Jems 3 - Krio Fɔs Oli Baybul

Di Mɔt

¹ Mi kɔmpin Kristiɛn dɛn, una we fɔ bi ticha nɔ fɔ plɛnti. Una mɛmba se Gɔd go jɔj wi we de tɛl ɔda pipul wetin dɛn fɔ du traŋa wan pas aw i go jɔj dɛn ɔda pipul.

² Wi ɔl de du tin we nɔ rayt. Ɛnibɔdi we nɔba tɔk tin we nɔ rayt na pɔsin we nɔba du tin we nɔ rayt. I ebul kɔntrol ɔl pat pan in bɔdi.

³ Wi kin put wan lili ayɛn na ɔs in mɔt fɔ mek i du wetin wi want am fɔ du.

⁴ Dɛn big ship sɛf we de na wata, pan ɔl we dɛn big big briz kin want kɛr dɛn go, na lili tin we dɛn put ɔnda di ship de kɔntrol dɛn ɛn mek dɛn go ɛni say we di paylɔt want mek dɛn go.

⁵ Semwe so, wi mɔt na smɔl tin na wi bɔdi, bɔt i kin du plɛnti big big tin. Na lili faya, lɛkɛ di faya we kin kɔmɔt wɛn pɔsin krach machis, de mek big big bush bɔn.

⁶ Wi mɔt tan lɛkɛ faya. Soso bad ful insay wi mɔt ɛn we wi mɔt na wan pat pan wi bɔdi, i de mek ɔl wi bɔdi bad. Wi mɔt de pwɛl wi frɔm di tɛm we wi bɔn sote wi day. Dɛn bad tin we de kɔmɔt na wi mɔt kɔmɔt to Setan na ɛl.

⁷ Mɔtalman ebul kɔntrol ɔl kayn bif na bush, ɔl kayn bɔd, ɔl kayn snek ɛn ɔl kayn fish,

⁸ bɔt nɔbɔdi nɔ de we ebul kɔntrol in mɔt; wi mɔt na tin we nɔ de sɛt, wi de tek am tɔk bad tin. Dɛn bad tin ya na lɛkɛ pɔyzin, dɛn de kil.

⁹ Tɛm de we wi kin tek wi mɔt tɛl wi Masta ɛn wi Papa tɛnki, bɔt ɔda tɛm wi kin tek di sem mɔt kɔs mɔtalman we Gɔd mek lɛkɛ insɛf.

¹⁰ Na dis sem mɔt ya wi de tek fɔ tɛl Gɔd tɛnki ɛn fɔ kɔs. Mi kɔmpin Kristiɛn dɛn, i nɔ fɔ bi so.

¹¹ Una nɔ go gɛt wata we tes fayn ɛn wata we tes bad na di sem wɛl.

¹² Maŋro tik nɔ go bia brɛfut. Lɛm tik nɔ go bia ɔrinch. Semwe so, frɛsh wata nɔ go kɔmɔt na sɔl wata.

Na Gɔd de Gi Pipul Sɛns

¹³ Uswan pan una de we gɛt sɛns ɛn we ɔndastand plɛnti tin? Mek i waka tret ɛn du gud ɛn wɛn i de du gud, mek i nɔ prawd ɛn mek i du ɔltin wit sɛns; na dat go sho se in na pɔsin we gɛt sɛns ɛn i de ɔndastand.

¹⁴ If una de jɛlɔs ɔda pipul ɛn una gɛt bad at fɔ dɛn ɛn una jɛs de mɛmba unasɛf nɔmɔ, una nɔ fɔ bost se una gud ɛn una gɛt sɛns, bikɔs if una du so, una nɔ de tɔk tru.

¹⁵ Nɔto Gɔd gi mɔtalman dis kayn sɛns ya, na dis wɔl yon sɛns ɛn na Setan gi mɔtalman.

¹⁶ Ɛni say we pipul de jɛlɔs dɛn kɔmpin ɛn dɛn want ɔltin fɔ dɛnsɛf, una nɔ go fɛn wanwɔd de; na soso bad lib de.

¹⁷ Di sɛns we Gɔd de gi, na pɔsin wit klin at i de gi, na di fɔs tin dat. Pɔsin we gɛt da kayn sɛns de nɔ de mek plaba, i nɔ de ambɔg, i de du tin saful saful, ɛn i lɛk fɔ ɛp pipul; i gɛt sɔri at ɛn i de du plɛnti plɛnti gud; ɔl in at de fɔ Gɔd, i nɔ ipokrit.

¹⁸ Dɛn pipul we de mek pis, tan lɛkɛ fama we de plant sid. Di pis we dɛn de mek tan lɛkɛ di sid we fama plant. Dis sid ya go bia plɛnti gud na pipul dɛn at.