Di Jɔj Dɛm 8 - Krio Fɔs Oli Baybul

Di Tɛm We Dɛn Bit Di Midianayt Dɛn Kpatakpata

¹ Di man dɛn na di Ifrem fambul grɔmbul bita bita wan se Gidiɔn nɔ bin kɔl dɛn we dɛn bin de go fɛt di Midianayt dɛn.

² Nain Gidiɔn ansa dɛn se, dɛn nɔ go ivin kɔmpia wetin dɛn dɔn du to wetin in du; wetin dɛn du we dɛn kam, bɛtɛ pas wetin dɛn we bin de dɔn du.

³ Gidiɔn se PAPA GƆD dɔn mek dɛn dɔn ebul kech di tu Midianayt prins dɛn we na Ɔrɛb ɛn Ziɛb. I se wetin in du we rich dat. We Gidiɔn tɔk dat, nain dɛn at kol.

⁴ Ɔl we dɛn bin dɔn taya, Gidiɔn ɛn in tri ɔndrɛd man go krɔs Riva Jɔdan de rɔnata di Midianayt dɛn.

⁵ We dɛn rich Sukɔth, i beg di pipul dɛn tin fɔ it fɔ di pipul dɛn we bin de wit am, bikɔs dɛn bin dɔn aŋri ɛn taya bad bad wan. I tɛl dɛn se in de rɔnata Zibɔ Zalmuna we na kiŋ dɛn na Midian.

⁶ Nain di bigman dɛn na Sukɔth se dɛn nɔ go gi dɛn tin fɔ it bikɔs dɛn nɔ kech Zibɔ Zalmuna yet.

⁷ Nain Gidiɔn tɛl dɛn se we PAPA GƆD mek in kech Zibɔ Zalmuna, in go tek chuk chuk tik dɛn we kɔmɔt na di dray ɛn ɛmti ples, bit di Sukɔth pipul dɛn ɛn pwɛl dɛn bɔdi.

⁸ We dɛn kɔmɔt de, dɛn go Pɛnyuɛl. I aks dɛnsɛf fɔ tin fɔ it ɛn dɛn tɛl am di sem tin we di pipul dɛn na Sukɔth bin tɛl am.

⁹ Gidiɔn tɛl di pipul dɛn na Pɛnyuɛl se we in go de bak, in go brok dɛn tawa.

¹⁰ Zibɔ Zalmuna bin de Kakɔ wit dɛn ami we na bin bɔt fiftin tawzin man bin lɛf pan di pipul dɛn na di ist dɛn ami; wan ɔndrɛd ɛn twɛnti tawzin pan dɛn man dɛn bin dɔn day.

¹¹ So Gidiɔn pas na di rod nia di dɛzat we de na di ist say to Nɔba ɛn Jɔgbɛa ɛn atak dɛn we dɛn nɔ mekɔp.

¹² Di tu Midianayt kiŋ, Zibɔ ɛn Zalmuna rɔnawe, bɔt Gidiɔn rɔnata dɛn ɛn kapchɔ dɛn we mek di Midianayt sojaman dɛn kɔnfyus.

¹³ Na Ɛrɛs shɔtkɔt Gidiɔn bin pas we i bin de go om afta di fɛt.

¹⁴ Na de i kech wan yɔŋman we tap na Sukɔth. Gidiɔn aks am fɔ gi am di bigman dɛn na Sukɔth dɛn nem. Di yɔŋman rayt sɛvinti sɛvin nem fɔ am.

¹⁵ Nain Gidiɔn go mit di pipul dɛn na Sukɔth go sho dɛn Zibɔ ɛn Zalmuna, ɛn mɛmba dɛn aw dɛn bin tɛl am se pas i kapchɔ Zibɔ ɛn Zalmuna bifo dɛn go gi in man dɛn tin fɔ it we dɛn bin aŋri ɛn taya.

¹⁶ Gidiɔn tek chuk chuk na di dray ples pɔnish di bigman dɛn na Sukɔth.

¹⁷ I brok di tawa ɛn kil di man dɛn na Pɛnyuɛl.

¹⁸ Afta dat, Gidiɔn aks Zibɔ ɛn Zalmuna bɔt di man dɛn we dɛn kil na Tabɔ. Dɛn ansa an se in Gidiɔn ɛn di man dɛn bin fiba; dɛn ɔl bin fiba kiŋ pikin.

