Jems 4 - Krio Fɔs Oli Baybul

Una fɔ Du Wetin Gɔd Want Una fɔ Du

¹ Wetin mek una de fɛt ɛn mek plaba ɔltɛm? Dɛn tin we de insay una at we de fɛt fɔ mek una nɔ de wit Gɔd, na dɛn de mek una fɛt ɛn mek plaba ɔltɛm.

² Wɛn una want sɔntin una nɔ gɛt am, na dat kin mek una kil una kɔmpin. Wɛn una put yay pan sɔntin una nɔ gɛt am, na dat kin mek una mek plaba ɛn fɛt una kɔmpin. Una nɔ gɛt wetin una want bikɔs una nɔ aks Gɔd fɔ gi una.

³ Sɔntɛm una kin aks Gɔd fɔ sɔntin ɛn Gɔd nɔba gi una, bikɔs di rizin we mek una aks nɔ rayt. Una aks fɔ dɛn tin we fɔ mek una nɔmɔ satisfay.

⁴ Una tan lɛkɛ uman we nɔ tret wit in man! Una nɔ no se wɛn una lɛk dɛn tin we de na wɔl, dat go mek una nɔ lɛk Gɔd? Ɛnibɔdi we want dɛn tin na wɔl dɔn bi pɔsin we nɔ lɛk Gɔd.

⁵ Una min se na fɔ natin Gɔd in Buk se, “Gɔd in Spirit we i put insay wi, want wi fɔ insɛf nɔmɔ?”

⁶ Bɔt di blɛsin we Gɔd gi wi pas di bad we de na wi at. Dɛn rayt na Gɔd in Buk se, “Gɔd nɔ de gri mek dɛn prawd pipul gɛt dɛn yon we, bɔt i de blɛs dɛn wan we nɔ prawd.”

⁷ So, una fɔ put unasɛf ɔnda Gɔd. Una tinap fɔ fɛt Setan, i go rɔnawe go lɛf una.

⁸ Una kam klos Gɔd ɛn i go kam klos una. Una dɛn sina, una lɛf fɔ sin. Una dɛn ipokrit, una pul dɛn bad tin kɔmɔt na una at.

⁹ Una fɔ mɛmba dɛn bad we una dɔn du; ɛn una fɔ sɔri ɛn kray fɔ dɛn. Una fɔ lɛf fɔ laf, una fɔ sɔri ɛn kray; una nɔ fɔ gladi, una fɔ sɔri.

¹⁰ Una put unasɛf ɔnda Gɔd, una nɔ mek prawd, Gɔd go lif una ɔp.

Una Nɔ Jɔj Una Kɔmpin

¹¹ Mi Kristiɛn pipul dɛn, una lɛf fɔ tɔk bad bɔt una kɔmpin mɔtalman. Ɛnibɔdi we tɔk bad bɔt in kɔmpin ɔ jɔj am, da pɔsin de de tɔk bad bɔt Gɔd in Lɔ, ɛn i de jɔj Gɔd in Lɔ. If una jɔj Gɔd in Lɔ, dat min se una nɔ de fala Gɔd in Lɔ.

¹² Na Gɔd wangren gɛt pawa fɔ gi pipul Lɔ, nain wangren gɛt pawa fɔ jɔj, nain wangren gɛt pawa fɔ sev pipul mek dɛn nɔ day, ɛn nain gɛt pawa fɔ mek pipul day. Udat na una fɔ de jɔj una kɔmpin mɔtalman?

Una Nɔ Bost

¹³ Una lisin wetin a de kam tɛl una, una we de tɔk se, “Tide ɔ tumara wi go go na da tɔŋ yanda ɛn tap de fɔ wan ia. Wi go tredin, ɛn mek plɛnti mɔni.”

¹⁴ Bɔt una nɔ no wetin go bi to una tumara. Una layf tan lɛkɛ fɔg we kin de wan minit, di ɔda minit i dɔn lɔs.

¹⁵ Wɛn una want tɔk, una fɔ se, “If Gɔd gri, wi nɔ go day ɛn wi go du dis tin ya ɔ wi go du da tin de.”

¹⁶ Bɔt una de mek prawd ɛn bost bɔt unasɛf. Fɔ bost na sin.

¹⁷ So, ɛnibɔdi we no wetin i fɔ du ɛn i nɔ du am, da pɔsin de dɔn sin.