Jems 2 - Krio Fɔs Oli Baybul

Wi Ɔl na Wan Bifo Gɔd

¹ Mi pipul dɛn we biliv pan wi Masta Jizɔs Krays we de rul wit pawa, una nɔ fɔ trit wan pɔsin fayn pas in kɔmpin bay aw una si di pɔsin.

² If tu pɔsin kam na una mitin, wan wɛr gold riŋ ɛn i jɛntri, i wɛr fayn klos; di ɔda wan po, i wɛr chɛr chɛr klos,

³ una nɔ fɔ tɛl di pɔsin we drɛs fayn se, “Duya, kam sidɔm bifo ya!” Dɛn una tɛl di poman se, “Go, tinap yanda!” Ɔ “Go, sidɔm na grɔn!”

⁴ If ɛnibɔdi du dat, i dɔn du bad we i de luk se wan pɔsin bɛtɛ pas in kɔmpin. Di tin we mek i de du dat nɔ fayn.

⁵ Mi kɔmpin Kristiɛn dɛn we a lɛk, a want mek una yɛri mi! Dɛn pipul we nɔ gɛt natin na dis wɔl, Gɔd dɔn pik dɛn fɔ biliv wi Masta Jizɔs Krays ɛn fɔ mek dɛn go na ɛvin we i de rul; dɛn jɛntri na Gɔd in yay. Na dat Gɔd dɔn prɔmis fɔ du fɔ ɔl dɛn wan we lɛk am.

⁶ Wetin mek una nɔ tek dɛn po pipul mek ɛnitin? Na dɛn jɛntri pipul de mek una tan lɛkɛ slev ɛn na dɛn de drɛg una go bifo dɛn jɔj.

⁷ Na dɛn jɛntri pipul nɔ gɛt rɛspɛkt fɔ Jizɔs Krays in nem. Ɛn na di nem dat we Gɔd dɔn tek fɔ mek una bi in yon pipul.

⁸ Una de du di rayt tin if una de fala Gɔd, we de rul wi in lɔ we rayt nain Buk se, “Una fɔ lɛk una kɔmpin, lɛkɛ aw una lɛk unasɛf.”

⁹ Bɔt if una trit wan pɔsin fayn pas in kɔmpin mɔtalman bay aw di pɔsin luk, una dɔn sin, ɛn di lɔ go kɔndɛm una, se una dɔn du bad.

¹⁰ If pɔsin de du ɔl wetin Gɔd in Lɔ se, bɔt i brok wan pan di lɔ dɛn, i dɔn brok ɔl di ɔda lɔ dɛn na Gɔd in yay.

¹¹ Gɔd we se, “Yu nɔ fɔ kil pɔsin,” na di sem Gɔd se, “Yu nɔ fɔ lɛf yu mared man ɔ wɛf go fɛn ɔda pɔsin na trit.” If yu nɔ lɛf yu mared man ɔ wɛf go fɛn ɔda pɔsin na trit, bɔt yu kil yu kɔmpin mɔtalman, na Gɔd yay, yu dɔn brok ɔl di lɔ dɛn.

¹² Una tek tɛm wetin una de tɔk ɛn wetin una de du, bikɔs wande Gɔd go tek di lɔ, dat nain wɔd, we de fri ɔlman, jɔj wi.

¹³ If pɔsin nɔ de sɔri fɔ in kɔmpin mɔtalman ɛn padin am wɛn i du am bad, Gɔd nɔ go sɔri fɔ da pɔsin de ɛn padin am wɛn i go jɔj am. Bɔt pɔsin we de sɔri fɔ in kɔmpin mɔtalman ɛn padin am, Gɔd insɛf go sɔri fɔ insɛf ɛn padin am wɛn i de jɔj am.

Una Biliv Gɔd ɛn Du Wetin Gud

¹⁴ Mi Kristiɛn pipul dɛn, i nɔ min natin if pɔsin se in biliv Gɔd bɔt ɔl wetin i de du nɔ sho se i biliv Gɔd. If pɔsin biliv Gɔd ɛn i nɔ de du ɛnitin we sho se in biliv am, dat nɔ go sev am.

¹⁵ If una kɔmpin Kristiɛn nɔ gɛt tin fɔ it ɛn tin fɔ wɛr,

¹⁶ ɛn wan pan una tɛl am se, “Go, mek bɛtɛ fala yu ya, a op se yu go fɛn tin fɔ it ɛn klos fɔ wɛr,” bɔt i nɔ gi am ɔl wetin i want fɔ in bɔdi, dɛn wɔd de nɔ min natin!

¹⁷ Wɛl, na so i fɔ bi wɛn pɔsin biliv Gɔd. If i jɛs tɔk nɔmɔ se in biliv Gɔd, bɔt i nɔ du ɛnitin fɔ sho se in biliv Gɔd, di biliv we da pɔsin de se in biliv Gɔd, nɔ min natin!

¹⁸ Sɔntɛm pɔsin go se, “Wan pɔsin biliv Gɔd, bɔt ɔda wande du dɛn tin we sho se i biliv Gɔd.” A go ansa da pɔsin de se, “Aw pɔsin go sho se in biliv Gɔd if a nɔ si di tin dɛn we i de du fɔ sho se i biliv Gɔd? Wetin a de du go sho una se a biliv Gɔd.”

¹⁹ So, una biliv se na wangren Gɔd de. Una rayt! Bɔt dɛn dɛbul dɛnsɛf no se Gɔd de, na dat mek dɛn de fred am ɛn trimbul bifo am.

²⁰ Una we nɔ de gri fɔ ɔndastand! If una biliv Gɔd, bɔt una nɔ de du dɛn tin we sho se una biliv Gɔd, di biliv we una se una biliv Gɔd, nɔ min natin.

²¹ Una mɛmba Ebraam we na wan pan wi grampapa papa dɛn; wetin mek ɔltin bin rayt bitwin in ɛn Gɔd? Na bikɔs i bin tek in pikin Ayzak fɔ go sakrifays am.

²² Una nɔ si se wetin Ebraam du sho se i bin biliv Gɔd? Una nɔ si se Ebraam bin biliv Gɔd bikɔs i du wetin Gɔd tɛl am fɔ du?

²³ Di tin we Gɔd in wɔd bin dɔn tɔk kam bi tru. I bin se, “Ebraam biliv Gɔd ɛn Gɔd kɔl am pɔsin we de waka tret.” Pipul kɔl am Gɔd in padi.

²⁴ So una si, nɔto aw pɔsin biliv Gɔd nɔmɔ de mek ɔltin rayt bitwin in ɛn Gɔd, bɔt na dɛn tin sɛf we i de du.

²⁵ Reab, da trit uman, na pɔsin we bin ayd dɛn trenja ɛn mek dɛn pas ɔda rod fɔ go usay dɛn bin kɔmɔt; na dat mek ɔltin rayt bitwin in ɛn Gɔd.

²⁶ Lɛkɛ aw pɔsin kin day wɛn in spirit nɔ de insay am igen, semwe so, pɔsin we se in biliv Gɔd ɛn i nɔ de du dɛn tin we sho se i biliv am, nɔ biliv Gɔd at ɔl.