¹⁹ Nain Gidiɔn tɛl dɛn se nain brɔda dɛn bay wan mama, ɛn swɛ se if dɛn nɔ bin kil in brɔda dɛn, in nɔ bin fɔ kil dɛn.

²⁰ Nain i tɛl in fɔs-bɔy-pikin Jɛtha se mek i kil dɛn. Bɔt di bɔbɔ nɔ pul in sɔd fɔ kil di tu kiŋ; i fred bikɔs in na bin smɔl bɔbɔ datɛnde.

²¹ Nain Zibɔ ɛn Zalmuna se lɛ insɛf sɛf kil dɛn, bikɔs yu de si pɔsin yu no wetin i kin du. Nain Gidiɔn grap ɛn kil Zibɔ ɛn Zalmuna ɛn tek di chen dɛn we bin ɛŋ na dɛn kamɛl dɛn nɛk.

²² Nain di Izrɛlayt dɛn tɛl Gidiɔn se mek in ɛn in pikin ɛn granpikin dɛn bi dɛn rula dɛn sote go, bikɔs i dɔn pul dɛn kɔmɔt na di Midianayt dɛn an.

²³ Gidiɔn ansa dɛn se in ɛn in jɛnareshɔn dɛn nɔ go rul dɛn; na PAPA GƆD go rul dɛn.

²⁴ Bɔt i se in de aks fɔ sɔntin; dat na fɔ lɛ dɛn gi am ɔl di gold yerin dɛn we dɛn pul na di Midianayt dɛn yes. (Di Midianayt dɛnsɛf bin de wɛr gold yerin lɛk ɔl di ɔda pipul dɛn na di dɛzat)

²⁵ Nain dɛn ɔl se dat nɔto wɔd fɔ tɔk; dɛn ɔl rɛdi fɔ gi am. Nain dɛn prɛd wan klos na grɔn ɛn ɔlman put di gold yerin dɛn we dɛn pul na di Midianayt dɛn yes.

²⁶ Di yerin nɔmɔ na bin twɛnti kilogram. Dat nɔ miks pan di chen ɛn di lɔkɛt dɛn ɛn di pɔpul klos dɛn we di kiŋ dɛn bin wɛr, ɔ di kɔla dɛn we bin de rawnd di kamɛl dɛn nɛk.

²⁷ Nain Gidiɔn tek di gold mek lay lay gɔd put nain yon siti we na Ofrɔ, ɛn ɔl di Izrɛlayt dɛn bin kɔmɔt biɛn PAPA GƆD de go wɔship am. Dat na bin trap fɔ Gidiɔn ɛn in famili.

²⁸ So di Izrɛlayt dɛn bin kɔnka di Midianayt dɛn, ɛn dɛn nɔ bin ebul shek tel sɛf igen. Izrɛl bin ebul ɛnjɔy pis fɔ fɔti ia ɔl di tɛm we Gidiɔn bin de.

Aw Gidiɔn Day

²⁹ Gidiɔn we na Joash in pikin bin go bak nain yon os.

³⁰ Gidiɔn bin bɔn sɛvinti bɔypikin bikɔs i bin gɛt plɛnti wɛf.

³¹ Di switat we i bin gɛt na Shɛkɛm bin bɔn wan bɔypikin we nem Abimɛlɛk.

³² Gidiɔn we na Joash in bɔypikin day we i bin dɔn ol, ɛn dɛn bɛr am na di sem grev we dɛn bɛr in papa Joash, na Ofrɔ, usay di Abizayt dɛn de.

³³ We Gidiɔn day, di Izrɛlayt dɛn tɔn bak de go wɔship Baal. Dɛn mek Baal ɔf di Kɔvinant, dɛn gɔd.

³⁴ Di Izrɛlayt dɛn fɔgɛt bɔt PAPA GƆD we na dɛn Gɔd we de sev dɛn ɔltɛm pan ɛnitin ɛn pul dɛn kɔmɔt na dɛn ɛnimi dɛn an.

³⁵ Dɛn nɔ bin sho wan tɛnki to Gidiɔn in famili pan ɔl wetin i du fɔ dɛn.