Di Jɔj Dɛm 9 - Krio Fɔs Oli Baybul

Abimɛlɛk

¹ Gidiɔn in bɔypikin we nem Abimɛlɛk, go Shɛkɛm to in yon mama in pipul dɛn go tɛl dɛn se,

² lɛ dɛn aks ɔl di pipul dɛn na Shɛkɛm if dɛn go want lɛ ɔl Gidiɔn in sɛvinti pikin rul dɛn ɔ na wan nɔmɔ dɛn wan lɛ rul. I tɛl dɛn se lɛ dɛn mɛmba se in na dɛn yon pikin.

³ So dɛn tɔk to ɔl di pipul dɛn na Shɛkɛm fɔ am bɔt dat, ɛn dɛn ɔl bin gri. Dɛn se Abimɛlɛk na dɛn yon blɔd.

⁴ Di pipul dɛn gi am sɛvinti silva kɔpɔ we dɛn pul na Baal ɔf di Kɔvinant in os, we i tek pe rareman dɛn fɔ de wit am.

⁵ Nain dɛn go nain papa in os na Ofrɔ go kil ɔl in sɛvinti brɔda pan wangren ston, bɔt dɛn nɔ ebul kil di las bɔypikin pan dɛn ɔl we nem Jotham; in bin ayd.

⁶ Di pipul dɛn na Shɛkɛm ɛn Bɛthmili go mek Abimɛlɛk kiŋ ɔnda di kɔtintri we de na Shɛkɛm.

⁷ We Jotham yɛri bɔt dat, i go tinap pantap Mawnt Gɛrizim ɛn ala tɛl dɛn se, if dɛn wan lɛ PAPA GƆD yɛri dɛn, lɛ dɛn lisin to am.

⁸ Jotham tɛl dɛn se wande, dɛn tik dɛn ɔl gɛda fɔ pik dɛn kiŋ. Nain dɛn tɛl di Ɔliv tik se mek in bin dɛn kiŋ

⁹ Nain di Ɔliv tik aks dɛn se if in fɔ lɛf fɔ de pul in ɔyl we dɛn de tek gi rɛspɛkt to gɔd ɛn mɔtalman, ɛn go se in de go bi dɛn tik dɛn kiŋ.

¹⁰ Nain dɛn tɛl di Fignɔt tik se mek in bin dɛn kiŋ.

¹¹ Nain Fignɔt tik se if in fɔ lɛf fɔ de pul dɛn swit swit frut ɛn go se in de go bi dɛn tik dɛn kiŋ.

¹² So dɛn tɛl Greps tik fɔ bi dɛn kiŋ.

¹³ Greps tik in tɛl dɛn se if in fɔ lɛf fɔ pul wayn we gɔd ɛn mɔtalman dɛn de drink fɔ mek dɛn at swit, ɛn go se in de go bi dɛn tik dɛn kiŋ.

¹⁴ Nain ɔl di tik dɛn tɛl chuk chuk bush se lɛ in bi dɛn kiŋ.

¹⁵ Nain chuk chuk bush se if dɛn min am fɔ tru, lɛ dɛn go ayd ɔnda in shed, if nɔ so, lɛ in chuk chuk branch dɛn pul faya ɛn bɔn di Sida dɛn na Libanɔn.

¹⁶ Nain Jotham kɔntinyu ɛn tɛl dɛn se if na wit ɔl dɛn at ɛn na di tret we dɛn mek Abimɛlɛk kiŋ, ɛn if na wetin Gidiɔn fɔ gɛt fɔ di gud we i bin du, dɛn du to in pikin dɛn so;

¹⁷ bikɔs in papa risk in layf ɛn fɛt fɔ dɛn ɛn pul dɛn na di Midianayt dɛn an,

¹⁸ ɛn de lɛk tide, dɛn tɔn agens in papa ɛn kil in sɛvinti pikin pantap wangren ston, ɛn mek Abimɛlɛk we na wokuman pikin, kiŋ na Shɛkɛm, bikɔs na dɛn fambul to in mama say.

¹⁹ If fɔ tru se na wit ɔl dɛn at ɛn rɛspɛkt fɔ Gidiɔn dɛn tek biev so to in pikin dɛn, lɛ dɛn gɛt kolat wit Abimɛlɛk ɛn lɛ insɛf gɛt kolat wit dɛn.

