⁵ i gi di layt nem “De” ɛn di daknɛs i gi nem “Nɛt.” Ivin tɛm kam ɛn do klin, dat na bin di fɔs de.

⁶ Dɛn PAPA GƆD se, “Mek sɔntin de we go sheb di wata tu say.”

⁷ So PAPA GƆD mek dis tin ya. I mek wata de ɔnda am ɛn wata de pantap am.

⁸ I gi dis tin ya nem ‘Skay’ Ivin tɛm kam ɛn do klin, dat na bin di sɛkɛn de.

⁹ Dɛn PAPA GƆD se, “Mek di wata we de ɔnda di skay gɛda na wan ples, ɛn mek dray ples sɛf de,” ɛn dat bin bi.

¹⁰ PAPA GƆD gi di dray ples nem “Grɔn,” ɛn di wata we bin gɛda na wan ples i gi am nem, “Si.” PAPA GƆD bin si se i gud.

¹¹ Dɛn PAPA GƆD se, “Mek ɔlkayn plant gro na di grɔn; gras gras ɛn dɛn wan we de bia sid. Dɛn lɛ dɛn tik we de bia frut we gɛt sid sɛf de. Di sid dɛn fɔ bia ɔda plant ɛn tik dɛn,” ɛn dat bin bi.

¹² So di grɔn bin ful wit plant ɛn tik we de pul sid, ɛn dɛn sid de sɛf bin bia ɔda plant ɛn tik dɛn lɛkɛ dɛnsɛf. PAPA GƆD si se i gud.

¹³ Ivin tɛm kam ɛn do klin, dat na bin di tɔd de.

¹⁴ Dɛn PAPA GƆD se, “Mek layt dɛn kam na di skay fɔ sheb de ɛn nɛt, ɛn we go sho di de dɛn, di ia dɛn, ɛn di sizin dɛn.

¹⁵ Mek dɛn go shayn na di skay fɔ gi layt na di wɔl,” ɛn dat bin bi.

¹⁶ So PAPA GƆD mek di tu big layt dɛm lɛ di san we na di big wan go de, de tɛm, ɛn di mun we na di smɔl wan, shayn na nɛt. I mek di sta dɛnsɛf.

¹⁷ PAPA GƆD put dɛn layt ya so ɔpskay fɔ shayn na di wɔl,

¹⁸ ɛn fɔ sho layt de ɛn nɛt, ɛn fɔ sheb layt ɛn daknɛs. PAPA GƆD bin si se i gud.

¹⁹ Ivin tɛm kam ɛn do klin, dat na bin di de we mek fo.

²⁰ Dɛn PAPA GƆD se, “Mek ɔlkayn tin we gɛt layf de bɔku bɔku wan insay di wata, ɛn mek bɔd dɛn flay ɔpskay.”

²¹ So PAPA GƆD mek big big si krichɔ dɛn fɔ de insay wata, ɛn ɔlkayn pan ɔl di ɔda si animal dɛm, ɛn ɔlkayn difrɛn bɔd dɛn we de flay. PAPA GƆD bin si se i gud.

²² PAPA GƆD blɛs dɛn ɛn se, “Una bɔn bɔku bɔku pikin dɛn fɔ mek una go bɔku na di wata we de na di si ɛn mek di bɔd dɛnsɛf bɔn bɔku pikin dɛm.”

²³ Ivin tɛm kam ɛn do klin, dat na bin di de we mek fayv.

²⁴ Dɛn PAPA GƆD se, “Mek ɔlkayn animal kam na di wɔl: big wan o, smɔl wan o, wayl wan o, dɛn wan we go tap wit pipul na os o, ɛniwan nɔmɔ,” ɛn dat bin bi.

²⁵ So PAPA GƆD mek ɔlkayn animal kam na wɔl: big wan o, smɔl wan o, wayl wan o, ɛn dɛn wan we go tap wit pipul na os. Dɛn ɔl fɔ bɔn pikin we tan lɛkɛ dɛnsɛf. PAPA GƆD bin si se i gud.

²⁶ Dɛn PAPA GƆD se, “Naw, lɛ wi mek mɔtalman we go tan lɛkɛ wi. Lɛ dɛn gɛt pawa oba dis wɔl, oba dɛn fish, dɛn bɔd, ɛn ɔl dɛn krichɔ dɛm, di wan we go tap wit pipul ɛn dɛn wayl bist, di big wan dɛm ɛn di smɔl wan dɛm.”

²⁷ So PAPA GƆD mek mɔtalman: i mek am lɛkɛ insɛf. I mek man ɛn uman.

²⁸ PAPA GƆD blɛs dɛm, ɛn tɛl dɛn se, “Una bɔn bɔku pikin dɛn, fɔ mek una de ɔlsay na di wɔl ɛn kɔntrol di wɔl. Una go gɛt pawa fɔ kɔntrol ɔl di fish dɛm, ɔl di bɔd dɛm ɛn ɔl dɛn animal dɛm.

²⁹ Dɛn PAPA GƆD se, “Luk ya, a dɔn gi una ɔl dɛn plant we de pul sid na di wanol wɔl, ɛn dɛn tik we de bia frut fɔ mek una go it.

³⁰ Dɛn a gi ɔl dɛn gras to dɛn animal ɛn bɔd dɛn fɔ it,” ɛn dat bin bi.

³¹ PAPA GƆD luk ɔl wetin i bin dɔn mek, ɛn i si se ɔltin gud ɛn fayn. Ivin tɛm kam ɛn do klin - dat na bin di de we mek siks.