Jems 5 - Krio Fɔs Oli Baybul

Dɛn Jɛntri Pipul Go Sɔfa

¹ Una we jɛntri, una lisin wetin a de tɛl una naw. Una kray bita wan ɛn sɔri fɔ di waala dɛn we de kam mit una.

² Ɔl di plɛnti plɛnti tin dɛn we una gɛt dɔn rɔtin ɛn dɛn arata dɔn it una klos dɛn.

³ Una silva ɛn gold dɔn rɔsti. Di rɔsti we una silva ɛn gold dɔn rɔsti, nain go kɔndɛm una ɛn i go it una bɔdi lɛkɛ aw faya kin du. Na da kayn jɛntri de una dɔn gɛda fɔ di tɛm we Gɔd go jɔj mɔtalman.

⁴ Una nɔ pe dɛn pipul we de wok na una fam ɔl wetin dɛn fɔ gɛt. Dɛn dɔn le kɔmplen ɛn Gɔd we na di Masta we pas ɔl, dɔn yɛri dɛn.

⁵ Una dɔn gɛt ɔl dɛn fayn fayn tin we una want na wɔl, ɛn una dɔn du ɔl wetin una lɛk fɔ du. Ɔl dɛn tin ya mek una tan lɛkɛ ɔg we dɔn fat rɛdi fɔ mek dɛn kil am.

⁶ Una dɔn kɔndɛm dɛn pipul we nɔ du una natin; dɛn nɔ se fiŋ, ɛn una dɔn kil dɛn.

Una Bia ɛn Pre

⁷ Mi kɔmpin Kristiɛn dɛn, una fɔ bia sote di Masta kam. Una mɛmba aw dɛn pipul we de mek fam kin bia wet sote di tɛm rich fɔ pik wetin dɛn bin plant.

⁸ Semwe so, unasɛf fɔ bia wet. Una nɔ mek una at pwɛl bikɔs di tɛm dɔn de rich we wi Masta Jizɔs Krays fɔ kam bak.

⁹ Mi kɔmpin Kristiɛn dɛn, una nɔ fɔ kɔmplen bɔt una kɔmpin, so dat wɛn Gɔd jɔj una, i nɔ go kɔndɛm una. Di Jɔj we go jɔj wi dɔn kam klos, i tinap na domɔt.

¹⁰ Mi kɔmpin Kristiɛn dɛn, una mɛmba dɛn prɔfɛt we bin de tɔk Gɔd in mɛsej, dɛn bin sɔfa plɛnti, bɔt dɛn bia; na so unasɛf fɔ bia.

¹¹ Wi se Gɔd blɛs dɛn bikɔs dɛn bia. Una no aw Job bin bia lɔŋ wɛn i bin de sɔfa, ɛn una si aw Gɔd kam blɛs am. Ɔl dat fɔ mek una no se fɔ tru, Gɔd de sɔri fɔ wi wɛn wi de sɔfa, ɛn i de sɔri fɔ wi pan ɔl we wi du tin we fɔ mek i vɛks.

¹² Mi kɔmpin Kristiɛn dɛn, a want tɛl una wan ɔda tin we pas ɔl wetin a bin dɔn tɛl una. Wɛn una prɔmis fɔ du sɔntin, una nɔ fɔ swɛ. Una nɔ swɛ to Gɔd, una nɔ swɛ wit ɛnitin na dis wɔl. If una gri fɔ ɛnitin, una fɔ se, “Yɛs;” if una nɔ gri, una fɔ se, “Nɔ,” so dat wɛn Gɔd go jɔj una, i nɔ go kɔndɛm una.

¹³ If ɛni wan pan una de sɔfa, mek i aks Gɔd fɔ ɛp am. If ɛni wan pan una gladi, mek i siŋ ɛn prez Gɔd.

¹⁴ If ɛni wan pan una sik, mek i kɔl dɛn bigman na chɔch mek dɛn pre fɔ am. Wɛn dɛn de pre, mek dɛn tek ɔyl tɔn lili bit pan di pɔsin ɛn aks wi Masta Jizɔs Krays fɔ mɛn am.

¹⁵ If dɛn biliv se Gɔd go du wetin dɛn de pre fɔ, di sik pɔsin go wɛl. Gɔd go mek i wɛl gud gud, ɛn pantap dat, if di pɔsin bin dɔn du bad, Gɔd go padin am.

¹⁶ Na dat mek, una fɔ tɛl una kɔmpin Kristiɛn di sin dɛn we una dɔn sin ɛn una fɔ pre mek Gɔd mek una wɛl. Wɛn pɔsin we de waka tret bifo Gɔd pre, da pre de gɛt pawa ɛn Gɔd go ansa am.

¹⁷ Ilayja na bin mɔtalman lɛkɛ wisɛf. I pre wit ɔl in at fɔ mek ren nɔ kam ɛn tri ia ɛn siks mɔnt wan ren nɔ fɔdɔm.

¹⁸ Wɛn i pre bak ren kam ɛn ɔltin bigin gro bak.

¹⁹ Mi kɔmpin Kristiɛn dɛn, if ɛni wan pan una slipul ɛn kɔmɔt na Gɔd in rod, bɔt sɔmbɔdi briŋ am kam bak,

²⁰ una fɔ no se, di pɔsin we briŋ wan sina kam bak na Gɔd rod ɛn ɛp am mek i lɛf fɔ du bad, dɔn sev da pɔsin de ɛn Gɔd go padin am fɔ plɛnti ɔda bad tin dɛn we i du.