²⁰ Nain i se if nɔto so i bi, lɛ faya kɔmɔt pan Abimɛlɛk ɛn kil di pipul dɛn na Shɛkɛm ɛn Bɛthmilo, ɛn lɛ faya kɔmɔt pan di pipul dɛn na Shɛkɛm ɛn Bɛthmilo ɛn kil Abimɛlɛk.

²¹ Nain Jotham rɔnawe go ayd na Bia. I bin go tap de bikɔs i bin de fred in brɔda Abimɛlɛk.

²² Abimɛlɛk rul Izrɛl fɔ tri ia,

²³ nain PAPA GƆD mek bad blɔd kam de bitwin Abimɛlɛk ɛn di man dɛn na Shɛkɛm; di man dɛn na Shɛkɛm tɔn pan Abimɛlɛk;

²⁴ so dat Abimɛlɛk ɛn di man dɛn na Shɛkɛm we bin jɔynan wit am fɔ kil in sɛvinti brɔda dɛn, go sɔfa fɔ wetin dɛn du.

²⁵ Di Shɛkɛm man dɛn put pipul dɛn ɔp dɛn mawnten dɛn fɔ ambush Abimɛlɛk, ɛn dɛn bin de tif ɛnibɔdi we bin de pas de. So dɛn tɛl Abimɛlɛk bɔt dat.

²⁶ Ibɛd in bɔypikin we nem Gal, bin go tap wit in pipul dɛn na Shɛkɛm; di Shɛkɛm man dɛn bin biliv ɛn rɛspɛkt am.

²⁷ So dɛn go na dɛn fam dɛn go gɛda greps mek wayn. Dɔn dɛn mek fɛstival. Dɛn go na dɛn gɔd in os go it ɛn drink ɛn mɔk Abimɛlɛk.

²⁸ Nain Ibɛd in bɔypikin we nem Gal tɔk se udat na Abimɛlɛk ɛn aw di man dɛn na Shɛkɛm dɔn mek dɛnsɛf sote dɛn de go baw to am. Nɔto Gidiɔn in pikin we Zɛbul de wok ɔnda. I aks se wetindu dɛn fɔ baw to am. I tɛl di Shɛkɛm man dɛn se lɛ dɛn nɔ kɔmɔt biɛn Amɔ we na papa fɔ Shɛkɛm in yon pipul dɛn.

²⁹ Gal se in wish nain na bin di pipul dɛn lida, in bin fɔ kil am. I se in bin fɔ tɛl am se lɛ i put mɔ man dɛn nain ami ɛn kam fɛt.

³⁰ Wɛn Zɛbul we de rul di siti yɛri bɔt wetin Gal we na Ibɛd in bɔypikin se, i vɛks bad bad wan.

³¹ Nain i sɛn mɛsej to Abimɛlɛk na Aruma se, Gal we na Ibɛd in bɔypikin ɛn in kɔntri man dɛn dɔn go Shɛkɛm, ɛn de tɔk tin dɛn we go mek di pipul dɛn tɔn agens am.

³² I se lɛ Abimɛlɛk tek in man dɛn na nɛt ɛn go ayd nia di siti..

³³ Dɔn i se as do klin so we di san kɔmɔt, lɛ Abimɛlɛk ɛn in man dɛn atak di siti wantɛm wantɛm. I se we Gal ɛn in sojaman dɛn kam fɔ fɛt dɛn, mek i sho dɛn pɛpɛ.

³⁴ So Abimɛlɛk ɛn in man dɛn grap na nɛt. Dɛn sheb to fo grup go ayd nia Shɛkɛm.

³⁵ Gal we na Ibɛd in pikin bin go tinap na di siti get, nain Abimɛlɛk ɛn in man dɛn grap kɔmɔt usay dɛn bin ayd.

³⁶ Nain Gal tɛl Zɛbul se i si man dɛn de rɔn kan dɔŋ di mawnten. Bɔt Zɛbul tɛl am se na shado i de si we i de fil se na pɔsin.

³⁷ Bɔt Gal tɛl am igen se in de si pipul dɛn de kɔmɔt midul di siti ɛn sɔm de kɔmɔt to usay dɛn pipul dɛn we kin tɛl pɔsin wetin go apin to am, de.

³⁸ Nain Zɛbul aks am se amin i bin de tɔk big tɔk se udat na Abimɛlɛk we pipul dɛn fɔ butu to am; na di pipul dɛn dɛnwandɛnde we i bin de tɔk bad bɔt, so lɛ i go mit dɛn ɛn fɛt dɛn.

³⁹ So Gal tinap bifo di man dɛn na Shɛkɛm ɛn fɛt Abimɛlɛk.

⁴⁰ Nain Abimɛlɛk rɔnata am, bɔt i rɔnawe. Plɛnti pan Gal in man dɛn bin wund; ivin di wan dɛn we bin de ɔp to di get say.

⁴¹ Abimɛlɛk bin tap na Aruma. Zɛbul bin drɛb Gal ɛn in kɔntriman dɛn kɔmɔt Shɛkɛm.

⁴² Di nɛks de, Abimɛlɛk bin fɛnɔt se, di man dɛn na Shɛkɛm de plan fɔ go na di fil.

⁴³ So i sheb in man dɛn to tri grup go ambush dɛn na di fil. We i wach, nain i si dɛn de kam. So dɛn fɔdɔm pan dɛn ɛn kil dɛn ɔl.

⁴⁴ Abimɛlɛk ɛn in man dɛn nain yon grup bin go bifo go tinap na di get we di ɔda tu grup de dil wit di man dɛn na di fil.

⁴⁵ Da ol de de, Abimɛlɛk de fɛt di pipul dɛn na Shɛkɛm; i kapchɔ di siti, nyakanyaka am, kil ɔl di pipul dɛn ɛn trowe sɔl na di grɔn.

⁴⁶ We di bigman dɛn na Shɛkɛm we bin de na di tawa na Shɛkɛm yɛri bɔt wetin dɔn apin, dɛn go ayd na di sikrit ples na da gɔd we nem Baal ɔf di Kɔvinant, in tɛmpul.

⁴⁷ Abimɛlɛk yɛri se ɔl di bigman dɛn we bin de na di tawa, ayd wan say.

⁴⁸ Nain Abimɛlɛk ɛn ɔl in man dɛn we bin de wit am go ɔp Mawnt Zalmɔn. We dɛn de go, Abimɛlɛk tek aks kɔt wan branch na wan tik ɛn tot am nain sholda. Nain i tɛl in man dɛn se lɛ dɛnsɛf du wetin dɛn si in du.

⁴⁹ So ɔlman kɔt wan wan branch kɛr go put na Baal ɔf di Kɔvinant in tɛmpul wɔl. Dɛn layt faya pan dɛn ɛn di tɛmpul bɔn ɛn ɔl di bigman dɛn na di tawa na Shɛkɛm we bin go ayd, day. Na bin bɔt wan tawzin man ɛn uman day de.

⁵⁰ Afta dat, Abimɛlɛk go sɔrawnd Thɛbɛz ɛn kapchɔ de.

⁵¹ Bɔt di pipul dɛn bin gɛt wan traŋa traŋa ples fɔ ayd na dɛn siti; dɛn ɔl go insay de ɛn lɔk dɛnsɛf.

⁵² Abimɛlɛk go atak di tawa. I fɛt te i rich nia di domɔt fɔ go bɔn am.

⁵³ Nain wan uman ib grenin ston na Abimɛlɛk in ed ɛn brok in skɔl.

⁵⁴ Wantɛm wantɛm i kɔl di yɔŋman we de ol di ayɛn klos we i kin wɛr nain bɔdi fɔ fɛt ɛn tɛl am lɛ i tek in sɔd kil am, lɛ pipul dɛn nɔ go tɔk se na uman kil am.

⁵⁵ We di man dɛn na Izrɛl si se Abimɛlɛk dɔn day, dɛn ɔl go bak na dɛn os.

⁵⁶ Na da we de PAPA GƆD bin pe Abimɛlɛk fɔ di bad tin we i du to in papa; dat na we i kil in sɛvinti brɔda dɛn.

⁵⁷ Dɔn PAPA GƆD pe di Shɛkɛm man dɛn fɔ di bad tin dɛn we dɛn du, ɛn di swɛ we Jotham we na Jɛrubaal in pikin bin swɛ dɛn, bin kech dɛn.